زرعی شعبے اچ پائیدار اصلاحات نال ملکی معیشت ودھسی، کھاد اَتے زرعی دوائیاں تے ٹیکس نئی لیندے پئے، وزیراعظم شہباز شریف

اسلام آباد۔ 25 جون (اے پی پی) وزیراعظم محمد شہباز شریف آکھیا جو زراعت ملکی معیشت دی ریڑھ دی ہڈی دی حیثیت رکھیندی اے اَتے زرعی شعبے اچ پائیدار اصلاحات نال ملکی معیشت ودھسی۔ زرعی شعبے اچ اصلاحات نال فی ایکڑ پیداوار ودھسی اَتے پیداواری لاگت ڳھٹ تھیسی۔ زراعت دی ترقی کیتے آوݨ آلے بجٹ اچ کھاد اَتے زرعی دوائیاں تے ٹیکس نئی لاتا ویند اپئیا۔ وزیراعظم آفس دے میڈیا ونگ توں جاری پریس ریلیز موجب بدھ کوں وزیراعظم محمد شہباز شریف دی صدارت زرعی شعبے دی ترقی دے حوالے نال جائزہ اجلاس تھیا۔ ایں موقع تے وزیراعظم آکھیا جو زراعت ملکی معیشت دی ریڑھ دی ہڈی دی حیثیت رکھیندی اے اَتے زرعی شعبے اچ پائیدار اصلاحات نال ملکی معیشت ودھسی،زرعی شعبے اچ اصلاحات نال فی ایکڑ پیداوار اچ خاطر خواہ وادھا تھیسی اَتے پیداواری لاگت ڳھٹ تھیسی۔ وزیراعظم آکھیا جو فارم میکنائزیشن دی ترویج کیتے زرعی مشینری اَتے آلات تے ٹیکس بتدریج گھٹ کیتا ویسی، زرعی اجناس دی سٹوریج دی صلاحیت ودھاوݨ دے حوالے نال اقدامات تیکھے کیتے ویسن۔وزیراعظم آکھیا جو صوبیاں دا زرعی شعبے دی ترقی کیتے نویں منصوبے اَتے فنڈز دی فراہمی خوش آئند اے، امید اے جو زرعی سکالرشپ تے چین بھیجے ڳئے لوک وطن واپسی تے زرعی شعبے دے ودھارے کیتے بطور انٹرپرینیور قابل قدر خدمات سر انجام ݙیسن۔ وزیراعظم آکھیا جو زراعت دے شعبے اچ ترقی نال ساریاں توں ودھ فیدہ کساناں اَتے دیہی علاقیاں دے رہݨ آلیاں کوں تھیسی، زراعت دی ترقی کیتے آوݨ آلے بجٹ اچ کھاد اَتے زرعی دوائیاں تے ٹیکس نئی لاتا ویندا پئیا۔اجلاس اچ وزیراعظم کوں زرعی شعبے اچ اصلاحات خاص طور تے زرعی پیداوار اچ ودھارے زرعی انفراسٹرکچر اَتے کساناں دی سوکھے زرعی قرضیاں تئیں رسائی دے حوالے نال تجویزاں پیش کیتی ڳئن۔ بریفنگ اچ ݙسیا ڳیا جو نیشنل ایگریکلچر انوویشن اینڈ گروتھ ایکشن پلان کساناں دی آمدنی ودھاوݨ، پیداوار اچ وادھے اَتے جامع اصلاحات تے مرکوز اے۔ بریفنگ اچ ݙسیا ڳیا جو زرعی شعبے اچ ویلیو ایڈیشن کر دے برآمدات توں کساناں دی آمدݨ ودھائی ویسی اَتے قیمتی زر مبادلہ کمایا ونج سڳسی، قومی ٹیکنالوجی فنڈ دے منصوبے اگنائٹ دے تحت 129 زرعی سٹارٹ اپس شروع کیتے ڳئن۔اجلاس اچ وفاقی وزیر غذائی تحفظ رانا تنویر حسین، وفاقی وزیر ماحولیاتی تبدیلی ڈاکٹر مصدق مسعود ملک، وزیراعظم دے چیف کوآرڈینیٹر مشرف زیدی، زرعی شعبے کیتے وزیراعظم دے چیف کوآرڈینیٹر احمد عمیر، زرعی شعبے نال جُڑے نجی شعبے دے انٹرپرینیور اَتے اعلیٰ سرکاری حکام شریک ہن۔