حکومتی اقدامات دے تحت 10 وزارتاں دی رائٹ سائزنگ دی منظوری ݙے ݙتی ڳئی اے، سینیٹر محمد اورنگزیب

اسلام آباد۔ 10 جون (اے پی پی) وفاقی وزیر خزانہ سینیٹر محمد اورنگزیب آکھیے جو رائٹ سائزنگ دے حکومتی اقدامات دے تحت 10 وزارتاں دی رائٹ سائزنگ دی منظوری ݙے ݙتی ڳئی اے، تقریباً 40 ہزار خالی آسامیاں کوں ختم کر ݙتا ڳئے۔ قومی اسمبلی وچ آندے مالی سال 2025-26 دا وفاقی بجٹ پیش کریندے انہاں وفاقی حکومت دی رائٹ سائزنگ تے روشنی پیندے آکھیے جو اساں وفاقی حکومت دی ادارہ جاتی تشکیل کوں وزیراعظم دے وژن موجب درست، منتظم اتے جدید بݨاوݨ دے اقدام دا آغاز کیتے۔ اے اہم اتے بنیادی اصلاحات ایں اصول تے مبنی ہن جیڑھی حکومت عوامی سہولتاں ݙیوݨ کیتے ٹیکس دہندگان تے گھٹ توں گھٹ ٻوجھ پاوے۔ وزیر خزانہ آکھیے جو جدید آئیڈیاز کیتے سازگار ماحول پیدا کرݨ کیتے اساں چاہندوں جو حکومت کاروباری معاملات وچ حصہ نہ گھنے، نجی شعبہ ایں سلسلے وچ لیڈ کرے۔ ہݨ تئیں کابینہ ݙاہ وزارتاں دی رائٹ سائزنگ دے منصوبیں دی منظوری ݙے ݙتی اے جیڑھے عمل درآمد دے مرحلے وچ ہن، چھی ڈویژن ضم کرتے ترائے بݨا ݙتے ڳئن۔ 45 کمپنیاں کوں پرائیویٹائز، ضم یا بند کیتا ویندا پئے۔ تقریباً چالھی ہزار خالی آسامیاں کوں ختم کر ݙتا ڳئے۔ اڳلیاں ݙاہ وزارتاں کیتے رائٹ سائزنگ دیاں سفارشات کوں حتمی شکل ݙے ݙتی ڳئی اے جݙاں جو مزید اٹھ وزارتاں دے حوالے نال تجویزاں زیر غور ہن۔