وزیراعظم محمد شہباز شریف دی صدارت اچ قومی اقتصادی کونسل دا اجلاس

اسلام آباد۔ 4 جون (اے پی پی) قومی اقتصادی کونسل 2025-2026 کیتے 4224 بلین روپے دے قومی ترقیاتی بجٹ دی منظوری ݙے ݙتی اے، جئیں وچ 1000 بلین روپے وفاقی جݙاں جو 2869 بلین روپے صوبائی ترقیاتی منصوبیں دے خرچے کیتے مختص ہوسن۔ قومی اقتصادی کونسل 2024-2025 کیتے مجموعی قومی پیداوار دی 2.7 فیصد شرح نمو اتے اڳلے مالی سال کیتے 4.2 فیصد شرح نمو، اُڑان پاکستان فریم ورک، 13ویں پنج سالہ منصوبے (2024-2029)، 2025-2026 دے سالانہ ترقیاتی پلان اتے مالی سال 2025-2026 کیتے میکرو اکنامک فریم ورک اتے اہداف دی وی منظوری ݙے ݙتی۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیر صدارت قومی اقتصادی کونسل دا اجلاس منعقد تھیا۔ وزیراعظم اجلاس دے شرکا کوں10 مئی دے معرکہ حق وچ پاکستان دی تاریخ ساز فتح تے مبارکباد پیش کیتی۔ وزیراعظم آکھیے پاک افواج دی پیشہ وارانہ مہارت اتے دلیری دی بدولت معرکہ حق وچ اللہ تعالیٰ پاکستان کوں فتح نال نوازیا، بھارت دا پاکستان دے خلاف اڄوکا بیانیہ انتہائی غیر ذمہ دارانہ اے جئیں نال خطے وچ امن و سلامتی کوں شدید خطرات لاحق ہن۔ انہاں آکھیا جو پاکستانی عوام ملکی سالمیت دے تحفظ کیتے بھارت دے خلاف مکمل طور تے کٹھے ہن، بھارت دیاں پاکستان کوں آبی وسائل توں محروم کرݨ دیاں تڑیاں نا قابل قبول ہن، اساں معرکہ حق دے بعد آبی وسائل دے تحفظ دی جدوجہد وچ وی انشاء اللہ بھارت کوں شکست ݙیسوں۔وزیراعظم آکھیے سارے وزراء اعلیٰ دے نال خصوصی اجلاس وچ بھارتی جارحیت دے تناظر وچ پاکستان دے آبی وسائل دے تحفظ کیتے مضبوط حکمت عملی تے مشاورت کیتی ویسی، وفاق اتے صوبے رل تے پاکستان دے آبی وسائل کوں محفوظ رکھݨ وچ کامیاب تھیسن ، ملک وچ اڄوکے معاشی استحکام وفاق اتے صوبیں دیاں مشترکہ کاوشاں دی بدولت ممکن تھئے، ملک معاشی ترقی دے رستے ٹردا پئے۔ انہاں آکھیا زرعی شعبہ ملکی زرمبادلہ وچ اضافے اتے شرح نمو وچ اضافے کیتے مرکزی کردار ادا کریندے، زرعی پیداوار وچ بتدریج اضافے کیتے حکمت عملی تشکیل ݙتی ویندی پئی ہے۔اجلاس وچ قومی اقتصادی کونسل دے 6 نکاتی ایجنڈا دی اتفاق رائے نال منظوری ݙتی ڳئی۔ اجلاس کوں مالی سال 2024-2025 وچ معیشت دی کارکردگی دے حوالے نال نظر ثانی شدہ اشارے پیش کیتے ڳئے۔ اجلاس کوں ݙسایا ڳیا 2024-2025 وچ 3483 بلین روپے سالانہ قومی ترقیاتی پروگرام تے خرچ کیتے ویندے پئن جئیں وچ 1100 بلین روپے وفاق جݙاں جو 2383 بلین روپے صوبیں دا حصہ ہن۔ اجلاس 2024-2025 کیتے مجموعی قومی پیداوار دی 2.7 فیصد شرح نمو اتے اڳلے مالی سال کیتے 4.2 فیصد شرح نمو دی منظوری ݙے ݙتی۔اجلاس کوں بریفنگ اچ ݙسایا ڳیا جولائی 2024 توں اپریل 2025 تئیں ترسیلات زر وچ 30.9 فیصد اضافہ تھیا اتے کرنٹ اکاؤنٹ بیلنس پہلی واری مثبت ریہا۔ بریفنگ وچ ݙسایا ڳیا مالی سال 2024-2025 وچ مالیاتی خسارہ مزید گھٹ تھی تے مجموعی قومی پیداوار دا 2.6 فیصد ریہا جݙاں جو پرائمری بیلنس اضافے دے بعد مجموعی قومی پیداوار دا 3 فیصد ریہا۔ بریفنگ دے دوران ݙسایا ڳیا حکومتی پالیسیاں اتے اقدامات نال پالیسی ریٹ بتدریج کمی دے بعد 11 فیصد تے آیا جݙاں جو جولائی 2024 توں مئی 2025 تئیں نجی شعبے دی ترقی کیتے ݙتے ونڄݨ آلے قرضے ودھ تے 681 ارب تئیں پڄ ڳئے۔ 2024-2025 وچ مجموعی قومی پیداوار دا حجم 114 ٹریلین روپے یا 411 ارب ڈالر تھیسی۔اجلاس 2025-2026 دے سالانہ ترقیاتی پلان دی وی منظوری ݙے ݙتی۔ اجلاس 2025-2026 کیتے 4224 بلین روپے دے قومی ترقیاتی بجٹ دی منظوری ݙتی جئیں وچ 1000 بلین روپے وفاقی جݙاں جو 2869 بلین روپے صوبائی ترقیاتی منصوبیں دے اخراجات کیتے مختص ہوسن۔ اجلاس مالی سال 2025-2026 کیتے میکرو اکنامک فریم ورک اتے اہداف دی وی منظوری ݙے ݙتی۔ قومی اقتصادی کونسل متعلقہ وزارتاں، صوبیں اتے سرکاری اداریں کوں ہدایت کیتی جو مجوزہ سالانہ پلان 2025-2026 دے اہداف دے حصول کیتے وزارت منصوبہ بندی نال رل تے کم کرن، انہاں ترقیاتی منصوبیں وچ صحت، تعلیم، انفراسٹرکچر، واٹر سیکٹر، اتے ہاؤسنگ دے شعبیں کوں ترجیح ݙتی ویسی۔قومی اقتصادی کونسل کوں اپریل 2024 توں مارچ 2025 تئیں سی ڈی ڈبلیو پی دی پیشرفت تے رپورٹ پیش کیتی ڳئی۔ اجلاس وچ اپریل 2024 توں مارچ 2025 دے دوران سی ڈی ڈبلیو پی اتے ایکنک توں منظور کیتے ڳئے قومی ترقیاتی منصوبیں دی تفصیل وی پیش کیتی ڳئی۔ اجلاس 13ویں پنج سالہ منصوبے (2024-2029) دی منظوری ݙتی۔ قومی اقتصادی کونسل دے اجلاس وچ اُڑان پاکستان فریم ورک دی وی منظوری ݙتی ڳئی۔ اجلاس کوں ݙسایا ڳیا 13 واں پنج سالہ منصوبہ اتے اُڑان پاکستان سانجھے طور تے ہم آہنگ ہن۔ اجلاس کوں سالانہ قومی ترقیاتی پروگرام دے منصوبیں دی تھرڈ پارٹی مانیٹرنگ رپورٹ وی پیش کیتی ڳئی۔ اجلاس وچ فیصلہ کیتا ڳیا رپورٹ دیاں سفارشاں دی روشنی وچ مستقبل دے منصوبیں دی پلاننگ کیتی ویسی۔وزیراعظم قومی اقتصادی کونسل دے اجلاس دے سارے نکات دی اتفاق رائے نال منظوری تے شرکا دا شکریہ ادا کیتا اتے آکھیا جو قومی امور تے ایویں اتفاق رائے پاکستان دے روشن مستقبل دی ضامن اے۔ اجلاس وچ نائب وزیراعظم و وزیر خارجہ محمد اسحاق ڈار، وزیر منصوبہ بندی ڈاکٹر احسن اقبال، وزیر خزانہ محمد اورنگزیب، وزیر اطلاعات و نشریات عطا اللہ تارڑ، وزیراعظم دے مشیر رانا ثناء اللہ دے نال نال وزیر اعلیٰ پنجاب مریم نواز، وزیر اعلیٰ سندھ سید مراد علی شاہ، وزیر اعلیٰ خیبر پختونخوا علی امین گنڈا پور، وزیر اعلیٰ بلوچستان نواب سرفراز بگٹی اتے قومی اقتصادی کونسل دے ݙوجھے ارکان شریک ہن۔