اڄوکے مالی سال جی ڈی پی دی شرح نمو 2.7 فیصد، وزیر خزانہ سینیٹر محمد اورنگزیب دا بیان

اسلام آباد (اے پی پی)وفاقی وزیر خزانہ سینیٹر محمد اورنگزیب آکھیاے جو ایں مالی سال مجموعی قومی پیداوار (جی ڈی پی) دی شرح نمو 2.7 فیصد رہی اے، ڄڈاں جو عالمی سطح تے اے شرح 2.8 فیصد اے۔ انہاں زور ݙتا جو پاکستان دی معاشی کارکردگی کوں عالمی تناظر اچ ݙیکھݨا چاہیدے۔ قومی اقتصادی سروے مالی سال 2024-25 جاری کریندے ہوئیں وزیر خزانہ آکھیا جو 2023 اچ ساݙی جی ڈی پی دی گروتھ منفی ہئی تے مہنگائی 29 فیصد توں ودھ چکی ہئی۔ وزیر خزانہ دا آکھݨ ہا جو ایں ویلھے مہنگائی اچ ودھارے دی شرح 4.6 فیصد اے اتے پالیسی ریٹ اچ وی بتدریج کمی کیتی گئی اے۔ انہاں آکھیا جو پاکستان معاشی استحکام دی شاہراہ تے گامزن اے اتے ملک اچ افراط زر دی شرح 4.6 فیصد اے۔ انہاں ݙسایا جو 2023 اچ ملک کولو ݙو ہفتیاں کیتے زرمبادلہ ہئی، جیںدے بعد معاشی بحالی تھئی جیں دے نتائج ساریاں دے سامݨے ہن۔ وزیر خزانہ نگران حکومت دے چنگے اقدامات دی تعریف کیتی اتے آکھیا جو پالیسی ریٹ 22 فیصد توں گھٹ کر تے 11 فیصد کر ݙتا ڳیا اے، اتے آئی ایم ایف پروگرام نال ساݙا اعتماد بحال تھئے۔