حکومت آندے مالی سال دے بجٹ اچ معیشت دی بہتری کوں ترجیح قرار ݙتے،وزیر خزانہ سینیٹر محمد اورنگزیب

اسلام آباد۔ 10 جون (اے پی پی) حکومت آندے مالی سال 2025-26 دے بجٹ وچ معیشت دی بہتری کیتے ترجیحی بنیاداں تے اقدامات چاتن۔ بجٹ تقریر اچ وزیر خزانہ سینیٹر محمد اورنگزیب آکھیے جو حکومت گزریل سال وی معیشت دی بحالی، مالی نظم و ضبط، اَتے استحکام کیتے کئی اہم اقدامات کیتے، جنہاں دے حوصلہ افزا نتیجے سامݨے آئے۔وزیر خزانہ موجب جی ڈی پی دے 2.4 فیصد دے برابر پرائمری سرپلس حاصل کیتا ڳئے، جیڑھا مالیاتی نظم و ضبط دی علامت اے۔ انہاں آکھیے جو افراط زر وچ نمایاں کمی تھئی اے، جیڑھی مئی 2024 وچ گھٹ تھی تے 4.7 فیصد رہ ڳئی، جݙاں جو ݙو سال پہلے اے شرح 29.2 فیصد تئیں پڄ ڳئی ہئی۔ روپے دی قدر وچ استحکام آیا ، جیڑھا ٻاہرلے قرضیں اَتے درآمدی ٻلاں تے دٻاؤ گھٹ کرݨ وچ مددگاررہیا۔ ترسیلات زر وچ موجودہ مالی سال دے پہلے ݙاہ مہینے دے دوران 31 فیصد وادھا ریکارڈ کیتا ڳئے، جیں دی مالیت 31.2 ارب ڈالر تئیں پڄ ڳئی۔ حکومت کوں توقع اے جو سال دے مکݨ تئیں ترسیلات زر 38 ارب ڈالر تئیں پڄ ویسن۔ انہاں آکھیے جو اسٹیٹ بینک دے زرمبادلہ دے ذخیرے وچ ݙو ارب ڈالر دا وادھا تھی چُکئے، اَتے اے ذخیرے سال دے مکݨ تئیں 14 ارب ڈالر تئیں پڄݨ دی امید اے۔ حکومت دا آکھݨ اے جو آندے مالی سال وچ انہاں پالیسیاں کوں مزید تقویت ݙتی ویسی تاں جو اقتصادی بحالی دا عمل مستحکم بنیاداں تے جاری رکھیا ونڄ سڳے۔