18 توں 21 جون وچال ملک دے بہوں سارے میدانی علاقیاں وچ موسم شدید گرم رہسی، عوام احتیاط کرے، محکمہ موسمیات

اسلام آباد۔ 17 جون (اے پی پی) محکمہ موسمیات خبردار کریندیں ہوئیں آکھیا جو کل بدھ توں 21 جون وچال ملک دے بہوں سارے میدانی علاقیاں وچ موسم شدید گرم رہسی، عوام الناس خاص کر بالاں، تریمتاں اتے بڈھے شہریاں کوں احتیاطی تدابیر اختیار کرݨ دا مشورہ ݙتا ویندے جو ڈینھ وچال خاص طور تے 11 توں 04 وجے تئیں دھپ وچ گھٹ توں گھٹ نکلن اتے پاݨی دا ودھ استعمال کرن۔ محکمہ موسمیات موجب کل (بدھ کوں) ملک دے بہوں سارے علاقیاں وچ موسم گرم اتے خشک جڈاں جو میدانی علاقیاں وچ ڈینھ ویلھے شدید گرم رہسی تاں جو کشمیر اتے لاگلے پہاڑی علاقیاں وچ کجھ جہیں تے ڳاڄ کھمݨ نال مینھ دا امکان اے۔ گزریل 24 گھنٹیاں اچ ملک دے بہوں سارے علاقیاں وچ موسم گرم اتے خشک جڈاں جو میدانی علاقیاں وچ شدید گرم رہیا تاں جو جنوب مشرقی سندھ، شمال مشرقی بلوچستان، کشمیر، اتلی خیبرپختونخوا اتے گلگت بلتستان وچ کجھ جہیں تے ڳاڄ کھمݨ نال مینھ وسیا۔ ساریاں توں ودھ مینھ سندھ: تھرپارکر (نگرپارکر 30، مٹھی 27، اسلام کوٹ 14، ڈیپلو 06)، کشمیر: گڑھی دوپٹہ 09، مظفر آباد (ایئرپورٹ 06، سٹی 03)، بلوچستان: ژوب 04، بارکھان 02، گلگت بلتستان: سکردو، بگروٹ 01 اتے خیبر پختونخوا: بالاکوٹ وچ 01 ملی میٹر مینھ ریکارڈ کیتا گیا۔ منگل کوں ریکارڈ کیتے گئے ودھ توں ودھ درجہ حرارت: جیکب آباد، موہنجوداڑو 46، تربت، نوکنڈی اتے دادو وچ 45 ڈگری سینٹی گریڈ ریکارڈ کیتا گیا۔