وزیر دفاع خواجہ محمد آصف نال بیلاروس دے وزیر دفاع لیفٹیننٹ جنرل وکٹر خرینن دی ملاقات

اسلام آباد۔ 5 جون (اے پی پی) وزیر دفاع خواجہ محمد آصف نال بیلاروس دے وزیر دفاع لیفٹیننٹ جنرل وکٹر خرینن ملاقات کیتی۔ ملاقات وِچ علاقائی سلامتی، دفاعی تعاون تے دفاعی پیداوار تے ٹیکنالوجی دی منتقلی وِچ سانجھے اقدامات سودھا ݙوطرفہ دلچسپی دے امور تے ڳالھ مہاڑ کیتی ڳئی ۔ وزارت دفاع توں جاری بیان موجب اے دورہ ݙوہیں دوست ملکاں وچال دفاعی سفارتکاری تے سانجھے تعاون کوں اڳوں ودھاوݨ وِچ ہک اہم قدم اے۔ ڳالھ مہاڑ دے دوران ݙوہیں فریقین علاقائی سلامتی، دفاعی تعاون تے دفاعی پیداوار تے ٹیکنالوجی دی منتقلی وِچ سانجھے اقدامات سودھا ݙوطرفہ دلچسپی دے امور تے ڳالھ مہاڑ کیتی ۔ ݙوہیں ملکاں دیاں مسلح فوجاں وچال باقاعدہ سٹریٹجک ڈائیلاگ تے تکنیکی تعاون کیتے ادارہ جاتی فریم ورک کوں ودھاوݨ تے زور ݙتا ڳئے۔ پاکستان تے بھارت وچال اڄوکی کشیدگی دے تناظر وِچ وزیر دفاع ایں ڳالھ دا اعادہ کیتا جو پاکستان امن کیتے پرعزم اے تے خاص طور تے ݙو جوہری ہتھیاراں نال لیس ریاستاں وچال کشیدگی نی چاہندا، بھارت دا حملہ غیر ذمہ دارانہ تے اشتعال انگیز ہئی تے پاکستان جواب تحمل تے ذمہ ؤاری نال ݙتا۔ بیلاروس دے وزیر دفاع پاکستان دی امن، استحکام تے سانجھے احترام دی پالیسی کیتے بیلاروس دی مکمل حمایت دا اعادہ کیتا تے علاقائی ہم آہنگی کوں برقرار رکھݨ کیتے ہک ذمہ دار قوم دے طور تے پاکستان دے کردار دی تعریف کیتی ۔ ایں موقع تے ݙوہیں ملکاں علاقائی سلامتی، دفاعی صنعت وِچ تعاون تے امن و استحکام کیتے کثیرالجہتی فورمز تے نیڑے رابطہ برقرار رکھݨ دا سانجھا عزم ظاہر کیتے۔