حکومت وعدیں موجب وفاقی بجٹ وچ سرکاری ملازمین، پنشنرز تے تنخواہ دار طبقے کوں ریلیف ڈیوݨ کیتے تنخواہواں تے پنشن وچ ودھارے سودھے کئی اقدامات کیتن، وفاقی وزیر خزانہ

اسلام آباد۔ 10 جون (اے پی پی) حکومت وعدیں موجب آندے مالی سال دے وفاقی بجٹ وچ سرکاری ملازمین، پنشنرز تے تنخواہ دار طبقے کوں ریلیف ڈیوݨ کیتے تنخواہواں تے پنشن وچ ودھارے سودھے کئی اقدامات کیتن۔ سرکاری ملازمین دیاں تنخواہواں وچ 10 فیصد جݙاں جو پنشن وچ 7 فیصد ودھارا کر ݙتا ڳئے۔ تنخواہ دار طبقے کیتے ٹیکساں دی شرح گھٹ کرݙتی ڳئی اے۔ وزیر خزانہ سینیٹر محمد اورنگزیب قومی اسمبلی وچ بجٹ تقریراچ  ݙسایا جو تنخواہ دار طبقے کیتے ٹیکس وچ کمی دے نال نال حکومت اپݨی مالی مشکلات دے باوجود سرکاری ملازمین کیتے ریلیف اقدامات دا فیصلہ کیتے تے ایں سلسلے وچ گریڈ ہک توں 22 دے سارے ملازمین دی تنخواہ وچ 10 فیصد، ریٹائرڈ ملازمین دی پنشن وچ 7 فیصد ودھارے دی تجویز اے۔ معذور ملازمین کیتے خصوصی کنونس الاؤنس کوں 4 ہزار توں ودھا کر 6 ہزار مہینہ کیتا ویندا پئے۔ آئین پاکستان وچ مساوی حقوق متعلق ݙتی ڳئی شق تے عمل درآمد کریندے تنخواہواں وچ موجود تفاوت کوں ختم کیتا ویندا پئے اتے اہل ملازمین کوں 30 فیصد دی شرح نال ڈسپیرٹی ریڈکشن الاؤنس ڈیوݨ دی تجویز اے۔ انہاں آکھیے جو ملک وچ سکیورٹی دی صورتحال خطرے توں ݙوچار اے تے مسلح افواج سرحداں دے تحفظ کیتے قابل تحسین خدمات انجام ݙتن ۔ انہاں خدمات دے اعتراف وچ مسلح افواج دے افسراں اتے سولجرز/جے سی اوز کیتے سپیشل ریلیف الاؤنس ڈیوݨ دی تجویز اے، اے خرچے دفاعی بجٹ توں پورے کیتے ویسن۔وزیر خزانہ آکھیا جو انکم ٹیکس وچ سَاریں توں پہلے اساں اوں جاہ تے ریلیف ݙیندے پیوں جتھاں ایں دی ساریں توں ودھ لوڑھ اے، وزیراعظم دی ہمیشہ توں اے کوشش رہی اے جو تنخواہ دار طبقے تے ٹیکساں دے ٻوجھ کوں گھٹ توں گھٹ کیتا ونڄے۔ ایں حوالے نال تنخواہ دار لوکاں کیتے آمدݨ دے سارے سلیباں وچ انکم ٹیکس دی شرح وچ نمایاں کمی دی تجویز اے۔ اے ریلیف نہ صرف ٹیکس دے ڈھانچے کوں سوکھا بݨیسی بلکہ متوسط آمدنی آلیں تے عائد ٹیکس دے ٻوجھ کوں گھٹ کریندے ، افراط زر تے ٹیک ہوم تنخواہ وچال توازن کوں یقینی بݨیسی۔ چھی لکھ روپے توں 12لکھ روپے تئیں تنخواہ گھنݨ آلیں کیتے ٹیکس دی شرح 5 فیصد توں گھٹ کر تے صرف 2.5 فیصد کر ݙتی ڳئی اے۔ بارھاں لکھ آمدنی آلے تنخواہ دار تے ٹیکس دی رقم کوں 30,000 توں گھٹ کر تے 6,000 کر ݙیوݨ دی تجویز اے۔ جیڑھے لوک 22 لکھ روپے تئیں تنخواہ گھندن انہاں کیتے گھٹ توں گھٹ ٹیکس دی شرح 15 فیصد دی بجائے 11 فیصد کرݨ دی تجویز اے۔ ایویں ودھ تنخواہواں گھنݨ آلیں کیتے وی ٹیکس دی شرح وچ گھٹکی دی تجویز ݙتی ویندی پئی اے۔