پاکستان بیلاروس نال معاشی شراکت داری ودھاوݨ چاہندے، آئی ٹی اتے دفاعی شعبیں وچ تعاون مزید مستحکم بݨایا ویسی، وزیراعظم شہباز شریف دی بیلاروس دے وفد نال ڳالھ مہاڑ

اسلام آباد۔ 4 جون (اے پی پی) وزیراعظم محمد شہباز شریف آکھیے جو پاکستان بیلاروس نال معاشی شراکت داری ودھاوݨ چاہندے ، بیلاروس نال انفارمیشن ٹیکنالوجی اتے دفاعی شعبیں وچ تعاون کوں مزید مستحکم بݨایا ویسی، زرعی مشینری دی تیاری دے حوالے نال بیلاروس دی مہارت توں فیدہ چاوݨ چاہندن ۔ اے ڳالھ انہاں بیلاروس دے وزیر دفاع لیفٹیننٹ جنرل وکٹر خرینن دی زیر قیادت ست رکنی وفد نال ڳالھ مہاڑ کریندے آکھی جنہاں اتھاں انہاں نال ملاقات کیتی۔ وفد وچ پاکستان وچ تعینات بیلاروس دے سفیر آندرے میٹیلسٹا، بیلاروس دے کمانڈر ائیر فورس اینڈ ائیر ڈیفنس میجر جنرل آندرے لکیانووچ اتے بیلاروسی وزارت دفاع دے حکام شامل ہن۔ وزیراعظم دفتر دے میڈیا ونگ توں جاری بیان موجب وزیراعظم آکھیے پاکستان اتے بیلاروس وچال بہترین ݙو طرفہ تعلقات ہن جیڑھے ویلھے دے نال مزید تکڑے تھیندے پئن۔ انہاں آکھیے اساں بیلاروس نال معاشی شراکت داری دی مزید ترویج چاہندوں ، زرعی مشینری دی تیاری دے حوالے نال بیلاروس دی مہارت توں فیدہ چاوݨ چاہندوں ۔ وزیراعظم آکھیے بیلاروس نال انفارمیشن ٹیکنالوجی اتے دفاعی شعبیں وچ وی تعاون کوں مزید مستحکم بݨایا ویسی، ایں سال میݙے دورہ بیلاروس دے دوران ݙوہیں ملکاں وچال کئی مفاہمتی یادداشتاں اتے معاہدیں تے دستخط تھئن جئیں پاروں ݙو طرفہ تعلقات وچ مزید وسعت آسی۔ وزیراعظم بیلاروس دے صدر الیگزینڈر لوکاشینکو کیتے نیک خواہشات دا اظہار کریندے بیلاروس دے وفد کوں جنوبی ایشیا وچ اڄوکی کشیدہ صورتحال تے پاکستان دے مؤقف دا ݙسایا ۔ انہاں آکھیے پاکستان پہلگام واقعے دی غیر جانبدارانہ تحقیقات دی پیشکش کیتی جئیں دا مثبت جواب ݙیوݨ دی بجائے بھارت جارحیت دا مظاہرہ کریندے پاکستان تے حملہ کیتا، شہری آبادی کوں نشانہ بݨایا جئیں وچ بے گناہ نشوم شہری شہید تھئن۔ وزیراعظم وفد کوں ݙسیا جو10 مئی کوں پاکستان اپݨے دفاع وچ بھارتی جارحیت دا بھرپور جواب ݙتا۔ بیلاروس دے وزیر دفاع وزیراعظم کوں بیلاروسی صدر دی نیک خواہشات دا سنھیا پُڄایا۔ انہاں آکھیے جنوبی ایشیا وچ امن اتے استحکام دے چاہندوں، میݙے اتے میݙے وفد دے دورہ پاکستان دا مقصد بیلاروس اتے پاکستان دے وچال مفاہمتی یادداشتاں اتے معاہدیں تے پیشرفت کوں مزید اڳوں ودھاوݨ اے، پاکستان-بیلاروس دے ݙو طرفہ تعلقات کوں مزید تکڑا بݨاوݨ کیتے وزیراعظم شہباز شریف دی ذاتی دلچسپی دی تعریف کریندن ۔ بیلاروس دے وزیر دفاع پاکستان وچ شاندار استقبال اتے پرتپاک میزبانی تے وزیراعظم دا شکریہ ادا کیتا۔ ملاقات وچ نائب وزیراعظم / وزیر خارجہ اسحاق ڈار، وزیر دفاع خواجہ آصف، وفاقی وزیردفاعی پیداوار رضا حیات ہراج اتے متعلقہ اعلیٰ سرکاری افسر وی موجود ہن۔