گڈانی کوں ماڈل گرین شپ بریکنگ یارڈ بݨاوݨ کیتے 12 ارب روپے دی منظوری ݙے ݙتی ڳئی اے، جنید انوار چوہدری

اسلام آباد۔ 25 جون (اے پی پی) وفاقی وزیربحری امور محمد جنید انوار چوہدری دی صدارت اچ گڈانی شپ بریکنگ یارڈ دی بہتری اَتے ترقی متعلق ہک اعلیٰ سطحی اجلاس تھیا جیں اچ گڈانی کوں جدید ترین ماڈل گرین شپ بریکنگ یارڈ اچ بدالݨ دے منصوبے دا تفصیلی جائزہ ڳِھدا ڳیا۔ اجلاس اچ وزارت دے سینئر افسر، ٹیکنیکل ماہرین اَتے متعلقہ اداریں دے نمائندیں شرکت کیتی۔وفاقی وزیر اعلان کیتا جو گڈانی منصوبے کیتے 12 ارب روپے دی منظوری ݙے ݙتی ڳئی اے جیں دے ذریعے گڈانی شپ بریکنگ یارڈ کوں عالمی ماحولیاتی اَتے موسمیاتی معیارموجب جدید ماڈل یارڈ اچ بدالیا ویسی۔ انہاں آکھیا جو اے منصوبہ نہ صرف انفراسٹرکچر دی بہتری بلکہ ماحولیاتی تحفظ، مزدوراں دی صحت و سلامتی اَتے صنعتی ترقی دے نویں دور دا آغاز ہوسی۔وفاقی وزیر جنید انوار چوہدری ݙسیا جو منصوبے دے تحت 30 بستریں تے مشتمل ہک جدید ہسپتال بݨایا ویسی جیں اچ ڈاکٹراں اَتے نرساں کیتے رہائشی سہولتاں وی ݙتیاں ویسن۔ ایں توں انڄ 32 کلومیٹر لمبی سڑک، اسکول، پارک اَتے مزدوراں کیتے لیبر کالونی وی تعمیر کیتی ویسی۔ منصوبے اچ صاف پاݨی ݙیوݨ ، سیوریج سسٹم اَتے بنیادی سہولتاں ݙیوݨ یقینی بݨایا ویسی۔انہاں واضح کیتا جو گڈانی شپ بریکنگ یارڈ دی بحالی نال پاکستان دی سالانہ سٹیل پیداوار اچ استحکام آسی، جیڑھا 12 لکھ ٹن سالانہ تئیں پُڄ سڳدی اے۔ اے منصوبہ مقامی کمیونٹی کیتے روزگار دے نویں موقع، فلاحی منصوبے اَتے معیشت اچ بہتری دا سبب بݨسی۔ وفاقی وزیر آکھیے جو ایں منصوبے اچ شفافیت، نگرانی اَتے وختی تکمیل کوں یقینی بݨاوݨ کیتے ہک تکڑا مانیٹرنگ سسٹم نافذ کیتا ویندا پئے۔ ہانگ کانگ انٹرنیشنل کنونشن ماحولیاتی طور تے محفوظ شپ ری سائیکلنگ تے مکمل عملدرآمد وی ایں منصوبے دا لازمی حصہ ہوسی۔ انہاں آکھیے جو گڈانی دی بحالی پاکستان کوں گرین شپ ری سائیکلنگ دا ہک علاقائی مرکز بݨاوݨ دا پاسہ ہک اہم قدم اے۔ عالمی معیار موجب شپ بریکنگ صنعت دی تشکیل ناگزیر اے تاں جو پاکستان بین الاقوامی مارکیٹ اچ اپݨی پوزیشن کوں مستحکم کر سڳے۔وفاقی وزیر جنید انوار چوہدری ایں ڳالھ تے زور ݙتا جو ماحولیاتی تحفظ اَتے معیشت دے ودھارے کیتے گڈانی منصوبے دی وختی تکمیل ٻہوں ضروری اے، تاں جو نہ صرف صنعتی ترقی کوں تقویت مِلے بلکہ پاکستان عالمی سطح تے گرین اکنامی دے سفر اچ نمایاں مقام حاصل کر سڳے۔