گوادر پورٹ خطے دا ہک اہم تجارتی گیٹ وے بنڑدا پئے، افغان ٹرانزٹ ٹریڈ دا ݙوجھا جہاز گوادر پورٹ تے کامیابی نال پُڄ ڳئے، وفاقی وزیر بحری امور محمد جنید انوار چوہدری

اسلام آباد۔ 14 جون (اے پی پی) وفاقی وزیر بحری امور محمد جنید انوار چوہدری آکھیے جو گوادر پورٹ خطے دا ہک اہم تجارتی گیٹ وے بنڑدا پئے۔ افغان ٹرانزٹ ٹریڈ دا ݙوجھا جہاز گوادر پورٹ تے کامیابی نال پُڄ چُکئے، گوادر توں ٹرانزٹ دے خرچے اچ کمی متوقع اے۔ وزارت بحری امور توں جاری بیان موجب وفاقی وزیر آکھیے جو افغان ٹرانزٹ ٹریڈ دا ݙوجھا جہاز گوادر پورٹ تے کامیابی نال پُڄ ڳئے ، 20 ہزار ٹن ڈی اے پی کھاد گھن تے افغان بحری جہاز گوادر بندرگاہ تے لنگر انداز تھئے۔ گوادر تے افغان جہاز دے کامیاب طریقے نال آوݨ تے عالمی اعتماد ودھئے ۔ جنید انوار چوہدری آکھیے جو گوادر پورٹ ہݨ خطے کیتے ہک اہم تجارتی گیٹ وے بنڑدا پئے ، گوادر دے ذریعے افغانستان دی بین الاقوامی منڈیاں تئیں رسائی مزید بہتر تھیسی، گوادر پورٹ تے تجارتی سرگرمیاں وچ مسلسل ودھارا تھیندا پئے۔ وفاقی وزیر آکھیے جو گوادر بندرگاہ مکمل طور تے تجارتی سامان سنبھالݨ دی صلاحیت رکھیندی اے۔ جنید انوار چوہدری مزید آکھیے جو پاکستان اتے افغانستان وچال تجارت دے تعلقات تکڑے تھیندے پئن۔ انہاں آکھیے جو گوادر توں ٹرانزٹ دے خرچے گھٹݨ دی امید اے ۔ انہاں آکھیے گوادر پورٹ خطے دی تجارت دا مرکز بݨدی پئی اے۔ جنید انوار چوہدری آکھیے فروری دے بعد افغان ٹرانزٹ ٹریڈ دے تحت ݙوجھا جہاز گوادر پُڄے، گوادر دی پیش رفت پاکستان دیاں کامیاب بحری پالیسیاں دا ثبوت اے۔