مالی سال 26-2025 کیتے 4 ہزار ارب روپے دا قومی ترقیاتی لے آؤٹ تیار کر ڳھدا ڳئے، وفاقی وزیر احسن اقبال

اسلام آباد۔ 5 جون (اے پی پی) وفاقی وزیر منصوبہ بندی، ترقی اَتے خصوصی اقدامات پروفیسر احسن اقبال آکھیے جو موجودہ حکومت ہک وݙا سنگ میل پار کر ڳھدے، مالی سال 2025-26 کیتے 4 ہزار ارب روپے دا قومی ترقیاتی لے آؤٹ تیار کر ڳھدا ڳئے جیڑھا جو اصل وِچ 2028-29 کیتے مقرر کیتا ڳیا ہئی۔ میڈیا نال ڳالھ مہاڑ کریندے ماہانہ ترقیاتی منصوبے دی تقریب رونمائی دے موقع تے انہاں آکھیے جو چنڳی طرز حکمرانی، صوبائی ہم آہنگی وِچ ودھارا اَتے موثر ٹیکس وصولی ایں کامیابی وِچ اہم کردار ادا کیتے۔انہاں ٹیکس وصولی وِچ 29 فیصد ودھارے دی تعریف کریندے آکھیے جو ایں پاروں صوبیں دی آمدݨ وِچ ودھارا تھئے اَتے قومی ترقیاتی خرچے ودھائے ونڄ سڳدن۔ جیکر وفاقی ترقیاتی خرچے وچ معمولی گھٹکی تھئی اے لیکن صوبائی بجٹ وِچ ودھارے پاروں مجموعی قومی ترقیاتی لے آؤٹ وِچ واضح ودھارا تھئے۔ انہاں آکھیے جو قومی ترقیاتی لے آؤٹ وِچ گھٹکی نی تھئی ، بلکِہ اے ڳئے سال دی نسبت نمایاں طور تے ودھیے۔وفاقی وزیر ایں سال 4.2 فیصد جی ڈی پی گروتھ حاصل کرݨ دے عزم دا اظہار کریندے آکھیے جو پنج سالہ مدت دے مکݨ تئیں اے شرح 6 فیصد تئیں پُڄ ویسی ۔ انہاں ݙسایا جو 2029 کیتے مختلف شعبیں دی ترقیاتی شرح دے اہداف وِچ زراعت 5.1 فیصد، صنعت 7.2 فیصد اَتے خدمات دا شعبہ 6.2 فیصد شامل ہن جیندے نال ملکی جی ڈی پی 600 ارب ڈالر تئیں پُڄ ویسی اَتے فی کس آمدݨ 2,000 ڈالر تھی ویسی ۔ انہاں آکھیے جو اساݙا وݙا وژن اے ہے جو 2035 تئیں پاکستان کوں ہک کھرب ڈالر دی معیشت بݨایا ونڄے۔ جےاساں 2029 تئیں 600 ارب ڈالر تئیں پُڄ سڳدوں تاں اڳلے پنج توں ست سالاں وِچ مزید 400 ارب ڈالر دا ودھارا ممکن اے۔آوݨ آلے مالی سال کیتے حکومتی ترجیحاں دا ذکر کریندے انہاں “گورننس، جدت اَتے اصلاحات” اُتے زورݙتا تاں جو ترقی دا تسلسل برقرار رکھیا ونڄ سڳے. انہاں عوامی فنڈز دے موثر استعمال کیتے ہک نویں اینٹی کرپشن ہاٹ لائن دے اجراء دا اعلان وی کیتا۔ انہاں آکھیا جو اساکوں ہر روپے دا ودھ توں ودھ فیدہ یقینی بݨاوݨا ہوسی جیندے کیتے فضول خرچی، دوہرا پن اَتے کرپشن دا خاتمہ ضروری اے۔ہک وݙی مثبت پیش رفت دا ذکر کریندے وفاقی وزیر ݙسایا جو مئی 2025 وِچ مہانگ دی شرح گھٹ تھی تے 3.5 فیصد تے آ ڳئی اے جیڑھی جو ہک سال پہلے 11.8 فیصد ہائی۔ انہاں آکھیے جو دنیا دے کجھ ہی ملکاں اِتنے گھٹ ویلھے وِچ ڈبل ڈیجٹ مہانگ کوں ایں قدر گھٹ کیتے۔ انہاں ݙسایا جو ٻاہرلے ملک توں آوݨ آلی ترسیلات زر وِچ وی چنڳاں ودھارا تھئے جیڑھا جو ڳئے ترائے سالاں وِچ 10 ارب ڈالر ودھ تے 27 ارب توں 37 ارب ڈالر تھی ڳئی اے. انہاں اوورسیز پاکستانیاں دی حب الوطنی اَتے قربانیاں دی تعریف کیتی ۔انہاں آکھیا جو کجھ سیاسی رہنماواں دی طرفوں آئی ایم ایف معاہدے تروڑݨ یا ٻاہرلے ملک قومی ادارے بند کرن جیہے بیانات ݙتے ڳئن جیڑھے جو میں اقتصادی دہشت گردی سمجھداں، لیکن اوورسیز پاکستانیاں انہاں ڳالھیں کوں رد کریندے ترسیلات زر وِچ 10 ارب ڈالر دا ودھارا کیتا۔ ہݨے ہی ڳھدیاں ڳئیاں مالی کامیابیاں دا ذکر کریندے احسن اقبال ݙسایا جو جولائی توں اپریل دے دوران پاکستان 1.9 ارب ڈالر دا کرنٹ اکاؤنٹ سرپلس حاصل کیتے جیڑھا جو ڳئے سال ایں عرصے وِچ 1.3 ارب ڈالر دے خسارے وِچ ہئی۔ انہاں آکھیا جو منصوبہ بندی کمیشن دی چنڳی جانچ اَتے منصوبہ بندی پاروں ڳئے مہینے قومی خزانے کوں 5.4 ارب روپے دی بچت تھئی۔قومی سلامتی دے حوالے نال ڳالھ کریندے وفاقی وزیر وزیراعظم شہباز شریف دی زیر صدارت تھیوݨ آلے ہک اہم اجلاس دا حوالہ ݙتا جیندے وِچ آزاد جموں و کشمیر اَتے گلگت بلتستان دے نمائندے وی شامل ہن۔ اجلاس دا ہکو ایجنڈا بھارت دی جارحیت اَتے اشتعال انگیزی دے خلاف سانجھی قومی حکمت عملی دی تشکیل ہائی۔انہاں خبردار کیتا جو بھارت دا پاݨی کوں ہتھیار دے طور تے استعمال کرݨ عالمی معاہدیں دی خلاف ورزی اے۔ پاکستان دے پاݨی دے حقوق بھارت دا احسان نی بلکہ بین الاقوامی معاہدیں نال محفوظ ہن۔ انہاں آکھیے جو جیویں اساݙیاں فوجاں بھارت دے غرور کوں میدان جنگ وِچ تروئیے ، ایویں ہی پاکستان بھارت دی اقتصادی اَتے سیاسی دشمنی دا مقابلہ اتحاد، استقامت اَتے عالمی قوانین دی پاسداری نال کریسی۔ انہاں ݙسایا جو پاݨی دے ذخیرے اُتے جاری منصوبیں دی تکھی رفتار تکمیل کیتے ڈپٹی پرائم منسٹر دی سربراہی وِچ ہک اعلیٰ سطحی کمیٹی قائم کیتی ڳئی اے جیڑھی جو 72 گھنٹے وِچ قابل عمل سفارشاں پیش کریسی۔ عید الاضحیٰ دے بعد ہک قومی آبی کانفرنس وی منعقد کیتی ویسی جیندے وِچ ملک توں ماہرین دی صلاح گھن تے ہک جامع اَتے موثر آبی پالیسی بݨائی ویسی۔