ہمیشہ علاقائی امن، استحکام کیتے کوششاں کیتن، سارے تصفیہ طلب مسائل تے ڳالھ مہاڑ کیتے تیار ہیں، وزیر اعظم

اسلام آباد ۔7 جون(اے پی پی)وزیر اعظم محمد شہباز شریف آکھیے جو پاکستان ہمیشہ علاقائی امن تے استحکام کیتے کوششاں کیتن، بھارت دی فوجی جارحیت دا فوری اتے فیصلہ کن ولدا ݙیوݨ دے علاوہ کوئی راہ کائنا ہئی، پاکستان جموں و کشمیر سودھا سارے تصفیہ طلب مسائل تے بھارت نال ڳالھ مہاڑ کوں تیار اے۔ وزیر اعظم محمد شہباز شریف گزریل ݙینھ ملائیشیا دے وزیر اعظم داتو سری انور ابراہیم کوں ٹیلی فون کیتے۔ ݙوہاں رہنماواں عید الاضحیٰ تے ہک ٻئے کوں مبارک ݙتی۔ وزیر اعظم محمد شہباز شریف ملائیشیا دی قیادت اتے عوام کوں عید الاضحیٰ دی مبارکباد ݙیندے امت مسلمہ دے اتحادا تے خوشحالی سودھا غزہ اچ امن اتے بے گناہ فلسطینیاں دے تحفظ کیتے دعا کیتی۔ محمد شہباز شریف پاکستان اتے بھارت وچال کشیدگی ویلھے ودھ حمایت اتے متوازن موقف تے ملائیشیا دا شکریہ ادا کریندے کشیدگی ڳھٹاوݨ کیتے مذاکرات تے زور ݙتے۔ انہاں آکھیا جو پاکستان ہمیشہ علاقائی امن تے استحکام کیتے کوششاں کیتن حالانکہ ساݙے کولو بے گناہ پاکستانیاں دے خلاف کیتی ڳئی بھارت دی فوجی جارحیت دا فوری اتے فیصلہ کن جواب ݙیوݨ دے علاوہ کوئی چارہ کائنا ہا کیوں جو بھارت پاکستان دی خودمختاری اتے علاقائی سالمیت دی خلاف ورزی کیتی، پاکستان علاقائی امن و سلامتی دے مفاد سانڳے امریکا اتے ٻئے دوست ملکاں دی ثالثی اچ جنگ بندی کیتے مفاہمت دی پیشکش قبول کیتی اے، پاکستان جموں و کشمیر سودھا سارے تصفیہ طلب مسائل تے بھارت نال گالھ مہاڑ کیتے تیار اے۔ ݙوہاں وزرائے اعظم پاکستان ملائیشیا تعلقات تے وی الیندے تجارت، سرمایہ کاری اتے ثقافت سودھاے کئی شعبیاں اچ ݙوطرفہ تعاون تکڑا کرݨ دا عزم دوہرائے۔