اقوام متحدہ وِچ پاکستان دیاں اہم تقرریاں عالمی برادری دے اعتماد تے بھروسے دیاں مظہرہن، شہباز شریف

اسلام آباد۔ 5 جون (اے پی پی) وزیراعظم محمد شہباز شریف آکھیے پاکستان دا اقوام متحدہ دی سلامتی کونسل دی قرارداد 1988 (2011) دے تحت قائم پابندیاں دی کمیٹی دا چیئرمین، قرارداد 1373 (2001) دے تحت قائم انسداد دہشت گردی کمیٹی دا نائب چیئرمین تے دستاویزات و پابندیاں متعلق غیر رسمی ورکنگ گروپ دا شریک چیئرمین مقرر تھیوݨ ماݨ دی ڳالھ اے، پاکستان اِنھاں عالمی ذمہ داریاں کوں بخوبی نبھاوݨ کیتے پرعزم اے۔ سوشل میڈیا ایکس تے اپݨی پوسٹ وِچ انہاں آکھیے یقیناً اے پاکستان کیتے ہک ٻہوں وݙے ماݨ دی ڳالھ اے جو اقوام متحدہ دی سلامتی کونسل دی قرارداد 1988 (2011) دے تحت قائم پابندیاں دی کمیٹی دی چیئرمین شپ پاکستان دے حوالے کیتی اے۔ ایندے نال نال پاکستان کوں قرارداد 1373 (2001) دے تحت قائم انسداد دہشت گردی کمیٹی دا نائب چیئرمین تے دستاویزات و پابندیاں متعلق غیررسمی ورکنگ گروپ دا شریک چیئرمین وی مقرر کیتا ڳئے۔ انہاں آکھیے اے اہم تعیناتیاں عالمی برادری دی طرفوں پاکستان تے کیتے ڳئے اعتماد تے بھروسے دا مظہر ہن، اے ایں حقیقت دا بین ثبوت ہن جو پاکستان دہشت گردی جیہے عالمی ناسور مکاوݨ کیتے جیڑھیاں قربانیاں ݙتن، انہاں کوں عالمی سطح تے تسلیم کیتا ویندا پئے ۔ وزیراعظم آکھیے پاکستان انہاں ملکاں وِچ شامل اے جنہاں دہشت گردی دے خلاف ساریاں توں ودھ قیمت چکائی اے، 90 ہزار توں ودھ قیمتی جاناں دا ضیان تے 150 ارب ڈالر توں ودھ دا معاشی خسارہ برداشت کیتے، اے او اعداد و شمار ہن جیڑھے پاکستان دیاں لازوال قربانیاں کوں ظاہر کریندن ۔ انہاں آکھیے اے اعزاز صرف پاکستان دی خارجہ پالیسی دی کامیابی نی بلکِہ انہاں لکھاں پاکستانیاں دی قربانیاں دا اعتراف وی اے جنہاں امن دے قیام کیتے اپݨیاں جاناں دا نذرانہ پیش کیتا۔ انہاں آکھیے پاکستان ہک پُرامن تے محفوظ دنیا کیتے اپݨے عزم تے قائم اے تے انہاں عالمی ذمہ واریاں کوں چنڳے طریقے نبھاوݨ کیتے پرعزم اے۔