پاکستان بھارت کوں عسکری میدان، بیانیہ دی جنگ اتے سفارتی محاذ تے موثر اتے بھرپور انداز وچ شکست ݙتی، بھارتی بیانیہ کوں ہر محاذ تے ناکامی دا سامݨا تھئے، وفاقی وزیر عطا اللہ تارڑ

اسلام آباد۔ 4 جون (اے پی پی) وفاقی وزیر اطلاعات و نشریات عطا اللہ تارڑ آکھیے جو پاکستان عسکری میدان، بیانیہ دی جنگ اتے سفارتی محاذ تے بھارت کوں موثر اتے بھرپور انداز وچ شکست ݙتی، وزیراعظم محمد شہباز شریف سفارتی محاذ تے پاکستان دا موقف بھرپور انداز وچ پیش کیتا، پاکستانی میڈیا حقائق نال ذمہ دارانہ صحافت کیتی جݙاں جو بھارتی میڈیا فیک نیوز اتے کوڑ دا سہارا ڳھدا ، کشیدہ صورتحال وچ پاکستانی قوم مثالی یکجہتی دا مظاہرہ کیتا، بھارتی بیانیہ کوں ہر محاذ تے ناکامی دا سامݨا تھیا، بھارت اپݨی خفت مٹاوݨ کیتے کوڑ تے مبنی پروپیگنڈا کریندا پئے۔ ٻدھ دے ݙینھ اتھاں پی ٹی وی ہیڈ کوارٹرز وچ پریس کانفرنس نال خطاب کریندے وفاقی وزیر اطلاعات آکھیے وزیراعظم محمد شہباز شریف سفارتی محاذ تے پاکستان دا موقف موثر اتے جرات مندانہ انداز وچ دنیا دے سامݨے پیش کیتا، نائب وزیراعظم اتے انہاں دی ٹیم جانفشانی نال کم کیتا، پاکستان بھارتی جارحیت دا ذمہ دارانہ جواب ݙے تے عالمی سطح تے ہک سنجیدہ ریاست دا تاثر ݙتا۔ وفاقی وزیر اطلاعات آکھیے بھارتی میڈیا روایتی طور تے کوڑ اتے فیک نیوز دا سہارا ڳھدا، بھارتی میڈیا لاہور وچ بندرگاہ تئیں بݨا ݙتی پاکستانی میڈیا قومی مفادات دا تحفظ کریندے ذمہ دارانہ صحافت دی مثال قائم کیتی۔ ایں سفارتی اتے بیانیہ دی جنگ وچ بین الاقوامی سطح تے پاکستان کوں کامیابی حاصل تھئی جئیں وچ وزیراعظم، نائب وزیراعظم، سفارتی ٹیم، میڈیا ہاؤسز، اینکرز اتے صحافیاں دا کلیدی کردار اے۔ وفاقی وزیر آکھیے پاکستان ذمہ دارانہ ریاست دے طور تے ریسپانس ݙتا، فیلڈ مارشل سید عاصم منیر دی قیادت اتے وار سٹریٹجی بھارت کوں ہر محاذ تے پسپائی تے مجبور کیتا۔ انہاں آکھیا جو”معرکہ حق” اتے “آپریشن بنیان مرصوص” کوں تاریخ وچ سنہری لفظاں وچ یاد رکھیا ویسی۔ عطا اللہ تارڑ آکھیے جو کشیدہ صورتحال وچ پاکستانی قوم جئیں اتحاد اتے یکجہتی دا مظاہرہ کیتا او مثالی ہئی۔ انہاں آکھیے بھارتی بیانیہ کوں ہر محاذ تے ناکامی دا سامݨا تھیا، افواج پاکستان بھارت کوں مُنہ بھن جواب ݙتا اتے بھارت کوں بدترین شکست دا سامݨا کرݨا پیا، ہݨ بھارت اپݨی خفت مٹاوݨ کیتے کوڑ تے مبنی پروپیگنڈا کریندا پئے۔ وفاقی وزیر اطلاعات آکھیے بھارت بلوچستان وچ دہشت گردی دیاں کارروائیاں وچ براہ راست ملوث اے۔ بھارتی نیوی دا حاضر سروس افسر کلبھوشن یادیو ایندی واضح مثال اے۔ بھارت دیاں دہشت گردانہ سرگرمیاں پاکستان سودھا کینیڈا، امریکہ اتے آسٹریلیا تئیں کھنڈ ڳیاں ہن اتے اے بھارت دی خارجہ پالیسی دا حصہ بݨ ڳیاں۔ وزیر اطلاعات آکھیے بھارتی نیوی دا حاضر سروس کمانڈر کلبھوشن یادیو فرضی ناں نال اپݨے آپ کوں بزنس مین ظاہر کر تے بلوچستان وچ دہشت گردی دیاں کارروائیاں وچ ملوث ہئی جئیں کوں بلوچستان توں گرفتار کیتا ڳیا۔ انہاں آکھیے فتنہ الہندوستان بلوچستان وچ دہشت گردی دیاں کارروائیاں کیتے فنڈنگ کریندا پئے افواج پاکستان ہر قسم دی دہشت گردی دے مکاوݨ کیتے پرعزم ہن۔ وفاقی وزیر اطلاعات آکھیے مودی، بھارتی سیاستدان، حکومتی عہدیداران اتے وزراء اپݨیاں تقریراں وچ بلوچستان دا ذکر کیوں کریندن؟ انہاں آکھیے فتنہ الہندوستان بلوچستان دے اندر دہشت گردی دیاں کارروائیاں دی نہ صرف فنڈنگ کریندے اسلحہ وی مہیا کریندے اتے بہوں ساریاں کارروائیاں وچ انہاں دے ہینڈلرز ملوث ہوندن۔ وفاقی وزیر اطلاعات آکھیا جو فتنہ الہندوستان نال افواج پاکستان چنڳے طریقے نال نبڑدی پئی اے ، دہشت گرداں کوں جہنم واصل کریندے پئن۔ انہاں ݙسایا نریندر مودی 1971ء وچ مکتی باہنی دی حمایت کرݨ دا اعتراف کیتا، اے ہمیشہ پراکسیز دے ذریعے اپݨیاں جنگاں لڑدن۔ انہاں آکھیا جوفتنہ الہندوستان دے تحت بھارت پاکستان دے اندر عدم استحکام پیدا کرݨ دیاں سازشاں وچ ملوث اے، انہاں دا اے خواب کݙائیں پورا نہ تھیسی۔ انہاں آکھیے مٹھی بھر دہشت گرد ریاست پاکستان دا کجھ نئیں وڳاڑ سڳدے، فتنہ الہندوستان دا خاتمہ ضرور تھیسی اتے بلوچستان وچ امن تھیسی۔ انہاں آکھیے جعفر ایکسپریس واقعے وچ بھارتی میڈیا دا کردار اتے دہشت گرداں کوں کوریج ݙیوݨ انہاں دے ایجنڈے کوں بے نقاب کریندے۔ پاک فوج اتے ایس ایس جی جئیں مہارت نال یرغمال لوکاں کوں گھٹ توں گھٹ ضیان تے بازیاب کروائے انہاں دی مہارت دا مُنہ ٻولیندا ثبوت اے۔ انہاں آکھیے بھارتی ٹی وی چینلز تے فتنہ الہندوستان دے دہشت گرداں دے انٹرویوز چلائے ویندے پئن جو جعفر ایکسپریس واقعے دے ذمہ وار ہن۔ بھارتی میڈیا تے ٹرین دی پٹڑی کوں اُݙدے ہوئیں ݙکھایا ڳیا، اے فوٹیج پاکستان توں پہلے بھارت وچ آن ایئر تھئی۔ اے ساریاں چیزاں ثابت کریندن بھارت بلوچستان وچ دہشت گردی دے واقعات وچ ملوث ہے۔ انہاں آکھیے جعفر ایکسپریس واقعے تے بھارت وچ جشن منایا ڳئے، خضدار وچ نشوم نینگراں کوں نشانہ بݨایا ڳئے، بھارت دی دہشت گردی تے مبنی پالیسی نہ چلسی، فتنہ الہندوستان دا بلوچستان توں ضرور خاتمہ تھیسی۔ وفاقی وزیر اطلاعات آکھیے پاکستان پہلگام واقعے تے غیر جانبدارانہ، شفاف عالمی تحقیقات دی پیشکش کیتی جئیں توں بھارت پچھوں ہٹ ڳیا۔ انہاں آکھیے وزیراعظم شہباز شریف اتے فیلڈ مارشل سید عاصم منیر دی قیادت وچ پاکستان موثر حکمت عملی دے ذریعے دشمن کوں بھرپور جواب ݙتا۔ وفاقی وزیر آکھیا بلوچستان پاکستان دی لائف لائن اے، بلوچستان وچ قیام امن، ترقی اتے خوشحالی دے سفر کوں ہر قیمت تے اڳوں ودھایا ویسی اتے فتنہ الہندوستان دا خاتمہ کر تے پاکستان کوں پائیدار امن دی طرف ڳھن آیا ویسی۔ ہک سوال دے جواب وچ وفاقی وزیر اطلاعات آکھیے بلاول بھٹو زرداری دی قیادت وچ وفد اقوام متحدہ دے سیکرٹری جنرل، جنرل اسمبلی دے صدر، چین، امریکہ، برطانیہ اتے روس دے نمائندیں اتے تھنک ٹینکس نال اہم ملاقاتاں کیتیاں۔ انہاں آکھیے دنیا دے ہر فورم تے وفداں دے ذریعے بھرپور طریقے نال ݙسایا ویندا پئے جو بھارت دے سٹیٹ سپانسرڈ ٹیررازم دے واضح ثبوت موجود ہن۔ انہاں آکھیے پاکستان بھارت دے گمراہ کن پروپیگنڈے کوں ہر سطح تے ناکام بݨیسی اتے خطے وچ امن دے قیام کوں یقینی بݨایا ویسی