حکومت 9000 میگاواٹ دے مہانگے اتے غیر ضروری منصوبیں کوں ختم کیتا، سارے فیصلے ملکی مفاد اتے توانائی دے نظام دی طویل مدتی پائیداری کوں سامݨے رکھیندے کیتے ویندے پئن، سردار اویس احمد خان لغاری

اسلام آباد۔ 4 جون (اے پی پی) وفاقی وزیر توانائی سردار اویس احمد خان لغاری آکھیے جو حکومت 9000 میگاواٹ دے مہانگے اتے غیر ضروری منصوبیں کوں ختم کیتا جیڑھے بجلی دے نظام تے ٻوجھ بݨدے پئن، حکومت کہیں وی صارف یا کاروبار کوں ضیان پچاوݨ دا ارادہ نی رکھیندی، سارے فیصلے ملکی مفاد اتے توانائی دے نظام دی طویل مدتی پائیداری کوں سامݨے رکھیندے کیتے ویندے پئن۔ اے ڳالھ انہاں پرائیویٹ پاور اینڈ انفراسٹرکچر بورڈ (پی پی آئی بی) وچ نیٹ میٹرنگ توں نیٹ بلنگ دے نظام وچ منتقلی دے حوالے نال منعقدہ مشاورتی اجلاس نال خطاب کریندے آکھی ۔ اجلاس وچ سولر انڈسٹری نال وابستہ ماہرین، متعلقہ سرکاری اداریں، صوبائی حکومتاں اتے ݙوجھے سٹیک ہولڈرز شرکت کیتی۔ وفاقی وزیر توانائی آکھیے حکومت نیٹ میٹرنگ کوں ختم نئیں کریندی، ایندے موجودہ طریقہ کار کوں ہک زیادہ مؤثر، شفاف اتے پائیدار ماڈل وچ تبدیل کرݨ تے غور کریندی پئی اے۔ اویس لغاری دا آکھݨ ہئی 2017-18 وچ انہاں خود نیٹ میٹرنگ کوں متعارف کراوݨ وچ اہم کردار ادا کیتا اتے ایں ویلھے اے نظام ابتدائی مرحلے وچ ہئی، ہݨ جݙاں جو نیٹ میٹرنگ دا دائرہ وسیع تھی ڳئے، ایندے گرڈ تے سنجیدہ اثرات مرتب تھیندے پئن، جنہاں دا وختی تدارک ضروری اے۔ وفاقی وزیر آکھیے حکومت کہیں وی صارف یا کاروبار کوں نقصان پچاوݨ دا ارادہ نی رکھیندی سارے فیصلے ملکی مفاد اتے توانائی دے نظام دی طویل مدتی پائیداری کوں سامݨے رکھیندے کیتے ویندے پئن، اساں اے نی آکھیندے پئے جو نیٹ میٹرنگ آلے صارف اساکوں بجلی ساریں توں سستے بجلی دے ذرائع دے نرخاں تے ݙیوں جے اساں یونٹاں دی خریداری دا ذکر کریندوں تاں ایں بارے وی غور جاری اے اتے اینکوں انرجی خریداری پرائس تے گھن آوݨ دی ڳالھ تھیندی پئی اے تاں جو نرخاں وچ لہہ چڑھ نال اے نظام خود بخود ایڈجسٹ تھیوے، اے ساریاں تجویزاں زیر غور ہن۔ وفاقی وزیر آکھیے نیٹ میٹرنگ صارفین کیتے پے بیک پیریڈ اگر تقریباً ترائے سال یا ایندے توں گھٹ اے، تاں اے کہیں وی سرمایہ کاری کیتے موزوں مدت اے۔ جے ہک صارف 40 فیصد بجلی خود استعمال کریندا پئے تاں ترائے سال وچ رقم دی واپسی ہک قابلِ قبول تجارتی ماڈل اے۔ اے اصلاحات حوصلہ شکنی کائںی ، ہک بہتر، متوازن اتے پائیدار نظام دے پاسے پیش قدمی اے۔ اجلاس دے دوران وفاقی وزیر توانائی ملک وچ جاری توانائی اصلاحات دا جامع خاکہ پیش کیتا۔ انہاں ݙسایا حکومت 9000 میگاواٹ دے مہانگے اتے غیر ضروری منصوبیں کوں ختم کیتا، جیڑھے بجلی دے نظام تے بوجھ بݨدے پئن۔ انہاں ݙسایا کیپٹو پاور صارفین تے لیوی عائد کر تے انہاں کوں گرڈ دے پاسے واپس گھن آیا ڳئے جئیں دے نتیجے وچ بجلی دی طلب وچ ودھارا تھئے۔ جون 2024 توں ہݨ تئیں صنعت کوں ݙتی ونڄݨ آلی کراس سبسڈی دا حجم 174 ارب روپے اے، جئیں نال صنعتی نرخاں وچ 31 فیصد تئیں کمی آئی اتے صنعتی کھپت وچ نمایاں ودھارا تھئے۔ انہاں آکھیے بجلی دیاں قیمتاں وچ مختلف صارفین کیتے 14 توں 18 فیصد تئیں کمی ریکارڈ کیتی ڳئی اے، جیڑھی ایں ڳالھ دا ثبوت اے جو حکومتی اصلاحات عملی طور تے اثر ݙیکھیندیاں پئن۔ ایندے علاوہ حکومت وݙے آئی پی پیز دے نال معاہدیں تے ݙوجھا واری ڳالھ مہاڑ کیتی جئیں نال نرخاں وچ واضح کمی آئی اتے بجلی دے طویل مدتی منصوبے وچ ایجھے منصوبے شامل نئیں کیتے ڳئے جنہاں دی لوڑھ نہ ہائی۔ وفاقی وزیر ایں وی ݙسایا حکومت کنے ایں ویلھے 7000 میگاواٹ اضافی بجلی موجود اے، جیڑھی بغیر کہیں سبسڈی دے 7 توں 7.5 سینٹ وچ صنعت اتے زراعت کوں ݙتی ونڄ سڳدی اے۔ اساں چھ مہینے توں اسکیم دی منظوری کیتے آئی ایم ایف نال مشاورت کریندے پئن، حالانکہ اساں تے کوئی براہ راست مالی دباؤ کائںی۔ اساݙا مقصد اے ہے جو بجلی دی سپلائی اتے ڈیمانڈ کوں توازن وچ رکھیا ونڄے تاں جو نظام مضبوط تھیوے اتے صارفین کوں فیدہ پڄے ۔ اویس لغاری ایں امر تے وی زور ݙتا گرڈ دی بہتری حکومت دیاں اولین ترجیحات وچ شامل اے۔ انٹیگریٹڈ گرڈ اتے آف گرڈ ݙوہیں کیتے اساں جدید اتے موثر حل ڳھن آندے پئن۔ انہاں ایں ڳالھ دا اعادہ کیتا جو سارے اصلاحات ہک مربوط حکمت عملی دے تحت کیتیاں ویندیاں پئن اتے کوئی قدم عجلت وچ یا عارضی بنیاداں تے نئیں چاتا ویندا پیا۔ اے ویلھا اے جو اساں توانائی دے نظام کوں جدید خطوط تے استوار کروں۔ شرکا دی پیش کیتی ڳئی تجویزاں تے مثبت پیش رفت تھیسی تاں جو اے عمل زیادہ موثر، جامع اتے ساریاں دے مفاد وچ تھیوے