پی ایس ڈی پی دے تحت 4224 ارب روپے دا مجموعی قومی ترقیاتی حجم مختص، وفاقی حکومت 1000 ارب روپے دی شراکت دار، صوبائی سالانہ ترقیاتی پروگرامز دے تحت 2869 ارب روپے اَتے ریاستی ملکیتی اداریں دا 355 ارب روپے دا ترقیاتی بجٹ شامل

اسلام آباد۔ 10 جون (اے پی پی) آندے مالی سال 26-2025 دے بجٹ وچ سرکاری شعبہ دے ترقیاتی پروگرام (پی ایس ڈی پی) دے تحت مجموعی طور تے قومی ترقیاتی حجم 4224 ارب روپے ہوسی جئیں وچ وفاقی حکومت 1000 ارب روپے دی شراکت دار اے جݙاں جو صوبائی سالانہ ترقیاتی پروگرامز دے تحت 2869 ارب روپے اَتے ریاست دے ملکیتی مختلف اداریں دا 355 ارب روپے دا ترقیاتی بجٹ وی شامل اے۔ جاری پی ایس ڈی پی موجب ترقیاتی بجٹ مجموعی بجٹ دے 5.8 فیصد جݙاں جو مجموعی قومی پیداوار (جی ڈی پی) دے 0.6 فیصد دے مساوی اے۔ اڑان پاکستان پروگرام دے تحت حکومت مختلف ترقیاتی منصوبیں کوں ترجیح وچ شامل کیتے جنہاں دی وختی تکمیل کوں یقینی بݨایا ویسی۔ کجھ مالیاتی مسئلیں دے باوجود وفاق قومی اہمیت دے اہم منصوبیں دی وختی تکمیل کیتے کوشاں اے۔ ترجیحی منصوبہ جات وچ کوئٹہ کراچی شاہراہ این 25، سکھر حیدرآباد موٹروے ایم 6، داسو ہائیڈرو پاور پراجیکٹ، دیامر اَتے مہمند ݙیمز، کراچی وچ پاݨی ݙیوݨ دا منصوبہ کے-IV، علامہ اقبال انڈسٹریل سٹی وچ توانائی ݙیوݨ، کراچی اَتے اسلام آباد وچ آئی ٹی پارکس دا قیام، سندھ وچ چھل توں تباہ شدہ سکولاں اَتے گھراں دی تعمیر و بحالی، بلوچستان وچ بعد از چھل 2022 دے بحالی دے اقدامات، تھرکول ریل رابطیں دا قیام، اسلام آباد وچ کینسر ہسپتال دی تعمیر سودھے ہیپاٹائٹس سی اَتے ذیابیطس دے علاج معالجے دے حوالے نال وزیراعظم دے قومی پروگرامز سودھے ݙوجھے اہم منصوبے وی شامل ہن۔ پی ایس ڈی پی موجب اڄوکے مالی سال کیتے پی ایس ڈی پی دا حجم 36 لکھ 79 ہزار 839 ملین روپے رکھئے ڳئن جݙاں جو آندے مالی سال کیتے 42 لکھ 23 ہزار 817 ملین روپے (تقریباً 4224 ارب روپے) دا ترقیاتی بجٹ مختص کیتا ڳئے جیں وچ سرمایہ کاری بورڈ دے مختلف منصوبیاں کیتے 1105.430 ملین روپے، کیبنٹ ݙویژن دے منصوبیاں کیتے 76386.280 ملین روپے، موسمیاتی تبدیلی اَتے ماحولیاتی ݙویژن کیتے 2783.650 ملین روپے، کامرس ݙویژن کیتے 50 ملین روپے، مواصلات ݙویژن (ماسوائے این ایچ اے) 149.150 ملین روپے، ݙیفنس ݙویژن کیتے 11553.835 ملین روپے جݙاں جو ݙیفنس پروڈکشن ݙویژن کیتے 1786 ملین روپے اَتے اسٹیبلشمنٹ ݙویژن دے مختلف منصوبیں کیتے 495.359 ملین روپے رکھئے ڳئن۔ پی ایس ڈی پی موجب وفاقی وزیر تعلیم و پیشہ ورانہ تربیت کیتے 18580 ملین روپے، فنانس ݙویژن دے مختلف منصوبیں کیتے 851.580 ملین روپے، صوبیں اَتے خصوصی علاقہ جات کیتے 253230.109 ملین روپے جݙاں جو صوبائی منصوبہ جات کیتے 107785.780 ملین روپے، خیبر پختونخوا دے ضم شدہ ضلعیاں کیتے 65444.329 ملین روپے اَتے آزاد جموں و کشمیر اَتے گلگت بلتستان دے مخصوص علاقیں کیتے 82000 ہزار ملین روپے مختص کیتے ڳئن۔ ایویں ہی ہائیر ایجوکیشن کمیشن دے مختلف ترقیاتی منصوبہ جات کیتے 39488.216 ملین روپے، ہاؤسنگ اینڈ ورکس ݙویژن کیتے 15005.801 ملین روپے، انسانی حقوق ݙویژن کیتے 23 ملین روپے، صنعت و پیداوار ݙویژن کیتے 1904.281 ملین روپے، اطلاعات و نشریات ݙویژن کیتے 6026.977 ملین روپے جݙاں جو انفارمیشن ٹیکنالوجی و ٹیلی کمیونیکیشن ݙویژن کیتے 16227.493 ملین روپے اَتے بین الصوبائی رابطہ ݙویژن کیتے 1179.840 ملین روپے دا ترقیاتی بجٹ رکھیا ڳئے۔ پی ایس ڈی پی دے اعدادوشمار موجب داخلہ ݙویژن دے مختلف ترقیاتی منصوبہ جات کیتے 12908.444 ملین روپے، امور کشمیر و گلگت بلتستان اَتے سیفران ݙویژن کیتے 1800 ملین روپے، قانون و انصاف ݙویژن کیتے 1912.481 ملین روپے، بحری امور ݙویژن کیتے 3465 ملین روپے، قومی غذائی تحفظ و تحقیق ݙویژن کیتے 4253.738 ملین روپے، نیشنل ہیلتھ سروسز، ریگولیشن و کوآرڈینیشن ݙویژن کیتے 14343.500 ملین روپے، قومی ورثہ اَتے ثقافت ݙویژن کیتے 1676.074 ملین روپے، پاکستان ایٹمی توانائی کمیشن 761 ملین روپے، پارلیمانی امور ݙویژن کیتے 2500 ملین، پٹرولیم ݙویژن کیتے 718.580 ملین روپے اَتے منصوبہ بندی، ترقی و خصوصی اقدامات ݙویژن کیتے مجموعی طور تے 2095.141 ملین روپے اَتے خصوصی اقدامات وغیرہ کیتے انڄ توں 21175 ملین روپے دا ترقیاتی بجٹ مختص کیتا ڳئے ۔ ایں توں انڄ ریلوے ݙویژن کیتے آندے مالی سال کیتے پی ایس ڈی پی دے تحت 22415 ملین روپے، مذہبی امور و بین المذاہب ہم آہنگی ݙویژن کیتے 650.384 ملین روپے، ریونیو ݙویژن کیتے 7150 ملین روپے، سائنس و ٹیکنالوجیکل ݙویژن کیتے 4792.687 ملین روپے، ایس آئی ایف سی ݙویژن کیتے 503.382 ملین روپے جݙاں جو سپارکو کیتے 5418.523 ملین روپے اَتے آبی وسائل ݙویژن کیتے 133424.433 ملین روپے دے ترقیاتی فنڈز مختص کیتے ڳئن۔ واضح رہے جو آندے مالی سال کیتے پی ایس ڈی پی دے تحت نیشنل ہائی وے اتھارٹی (این ایچ اے) کیتے 226981.850 ملین روپے اَتے توانائی ݙویژن (این ٹی ݙی سی /پیپکو) کیتے 90225.783 ملین روپے دا ترقیاتی بجٹ مختص کیتا ڳئے ۔ تفصیل  موجب ریاست دے ملکیتی اداریں (ایس او ایز) کیتے 354817 ملین روپے رکھئے ڳئن۔ آندے مالی سال 26-2025 کیتے پی ایس ڈی پی وچ سالانہ ترقیاتی پروگرامز دے تحت صوبیں دا حصہ 2869000 ملین روپے ہوسی۔ سرکاری شعبہ دے ترقیاتی پروگرام وچ وفاق دا حصہ 1000 ارب روپے جݙاں جو سالانہ ترقیاتی پروگرامز دے تحت صوبیں دا حصہ 2869 ارب روپے اَتے ایس او ایز دا حصہ 355 ارب روپے ہوسی۔