ملک دی مجموعی قومی پیداوار وچ بحری شعبے دا حصہ 10 فیصد، اے 20 لکھ لوکاں کوں روزگار ݙیندا پئے،وفاقی وزیر جنید انوار چوہدری

اسلام آباد۔ 5 جون (اے پی پی) وفاقی وزیر بحری امور جنید انوار چوہدری آکھیے پاکستان دی 90 فیصد توں ودھ تجارت سمندری رستیں توں تھیندی اے، ملک دی مجموعی قومی پیداوار (GDP) وچ ایں شعبے دا حصہ 10 فیصد توں ودھ اے اتے براہ راست و بالواسطہ طور تے اے 20 لکھ توں ودھ لوکاں کوں روزگار ݙیندا پئے۔ اے ڳالھ انہاں گزریل رات پاکستان انٹرموڈل لمیٹڈ دے منیجنگ ڈائریکٹر عاصم اے صدیقی دے عشائیے نال خطاب کریندے آکھی ۔ ایں وچ شپنگ لائنز اتے ٹرمینل آپریٹرز دے سینئر انتظامیہ دے ارکان شرکت کیتی۔جنید انوار چوہدری پاکستان دی شپنگ انڈسٹری دے عالمی تجارت وچ کلیدی اتے ماحولیاتی پائیداری دے ودھارے وچ اہم کردار تے زور ݙیندے ملک وچ بحری ڈھانچے دی جدید کاری اتے آپریشنل صلاحیتاں وچ ودھارے کیتے حکومت دی وابستگی کوں اجاگر کیتا۔ وفاقی وزیر آکھیے کراچی پورٹ ٹرسٹ سالانہ 125 ملین ٹن توں ودھ کارگو سنبھالݨ دی صلاحیت رکھیندے۔ انہاں دا آکھݨ ہئی مالی سال 2023 وچ شپنگ سیکٹر تقریباً 235 ملین ڈالر دی آمدنی حاصل کیتی جئیں وچ تیل بردار جہازاں دا حصہ تقریباً 70 فیصد ریہا۔وفاقی وزیر آکھیے غیر ملکی شپنگ کمپنیاں تے انحصار پاروں پاکستان کوں ہر سال تقریباً6 توں 8 ارب ڈالر فریٹ چارجز دی مد وچ ادا کرݨے پوندن۔ انہاں مقامی شپنگ صلاحیتاں اتے ٹرمینل آپریشنز کوں وسعت ݙے تے انہاں خرچے وچ نمایاں کمی اتے ترقی دے امکانات تے زور ݙتا۔ جنید انوار چوہدری آکھیے حکومت پاکستان دی سٹریٹجک لوکیشن کوں سامݨے رکھیندے ہوئیں عالمی شپنگ کمپنیاں کوں بحری شعبے وچ سرمایہ کاری دی دعوت ݙیندی پئی اے۔ ایں سلسلے وچ ہک نمایاں اقدام ہچی سن پورٹ ہولڈنگز لمیٹڈ دے نال ہک ارب ڈالر دی سرمایہ کاری کیتے تکھی رفتار حکمت عملی اے جئیں دا مقصد کراچی انٹرنیشنل کنٹینر ٹرمینل اتے ساؤتھ ایشیا پاکستان ٹرمینلز لمیٹڈ دی جدید کاری اے۔ انہاں صنعت دے رہنماواں کوں یقین ݙیوائے انہاں دے خدشات کوں صوبائی حکام بشمول وزیر اعلیٰ سندھ دے نال نیڑے رابطے دے ذریعے حل کیتا ویندا پئے تاں جو سارے سطح تے مربوط پالیسیاں دا نفاذ یقینی بݨایا ونڄ سڳے