انفارمیشن ٹیکنالوجی و ٹیلی کمیونیکیشن ݙویژن دے جاری اَتے نویں منصوبیاں کیتے 16227.493 ملین روپے رکھئے ڳئن

اسلام آباد۔ 10 جون(اے پی پی)وفاقی حکومت سرکاری شعبہ دے سالانہ ترقیاتی پروگرام (پی ایس ڈی پی) دے تحت آندے مالی سال 2025-26 دے دوران انفارمیشن ٹیکنالوجی و ٹیلی کمیونیکیشن ݙویژن دے جاری اَتے نویں منصوبیاں کیتے 16227.493 ملین روپے دے فنڈز رکھین۔ منگل کوں جاری پی ایس ڈی پی دے اعدادوشمار دے مطابق انفارمیشن ٹیکنالوجی و ٹیلی کمیونیکیشن ݙویژن دیاں جاری سکیماں اچ کراچی اچ آئی ٹی پارک دی تعمیر کیتے 6000 ملین روپے، اسلام آباد اچ ٹیکنالوجی پارک ڈویلپمنٹ منصوبے کیتے 4908 ملین روپے، ڈیجیٹل اکانومی ان کیمپمنٹ منصوبے کیتے 1972 ملین روپے، آزاد جموں کشمیر و گلگت بلتستان وچ سیلولر سروس دی توسیع کیتے 500 ملین روپے اَتے وزیراعظم سٹارٹ اپس پروگرام کیتے 500 ملین روپے سودھا مجموعی طور تے15777.493 ملین روپے دے فنڈز مختص کیتے ہن۔ وزارت انفارمیشن ٹیکنالوجی و ٹیلی کمیونیکیشن دے نویں منصوبیاں اچ سمارٹ اسلام آباد اقدام کیتے 200 ملین روپے، قومی مصنوعی ذہانت توسیع پروگرام کیتے 100 ملین روپے اَتے آئی ٹی برآمدات وچ فروغ سمیت ݙوجھے اقدامات کیتے 100 ملین روپے دے منصوبیاں کیتے مجموعی طور تے 450 ملین روپے مختص کیتے ڳئن۔