کوئی فریق یکطرفہ طور تے سندھ طاس معاہدے توں نئیں نکل سڳدا، بھارتی تڑیاں بے معنی ہن، روایتی جنگ وانگوں آبی معاملے تے وی بھارت دا گھمنڈ مٹی اچ رَلیسوں ، وزیراعظم شہباز شریف دا اجلاس نال خطاب

اسلام آباد۔ 5 جون (اے پی پی) وزیراعظم محمد شہباز شریف آکھیے جو سندھ طاس معاہدے دے تحت کوئی فریق یکطرفہ طور تے معاہدے توں نئیں نکل سڳدا، بھارتی تڑیاں بے معنی ہن، روایتی جنگ وانگوں آبی معاملے تے وی بھارت دا گھمنڈ مٹی وچ رلیسوں۔ انہاں آکھیے پاکستانی قوم متحد اے، اتفاق رائے نال آوݨ آلیاں نسلاں دے تحفظ کیتے “ہݨ یا کݙائیں کائناں” دی بنیاد تے دلیرانہ فیصلے اتے ٹھوس اقدامات کریسوں۔اے ڳالھ انہاں آبی ذخیرے دے حوالے نال اہم اجلاس نال خطاب کریندے آکھی۔ اجلاس وچ نائب وزیراعظم و وزیر خارجہ محمد اسحاق ڈار، فیلڈ مارشل سید عاصم منیر، وفاقی وزراء، صوبائی قیادت اتے اعلیٰ سرکاری حکام وی موجود ہن۔ وزیراعظم آکھیے بھارت اڄوکی جنگ وچ بدترین شکست دے بعد تواتر نال سندھ طاس معاہدے کوں بطور ہتھیار استعمال کرݨ دیاں تڑیاں ݙیندا پئے اتے ایں وچ ݙینھ  و ݙینھ ودھارا تھیندا پئے، پاݨی دی تقسیم دے معاہدے دی خلاف ورزی متعلق بھارت اپݨے بیانیے کوں ہوا ݙیندا پئے ۔ انہاں آکھیے اڄوکی پاک بھارت جنگ وچ اللہ تعالیٰ اساکوں جو تاریخی فتح عطا فرمائی ایندے تے اللہ تعالیٰ دا جتنا شکر ادا کروں گھٹ اے۔ شکر ادا کرݨ دا بہترین طریقہ اے جو اساں شبانہ روز محنت کروں اتے جنگ دی فتح دی عظمت وانگوں عظیم ملک بݨ تے ݙکھالوں۔وزیراعظم آکھیے معاشی میدان وچ وفاق اتے صوبیں رل تے 24 کروڑ عوام کیتے شاندار مستقبل ترتیب ݙیوݨا اے اتے معاشی میدان وچ کامیابی محض ڳالھیں نال نی بلکہ عملی اقدامات نال ممکن ہوسی۔ وزیراعظم آکھیے انتھک محنت اتے لگن نال ہی معاشی استحکام دا خواب شرمندہ تعبیر ہوسی۔ انہاں آکھیے پاݨی بند کرݨ دے تڑی آمیز بھارتی بیانیے کوں دنیا یکسر مسترد کیتا، پاکستان، بھارت کشیدگی وچ امریکہ و ݙوجھے ملکاں واضح کیتا جو سندھ طاس معاہدے دی خلاف ورزی قابل قبول کائنی، بھارتی پروپیگنڈے کوں نہ تاں سیاسی کامیابی ملی نہ ہی انہاں دے بیانیے کوں اقوام عالم وچوں کہیں تسلیم کیتا۔وزیراعظم آکھیے بطور قوم اساݙا فرض اے اساں آوݨ آلیاں نسلاں کوں محفوظ مستقبل ݙیوں ۔ انہاں آکھیے سندھ طاس معاہدے دے تحت سندھ، جہلم اتے چناب دے پاݨی تے پاکستان دا حق اے، اساکوں بھارتی آبی جارحیت دے خلاف اقدامات چاوݨ دی لوڑھ اے، پاݨی دے اپݨے حق کوں محفوظ بݨاوݨا اساں ساریں کیتے اجتماعی چیلنج اے۔ وزیراعظم آکھیے چارے صوبیں دے عوام دی پاݨی دی لوڑھ پوری کرݨ حکومتی ترجیح اے، روایتی جنگ وانگوں آبی معاملے تے وی بھارتی گھمنڈ مٹی اچ رلیسوں ۔ انہاں آکھیے پاکستان عالمی آبی معاہدیں کوں مدنظر رکھیندے ہوئیں اپݨے حق کیتے آواز بلند کریسی۔ انہاں آکھیے 91 دے معاہدے دے تحت اتفاق رائے نال آبی ذخیرے دی تعمیر یقینی بݨیسوں، کہیں متنازعہ معاملے کوں نہ چھیڑیا ویسی، جنہاں منصوبیں تے ساریں دا اتفاق اے انہاں تے کم نہ کیتا تاں آوݨ آلیاں نسلاں اساکوں معاف نہ کریسن۔وزیراعظم آکھیے 24 اپریل کوں نیشنل سکیورٹی کمیٹی دے اجلاس وچ وی بھارت دیاں آبی تڑیاں دا جائزہ ڳھدا ڳئے ، پاکستان بھارت دیاں آبی تڑیاں دا معاملہ سیاسی و سفارتی محاذ تے بھرپور طریقے نال چیسی ، کوئی فریق یکطرفہ طور تے سندھ طاس معاہدے توں نئیں نکل سڳدا، بھارتی تڑیاں بے معنی ہن تے اساکوں خود بھارت دا مقابلہ کرݨ کیتے اپݨے آپ کوں تیار کرݨا ہوسی، زندہ قوماں اپݨے مستقبل کیتے لائحہ عمل بݨیندن، پاکستانی قوم جئیں طرحاں اپݨیاں افواج دے شانہ بشانہ کھڑے تھی تے اتحاد دا مظاہرہ کیتا اوں طرحاں متحد رہسی، اے دلیرانہ فیصلے کرݨن  تاں جو آوݨ آلیاں نسلاں دے حق دا تحفظ یقینی بݨایا ونڄ سڳے، اساں ہݨ یا کݙائیں نئیں دی بنیاد تے ٹھوس اقدامات کریسوں۔ وزیراعظم معاشی ٹیم کوں مبارکباد ݙیندے ہوئیں آکھیے بھارت دیاں ساریاں سفارتی کوششاں ناکام تھی ڳیاں اتے عالمی مالیاتی اداریاں اساݙے قرضے منظور کیتے حالانکہ بھارت اساݙے خلاف پوری لابنگ کیتی۔