صاف، ساوا اتے محفوظ ماحول ݙیوݨ آندیاں نسلاں دا بنیادی حق اے، سپیکر قومی اسمبلی سردار ایاز صادق

اسلام آباد۔ 4 جون (اے پی پی) سپیکر قومی اسمبلی سردار ایاز صادق آکھیے جو صاف، سرسبز اتے محفوظ ماحول ݙیوݨ آندیاں نسلاں دا بنیادی حق اے اتے ماحولیاتی تحفظ اساں ساریں دی سانجھی ذمہ واری اے، پاکستان دا عالمی سطح تے گرین ہاؤس گیساں دے اخراج وچ حصہ صرف 0.5 فیصد اے، اے انہاں ملکاں وچ شامل ہے جو موسمیاتی تبدیلیاں توں ساریں توں زیادہ متاثر تھیندے پئن۔ اے ڳالھ انہاں عالمی یوم ماحولیات دے موقع تے اپݨے خصوصی پیغام وچ آکھی جیڑھا ہر سال اقوام متحدہ دے تحت 5 جون کوں دنیا بھر وچ منایا ویندے۔سپیکر قومی اسمبلی آکھیے درجہ حرارت وچ ودھارا ، مینھ دے غیر متوقع نظام، گلیشیئرز دا تکھے پگھلاؤ اتے چھل پاکستان دے ماحول تے گھاٹے اثرات مرتب کریندے پئن جنہاں نال نہ صرف معیشت متاثر تھیندی پئی اے بھل انسانی زندگی کوں وی سنگین خطرہ لاحق ہن۔ انہاں آکھیے ماحولیاتی انحطاط پائیدار ترقیاتی اہداف دے حصول دی راہ وچ رکاوٹ بݨ سڳدے، جے ایں ضمن وچ وختی اتے مربوط اقدامات نہ کیتے ڳئے تاں ملک کوں موسمیاتی تبدیلیاں توں مزید ضیان چاوݨا پئے سڳدے۔سپیکر قومی اسمبلی آکھیے پاکستان دی پارلیمان ماحولیات متعلق آگاہی اتے قانون سازی وچ کلیدی کردار ادا کریندی پئی اے۔ انہاں آکھیے ماحولیاتی تحفظ متعلقہ پارلیمانی کمیٹیاں فعال طور تے کم کریندیاں پئن اتے ملک بھر وچ شجرکاری، پاݨی دے وسائل دے تحفظ، فضائی آلودگی دے انسداد اتے ماحولیاتی تعلیم کوں ودھارا ݙیوݨ کیتے ٻہوں اقدامات تجویز کیتے ڳئن۔ انہاں مزید آکھیے جو ایں ضمن وچ پاکستان دی پارلیمان ماحولیاتی تبدیلیاں نال نبݨݨ اتے ماحولیاتی پائیداری دے ودھارے کیتے موثر قانون سازی اتے پالیسیاں دی تشکیل وچ نمایاں کردار ادا کیتے۔ پاکستان کلائمیٹ چینج ایکٹ 2017 دی منظوری اتے پیرس ماحولیاتی معاہدے 2015 دی توثیق ایں ڳالھ دا واضح ثبوت ہن پاکستان عالمی ماحولیاتی اہداف دے حصول کیتے پرعزم ہے۔ایں حوالے نال سپیکر عالمی برادری تے زور ݙتا جواو ترقی پذیر ملکاں جہیں پاکستان دی معاونت کرے جو عالمی کاربن اخراج وچ معمولی حصہ پاوݨ دے باوجود ماحولیاتی آفات دا ساریں توں ودھ نشانہ بݨیندا پئے۔ انہاں آکھیے ماحولیاتی انصاف دا تقاضا اے جو سارے رل تے مساوی انداز وچ اقدامات کرن تاں جو ساریں کیتے پائیدار مستقبل کوں یقینی بݨایا ونڄ سڳے۔ایں موقع تے ڈپٹی سپیکر قومی اسمبلی سید غلام مصطفیٰ شاہ آکھیے ماحولیاتی آلودگی نہ صرف انسانی صحت کیتے خطرہ اے حیاتیاتی تنوع، زرعی پیداوار اتے ملکی معیشت کوں وی متاثر کریندی پئی اے۔ انہاں آکھیے ماحول دا تحفظ صرف حکومت یا اداریں دا کم کائنی ہر شہری کوں ایں ضمن وچ اپݨا کردار ادا کرݨا ہوسی۔ انہاں نوجوان نسل تے زور ݙتا جو او ماحول دوست رویے اپݨاون اتے زمین کوں محفوظ بݨاوݨ دی جدوجہد وچ بھرپور حصہ ڳھنن۔