باکو اچ ’’زباناں وچال پل‘‘ دے عنوان نال ادبی تقریب دا انعقاد، پاکستانی تے آذربائیجانی ادب دے تراجم پیش

باکو۔3 اکتوبر(اے پی پی) سفارتخانہ پاکستان باکو دے اہتمام نال، آذربائیجان یونیورسٹی آف لینگویجز دے پاکستانی زبان و ثقافت مرکز دے تعاون نال ’’زباناں وچال پل: آذربائیجانی–اردو ادبی تراجم دی رونمائی‘‘ دے عنوان نال ہک خصوصی ادبی تقریب منعقد تھئی۔ تقریب اچ پاکستانی موٹیویشنل سپیکر تے مصنف قاسم علی شاہ دی معروف کتاب ’’منزل کی طرف‘‘ دے آذربائیجانی ترجمے جݙاں جو آذربائیجانی ماہرِ تعلیم، دانشور تے آذربائیجان یونیورسٹی آف لینگویجز دے ریکٹر پروفیسر کمال عبداللہ دی معروف تصنیف ’’وادیِ طلسم‘‘ دے اردو ترجمے دی رونمائی کیتی ڳئی۔پاکستانی سفارتخانے توں جاری بیان موجب اے تراجم پاکستان تے آذربائیجان وچال ودھدے ادبی، علمی تے ثقافتی رابطے تے ݙوہیں ملکاں دے عوام وچال گھاٹے تعلقات کوں ظاہر کریندن۔ تقریب دا افتتاح پاکستان دی وزیرِ مملکت وفاقی تعلیم و پیشہ ورانہ تربیت وجیہہ قمر کیتا۔ ایں موقع تے آذربائیجان دی پارلیمنٹ (ملی مجلس) دے ارکان تمّام جعفرووا تے رضوان نبی یوف پاکستان تے آذربائیجان وچال تاریخی، بھرپی آلے تے دوستانہ تعلقات دی تعریف کیتی تے ݙوہیں ملکاں وچال عوامی تے ثقافتی رابطے کوں مزید ودھارا ݙیوݨ دی اہمیت تے زور ݙتا۔تقریب اچ دوران ورجینیا مورگن حیات دے پاسوں پاکستان دے متنوع ثقافتی ورثے، تاریخی جاہواں، قدرتی حسن تے دلکش مناظر تے مشتمل ہک خصوصی فوٹوگرافی نمائش وی پیش کیتی ڳئی۔ ورجینیا پاکستان اچ اپݨے تجربات تے تاثرات وی شرکاء دے نال شیئر کیتے۔ ایں موقع تے پاکستان دے ثقافتی تنوع تے خوبصورتی کوں اجاگر کرݨ آلی دستاویزی فلم ’’سلام پاکستان‘‘ وی پیش کیتی ڳئی، جینکوں شرکاء بھرپور دلچسپی نال ڈٹھا۔تقریب دے شرکاء کوں پاکستانی ثقافت دا ہک ٻیا سوہݨا رنگ پاکستانی کھاݨیں تے روایتی مٹھائیاں دی صورت اچ ݙیکھݨ کوں ملیا جنہاں توں مہماناں لطف چاتا۔ تقریب اچ آذربائیجان دی پارلیمنٹ دے ارکان، ماہرینِ تعلیم، دانشوراں، ادیباں، طلبہ، میڈیا نمائندیں تے مختلف شعبہ ہائے زندگی نال تعلق رکھݨ آلی نمایاں شخصیات شرکت کیتی۔تقریب دے اختتام تے ایں ڳالھ تے زور ݙتا ڳیا جو ادبی تے ثقافتی تبادلے پاکستان تے آذربائیجان وچال پراݨی دوستی، سانجھی افہام و تفہیم تے عوامی سطح تے تکڑے رابطے دے ودھارے اچ اہم کردار ادا کریندن ۔ ݙوہیں ملکاں دے ادب دے تراجم ہک ٻئے دی زبان، ثقافت تے فکری ورثے کوں سمجھݨ کیتے ہک موثر ذریعہ ثابت تھیندے پئن۔