راولپنڈی۔ 5 جون (اے پی پی) بیلاروس دی ایئر فورس اَتے ایئر ڈیفنس دے کمانڈر میجر جنرل آندرے یولیانووچ لوکیانووچ دی قیادت وِچ ہک اعلیٰ سطحی دفاعی وفد ایئر ہیڈ کوارٹرز اسلام آباد دا دورہ کیتا۔ ایں موقع تے ݙوہیں ملکاں وچال فضائی طاقت اَتے عسکری تعاون دے مختلف پہلوواں اُتے تفصیلی ڳالھ مہاڑ تھئی۔ ملاقات وِچ ݙوہیں ملکاں آپت دے تعلقات کوں مزید تکڑا بݨاوݨ دا عزم کیتا ڳئے …
بیلاروس دے اعلیٰ سطحی دفاعی وفد دا ایئر ہیڈ کوارٹرز اسلام آباد دا دورہ
مزید خبراں
راولپنڈی۔ 5 جون (اے پی پی) بیلاروس دی ایئر فورس اَتے ایئر ڈیفنس دے کمانڈر میجر جنرل آندرے یولیانووچ لوکیانووچ دی قیادت وِچ ہک اعلیٰ سطحی دفاعی وفد ایئر ہیڈ کوارٹرز اسلام آباد دا دورہ کیتا۔ ایں موقع تے ݙوہیں ملکاں وچال فضائی طاقت اَتے عسکری تعاون دے مختلف پہلوواں اُتے تفصیلی ڳالھ مہاڑ تھئی۔ ملاقات وِچ ݙوہیں ملکاں آپت دے تعلقات کوں مزید تکڑا بݨاوݨ دا عزم کیتا ڳئے تے آپݨیاں ایئر فورسز وچال نیڑے اَتے مسلسل رابطہ برقرار رکھݨ اُتے اتفاق کیتا۔آئی ایس پی آر توں جاری بیان موجب میجر جنرل آندرے یولیانووچ لوکیانووچ دے آوݨ تے پاک فضائیہ دے چاق و چوبند دستے انہاں کوں گارڈ آف آنر پیش کیتا۔ملاقات دے دوران پاک فضائیہ دے سربراہ ائیر چیف مارشل ظہیر احمد بابر سدھو ݙوہیں ملکاں وچال تکڑے عسکری تعلقات کوں دی تعریف کریندے یقین ݙیائے جو پاک فضائیہ بیلاروس ایئر فورس دی استعداد کار ودھاوݨ کیتے پائلٹس اَتے مینٹی نینس عملے دی بنیاد توں گھن تے حربی سطح دی تربیت ݙیوݨ کیتے مکمل تعاون کریسی ۔ انہاں ݙوہیں ایئر فورسز وچال تعاون کوں ودھاوݨ خاص طور تے تربیت، ٹیکنالوجی دے ودھارے اَتے آپریشنل صلاحیتاں دے شعبیں وِچ سانجھ کوں مستحکم کرݨ دے عزم دا اظہار کیتا۔ ملاقات وِچ ݙوہیں فریقین مختلف شعبیں وِچ فضائی فوجاں وچال تعاون ودھاوݨ اُتے اتفاق کیتا جیندے وِچ پیشہ ورانہ ترقی کیتے اعلیٰ سطحی تبادلہ پروگرامز دا آغاز شامل اے۔میجر جنرل آندرے یولیانووچ لوکیانووچ پاک فضائیہ دی طرفوں گرم جوش مہمان نوازی اُتے شکریہ ادا کیتا اَتے پاکستان اَتے بیلاروس وچال پراݨی یاری دے رشتے دی تعریف کیتی ۔ انہاں جنگی حالات وِچ پاک فضائیہ دے تجربے توں سکھݨ وِچ بیلاروس ایئر فورس دی گھاٹی دلچسپی دا اظہار کیتا اَتے پاک فضائیہ دی پیشہ ورانہ مہارت اَتے اوکھے آپریشنل ماحول وِچ کارکردگی دی تعریف کیتی۔ انہاں بیلاروس ایئر فورس دے عملے کیتے پاک فضائیہ دی طرفوں منظم اَتے باضابطہ تربیتی پروگرامز شروع کرݨ دی خواہش ظاہر کیتی جیڑھے جو استعداد کار اَتے آپریشنل مہارت وِچ ودھارے دا باعث بݨسن۔
