تحقیق اَتے جدت دے ذریعے موسمیاتی تبدیلیاں، فوڈ سیکیورٹی اَتے پائیدار توانائی جیھے مقامی اَتے عالمی چیلنجز دا مقابلہ کیتا ونڄ سڳدے، چیئرمین سینیٹ

صوابی۔ 26 جون (اے پی پی) چیئرمین سینیٹ سید یوسف رضا گیلانی آکھیے جو تحقیق اَتے جدت دے ذریعے موسمیاتی تبدیلیاں، فوڈ سیکیورٹی اَتے پائیدار توانائی جیھے مقامی اَتے عالمی چیلنجز دا مقابلہ کیتا ونڄ سڳدے۔ صوابی اچ غلام اسحاق خان انسٹیٹیوٹ دے کانوکیشن 2025 توں خطاب کریندے چیئرمین سینیٹ سید یوسف رضا گیلانی آکھیے جو غلام اسحاق خان انسٹی ٹیوٹ دی مجموعی کارکردگی اَتے ݙوجھے شعبیں اچ مثالی خدمات تے خراج تحسین پیش کرینداں، اعلیٰ تعلیم اساݙے ملک دے روشن مستقبل دی ضمانت اے۔انہاں آکھیے جو پائیدار ترقی کیتے بہترین افرادی قوت ضروری اے، جی آئی کے جیھے ادارے ایجھی افرادی قوت دی مہارت اچ بہتری گھن آوݨ کیتے کوشاں ہن۔ انہاں آکھیا جو ٹیکنالوجی دا شعبہ ترقی دی رفتار کوں تکھا کرݨ اچ معاون ثابت تھیندے، پاکستان دی ڈیجیٹل اکانومی اچ کافی حد تئیں بہتری ݙیکھݨ اچ آئی اے، فری لانسنگ دے شعبے اچ اساݙا ملک عالمی سطح تے چوتھے نمبر تے اے۔ انہاں آکھیا جو جی آئی کے دے طلباء جیڑھے ہنر اَتے مہارت حاصل کیتی اے ایں دے ذریعے ملک دی خدمت کرن۔ طلباء اپݨا علم اَتے صلاحیتاں انسانیت دے فلاح اَتے آوݨ آلی نسلاں دے روشن اَتے پائیدار مستقبل کیتے استعمال کرن۔ چیئرمین سینیٹ آکھیا جو تعلیم دے شعبے اچ وی تبدیلیاں تھیندیاں پئن، اساکوں ٹیکنالوجی تے اپݨا انحصار ودھاوݨا ہوسی، ڈیجیٹل نیشن پاکستان اَتے خصوصی ٹیکنالوجی زونز دے قیام دا مقصد ایں اہم شعبے اچ ترقی اَتے سرمایہ کاری دا ودھارا اے۔ انہاں آکھیے جو کانووکیشن طلباء دی زندگی اچ ہک نویں سفر دا آغاز اے۔چیئرمین سینیٹ انجینئرنگ سائنس اَتے ٹیکنالوجی دے ودھارے دی سوسائٹی اَتے بورڈ آف گورنرز دے صدر انجینیئر سلیم سیف اللہ خان، ایگزیکٹو ڈائریکٹر شکیل درانی اَتے ݙوجھے منتظمین دا شکریہ ادا کیتا۔ انہاں سائنس دی تعلیم، تحقیق اَتے ترقی دی خدمات تے انسٹیٹیوٹ کوں خراج تحسین پیش کیتا۔ کانووکیشن اچ چیئرمین سینیٹ طلباء اچ سنداں وی ونڈیاں ۔ ایں موقع تے بورڈ آف گورنرز دے صدر انجینیئر سلیم سیف اللہ خان چیئرمین سینیٹ دا شکریہ ادا کیتا۔ اپݨے خطاب اچ انجینیئر سلیم سیف اللہ خان آکھیے جو پاکستان کوں خود انحصاری دی حکمت عملی اپناوݨی ہوسی۔ غلام اسحاق خان ادارہ ہک مشن دے تحت بݨایا۔ انہاں آکھیے جو طلباء تے باری ذمے واری لڳدی اے۔ فیکلٹی دیاں کوششاں لائق تحسین ہن، ادارے اچ مختلف ثقافتاں دے طلباء زیر تعلیم ہن۔ انہاں آکھیا جو فارغ التحصیل طلباء و طالبات دے والدین مبارخ باد دے مستحق ہن۔