ایران اَتے اسرائیل وچال جنگ بندی سوھݨی ڳالھ اے، ایرانی قوم وݙی جرات اَتے بہادری ݙکھائی اے، وزیراعظم شہباز شریف دی وفاقی کابینہ دے اجلاس اچ ڳالھ مہاڑ

اسلام آباد۔ 26 جون (اے پی پی) وزیراعظم محمد شہباز شریف ایران اَتے اسرائیل وچال جنگ بندی کوں خوش آئند قرار ݙیندیں ہوئیں آکھیا جو ایرانی قوم وݙی جرات اَتے بہادری ݙکھائی اے، ایں جنگ دے اثرات خطے تے ای نئیں پوری دنیا تے پوندے۔ ایران اظہار یکجہتی تے پاکستان دی سیاسی تے عسکری قیادت اَتے عوام دی جو تعریف کیتی اے ایں دی مثال نئیں مِلدی۔ بجٹ کیتے سارے اتحادی جماعتاں دا تعاون قابل ستائش اے، بجٹ منظوری دے بعد نویں مالی سال اچ معیشت کوں ٻیا مستحکم بݨیسوں۔ محرم الحرام اچ امن و امان برقرار رکھݨ اَتے اخوت اَتے بھائی چارے دے فروغ کیتے موثر اقدامات کیتے ون٘ڄݨے چاہیدن۔ دہشت گردی دے خاتمے کیتے سکیورٹی فورسز دے افسر اَتے جوان عظیم قربانیاں ݙیندے پئن، انشاءاللہ اے جنگ اساں جتسوں۔ اے ڳالھیں انہاں خمیس کوں وفاقی کابینہ دے اجلاس اچ ڳالھ مہاڑ کریندیں ہوئیں کیتی۔وزیراعظم آکھیا جو پاک فوج “فتنہ الخوارج” تے کاری ضرب لیندی پئی اے، دشمن دے خلاف جنگ جاری اے، اساݙیاں سکیورٹی فورسز دے افسر اَتے جوان عظیم قربانیاں ݙیندے پئن، انشاءاللہ اے جنگ اساں جتسوں۔ وزیراعظم آکھیا جو بجٹ دی تیاری کیتے بہوں محنت کیتی ڳئی جئیں تے وفاقی وزیر خزانہ اَتے انہاں دی پوری اقتصادی ٹیم دا شکریہ ادا کرینداں، نائب وزیراعظم و وزیر خارجہ محمد اسحاق ڈار دی وی ایں اچ بھرپور معاونت رہی، پیپلز پارٹی، ایم کیو ایم اَتے ݙوجھے اتحادیاں دے وی شکر گزار ہاں جنہاں خوش اسلوبی نال سارے معاملات کوں اڳوں ودھایا اَتے انہاں دیاں کوششاں قابل ستائش ہن۔ ایں واری ایوان اچ حکومتی ارکان دی تعداد قابل اطمینان اے، صدر مملکت آصف علی زرداری، پاکستان پیپلز پارٹی دے چیئرمین بلاول بھٹو زرداری، وفاقی وزیر عبدالعلیم خان اَتے ٻئے اتحادی جماعتاں دے رہنماواں دا وی شکر گزار ہاں، ہݨ ایں بجٹ کوں ایوان توں منظور کراوݨ کیتے وی تندہی نال کم کروں، بجٹ منظوری دے بعد نویں مالی سال اچ معیشت کوں ٻیا مستحکم بݨیسوں۔وزیراعظم آکھیا جو ایران اَتے اسرائیل وچال جنگ بندی خوش آئند اے، ایران نے پاکستان دی سیاسی تے عسکری قیادت، سیاسی جماعتاں اَتے عوام دی طرفوں حمایت اَتے اظہار یکجہتی تے کھلے دل نال شکریہ ادا کیتے جئیں دی عصر حاضر اچ کوئی مثال ئیں مِلدی، صدر آصف علی زرداری، میݙا اَتے فیلڈ مارشل جنرل سید عاصم منیر، سیاسی زعماء اَتے عوام دا شکریہ ادا کیتا ڳئے۔ وزیراعظم آکھیا جو صدر ٹرمپ اَتے فیلڈ مارشل دی ظہرانے تے ملاقات تھئی، صدر ٹرمپ وݙے کھلے انداز اچ فیلڈ مارشل دا ناں ڳِھن تے آکھیا جو او انہاں توں بہوں متاثر تھئن۔ استنبول اچ فیلڈ مارشل جنرل سید عاصم منیر دی ایران دے وزیر خارجہ عباس عراقچی نال وی ݙیݙھ گھنٹہ ملاقات تھئی، پاکستان بھرپور اَتے مستقل انداز اچ ایران دی حمایت کیتی۔ ایران اسرائیلی حملے دے بعد آپݨے دفاع اچ کارروائی کیتی، اللہ دا شکر اے جو جنگ بندی تھی ڳئی اے ورنہ ایں نال بہوں زیادہ نقصان تھی سڳدا ہا اَتے ایں دے اثرات خطے تے ہی نئیں بلکہ پوری دنیا تے پوندے، ایرانی قوم وݙی جرات اَتے بہادری دا مظاہرہ کیتا اَتے انہاں کوئی دباؤ قبول نئیں کیتا، جُھکے نئیں اَتے آکھیا جو باوقار طریقے نال جنگ بندی تھیسی۔وزیراعظم آکھیا جو پاکستان ولوں قطر تے حملے دے خلاف وی بھرپور مذمتی بیان جاری کیتا ڳیا، قطر اساݙا برادر ملک اے، سعودی عرب دے ولی عہد دے نال میݙی ٹیلیفون تے تفصیلی ڳالھ تھئی، ایں جنگ کوں رُکاوݨ اچ انہاں وݙا کردار ادا کیتا، اسرائیل جݙاں ایران تے حملہ کیتا تاں سعودی عرب ولوں بھرپور مذمتی بیان جاری کیتا ڳیا، سعودی ولی عہد دی ایران دے صدر دے نال وی ٹیلیفون تے ڳالھ تھئی۔ انہاں آکھیا جو محرم الحرام دے مہینے دا آغاز تھیندا پئے، اے مقدس مہینہ اے، وفاق اَتے چاراں صوبیاں کوں امن و امان برقرار رکھݨ کیتے بھرپور کوششاں کرݨیاں پوسن، مجلساں اَتے جلوساں دی حفاظت، امن، بھائی چارہ اَتے اخوت دا پہلے وانگوں مظاہرہ تھیوݨا چاہیدے۔ وزیراعظم ہدایت کیتی جو گلگت بلتستان سودھے پورے ملک اچ سکیورٹی دے اقدامات کیتے ون٘ڄن۔