حکومت ایف بی آر سودھے مختلف اداریں اچ اصلاحات دا آغاز کیتے، سینیٹر محمد اورنگزیب

اسلام آباد۔ 10 جون (اے پی پی) وفاقی وزیر خزانہ سینیٹر محمد اورنگزیب آکھیے جو حکومت ایف بی آر سودھے مختلف اداریں وچ اصلاحات دا آغاز کیتے۔ آندے مالی سال 26-2025 دا وفاقی بجٹ پیش کریندے انہاں آکھیا جو وزیراعظم دی قیادت وچ مختصر عرصے وچ حکومت مختلف شعبہ جات وچ اہم کامیابیاں ڳھدن جنہاں وچ ایف بی آر دیاں اصلاحات شامل ہن۔انہاں آکھیا جو ساݙا ساریں توں اہم معاشی مسئلہ محصولات دے نظام دیاں خامیاں ہن، ایف بی آر کوں ٹرانسفارم کیتے بغیر معیشت کوں مستحکم کرݨ اَتے قومی اہداف حاصل کرݨ ممکن نہ ہئی ایں کیتے وزیراعظم دی سربراہی وچ ایف بی آر ٹرانسفارمیشن پلان دا آغاز کیتا ڳیا جیں وچ وزیراعظم دی زیر نگرانی تفصیلی مشاورت نال منصوبہ تیار کیتا ڳیا جیں دی ستمبر 2024ء وچ منظوری ݙتی ڳئی۔ ایں منصوبے دی بنیاد ترائے ستون پیپل، پراسیس اَتے ٹیکنالوجی تے رکھی ڳئی اے۔ وزیر خزانہ آکھیے جو ایں منصوبے دا محور ڈیجیٹل ٹرانسفارمیشن اے۔ پاکستان وچ پہلی واری ایں دا آغاز کیتا ڳئے۔ ایں منصوبے دے تحت ڈیجیٹل پروڈکشن ٹریکنگ دا آغاز کیتا ڳئے جیں کوں ہݨ سیمٹ، مشروبات، کھاد اَتے ٹیکسٹائل تئیں توسیع ݙتی ویندی پئی اے، ملک گیر سطح تے ای-انوائسنگ دا اجراء اَتے جدید ٹیکنالوجی گھن آوݨ دے مینڈیٹ دے نال پی آر اے ایل بورڈ دی تشکیل نو تھی چُکی اے۔