اڄ دا ݙینھ اساکوں ماحول دی اہمیت اتے ایندی حفاظت دے حوالے نال اپݨیاں ذمہ واریاں دا احساس ݙویندے ، سید یوسف رضا گیلانی

اسلام آباد۔ 5 جون (اے پی پی) چیئرمین سینیٹ سید یوسف رضا گیلانی آکھیے اڄ دا ݙینھ اساکوں ماحول دی اہمیت اتے ایندی حفاظت دے حوالے نال اپݨیاں ذمہ واریاں دا احساس ݙویندے ۔ اے ݙینھ نہ صرف ہک یاد دہانی اے  بلکہ ہک اجتماعی عزم دا موقع وی اے جو اساں اپݨیاں آوݨ آلیاں نسلاں کوں ہک صاف، ساوا اتے محفوظ ماحول ݙیوں۔سینیٹ سیکرٹریٹ توں جاری بیان موجب ماحول دے عالمی ݙینھ دے موقع تے اپݨے خصوصی پیغام وچ چیئرمین سینیٹ سید یوسف رضا گیلانی آکھیے موسمیاتی تبدیلی، آلودگی، جنگلات دی کٹائی اتے آبی وسائل دی کمی جہیں چیلنجز اساݙے مستقبل کیتے سنگین خطرہ ہن۔ انہاں مسئلیں دا حل صرف حکومتاں دی ذمہ واری نئیں بلکہ ہر شہری، ادارے، اتے معاشرے دیاں سانجھیاں کوششاں نال ہی ممکن اے۔انہاں آکھیے پاکستان انہاں ملکاں وچ شامل اے جیڑھے ماحولیاتی تبدیلیاں توں ساریں توں زیادہ متاثر تھیندے پئن، ایں کیتے اساکوں مقامی، قومی اتے عالمی سطح تے ماحولیاتی تحفظ دے اقدامات کوں ودھارا ݙیوݨا ہوسی، شجرکاری، پاݨی دے درست استعمال، پلاسٹک توں اجتناب، اتے قدرتی وسائل دا دانشمندانہ استعمال اساݙیاں اولین ترجیحات وچ شامل تھیوݨا چاہیدے۔ سید یوسف رضا گیلانی آکھیے سینیٹ آف پاکستان ماحولیاتی تحفظ کیتے قانون سازی، پالیسی سازی اتے نگرانی دے عمل وچ اپݨی مکمل ذمہ داری نبھیندی رہی اے ۔ انہاں نینگراں تے زور ݙتا جو او ماحول دوست طرزِ زندگی اپݨاون اتے آگاہی کھنڈاوݨ وچ کلیدی کردار ادا کرن۔ چیئرمین سینیٹ ایں عزم دا اظہار کیتا جو پاکستان ہک سرسبز و شاداب ملک دے طور تے دنیا وچ ہک مثال بݨسی۔