راولپنڈی۔ 19 جون (اے پی پی) چیف آف آرمی سٹاف فیلڈ مارشل سید عاصم منیر اَتے امریکا دے صدر ڈونلڈ ٹرمپ پاکستان اَتے امریکا وچال انسداد دہشت گردی دے شعبے اچ آپسی تعاون کوں ٻیا ودھاوݨ دے عزم دا اعادہ کیتا اے۔ انہاں تجارت، اقتصادی ترقی، معدنیات، مصنوعی ذہانت، توانائی، کرپٹو کرنسی اَتے ابھردیاں ہوئیاں ٹیکنالوجیز سودھے مختلف شعبہ جات اچ ݙو پاسہ تعاون کوں ودھاوݨ دے امکانات تے وی …
چیف آف آرمی سٹاف فیلڈ مارشل سید عاصم منیر اَتے امریکا دے صدر ڈونلڈ ٹرمپ ݙوہیں ملکاں وچال انسداد دہشت گردی دے شعبے اچ تعاون کوں ودھاوݨ دے عزم دا اعادہ کیتا، آئی ایس پی آر
راولپنڈی۔ 19 جون (اے پی پی) چیف آف آرمی سٹاف فیلڈ مارشل سید عاصم منیر اَتے امریکا دے صدر ڈونلڈ ٹرمپ پاکستان اَتے امریکا وچال انسداد دہشت گردی دے شعبے اچ آپسی تعاون کوں ٻیا ودھاوݨ دے عزم دا اعادہ کیتا اے۔ انہاں تجارت، اقتصادی ترقی، معدنیات، مصنوعی ذہانت، توانائی، کرپٹو کرنسی اَتے ابھردیاں ہوئیاں ٹیکنالوجیز سودھے مختلف شعبہ جات اچ ݙو پاسہ تعاون کوں ودھاوݨ دے امکانات تے وی تفصیلی ڳالھ مہاڑ کیتی اے جیکوں صدر ڈونلڈ ٹرمپ پاکستان دے نال آپسی مفادات اَتے ہم آہنگی تے مبنی طویل المدتی سٹریٹجک شراکت داری قائم کرݨ اچ ڳھاٹی دلچسپی دا اظہار کیتے۔ خمیس کوں آئی ایس پی آر توں جاری بیان موجب چیف آف آرمی سٹاف فیلڈ مارشل سید عاصم منیر وائٹ ہاؤس اچ امریکا دے صدر ڈونلڈ ٹرمپ نال اہم ملاقات کیتی۔ اے اعلیٰ سطحی ملاقات کابینہ روم اچ ݙوپہر دے کھاݨے تے تھئی جئیں دے بعد ݙوہیں رہنماواں اوول آفس دا دورہ کیتا۔ امریکی صدر ڈونلڈ ٹرمپ دے رَلے سیکریٹری آف سٹیٹ سینیٹر مارکو روبیو اَتے مشرقِ وسطیٰ کیتے امریکا دے خصوصی نمائندے سٹیو وٹکوف وی موجود ہن۔ فیلڈ مارشل عاصم منیر دے نال پاکستان دے قومی سلامتی دے مشیر شریک ملاقات ہن۔ ملاقات اچ آرمی چیف اڄوکے علاقائی بحران اچ پاکستان اَتے بھارت وچال جنگ بندی اچ صدر ڈونلڈ ٹرمپ دے تعمیری اَتے نتیجہ خیز کردار تے انہاں کوں حکومتِ پاکستان اَتے پاکستانی عوام ولوں سراہیا۔ انہاں صدر ڈونلڈ ٹرمپ دی قیادت کوں سراہندیں ہوئیں آکھیا جو او عالمی چیلنجز کوں سمجھݨ اَتے انہاں دے حل کیتے بصیرت افروز فیصلے کرݨ دی غیر معمولی صلاحیت رکھیندن۔ صدر ڈونلڈ ٹرمپ وی پاکستان دی علاقائی امن تے استحکام کیتے کوششاں کوں سراہیا اَتے ݙوہیں ملکاں وچال انسداد دہشت گردی دے شعبے اچ جاری تعاون کوں خوش آئند قرار ݙتا۔ فریقین انسداد دہشت گردی دے میدان اچ آپسی تعاون کوں ٻیا ودھاوݨ دے عزم دا اعادہ کیتا۔ ملاقات اچ تجارت، اقتصادی ترقی، معدنیات، مصنوعی ذہانت، توانائی، کرپٹو کرنسی اَتے نویاں ٹیکنالوجیز سودھے مختلف شعبہ جات اچ ݙو پاسہ تعاون کوں ودھاوݨ دے امکانات تے وی تفصیل نال ڳالھ مہاڑ کیتی ڳئی۔ امریکی صدر ڈونلڈ ٹرمپ پاکستان دے نال ہک طویل المدتی اسٹریٹجک شراکت داری قائم کرݨ اچ گہری دلچسپی دا اظہار کیتا، جو آپسی مفادات اَتے ہم آہنگی تے مبنی ہووے۔ ݙوہیں رہنماواں وچال ایران اَتے اسرائیل وچال جاری کشیدگی تے وی تفصیلی ڳالھ مہاڑ تھئی، اَتے ایں مسئلے دے پرامن حل تے زور ݙتا ڳیا۔ صدر ڈونلڈ ٹرمپ فیلڈ مارشل عاصم منیر دی قائدانہ صلاحیتاں اَتے خطے اچ پیچیدہ صورتحال اچ انہاں دے بروقت فیصلیاں کوں سراہیا۔ ایں موقع تے فیلڈ مارشل عاصم منیر صدر ڈونلڈ ٹرمپ کوں حکومتِ پاکستان ولوں پاکستان دے سرکاری دورے دی دعوت ݙتی۔ اے ملاقات جو ابتدائی طور تے ہک گھنٹے کیتے طے ہئی، آپسی دلچسپی اَتے خلوص دے باعث ݙو گھنٹے توں ودھ دیر تئیں جاری رہی۔ اے امر ݙوہیں ملکاں وچال دوستانہ تعلقات اَتے اعتماد تے مبنی مضبوط شراکت داری دا عکاس اے۔ اے اعلیٰ سطح دی ملاقات پاکستان اَتے امریکا وچال دیرینہ تعلقات کوں ٻیا مستحکم کرݨ اچ ہک سنگِ میل دی حیثیت رکھیندی اے، جو مشترکہ امن، استحکام اَتے خوشحالی دے اہداف تے مبنی اے۔
