وزیردفاع خواجہ آصف دا شنگھائی تعاون تنظیم دے اصولاں اَتے مقصد کیتے پاکستان دے ثابت قدم عزم دا اعادہ

چنگ ڈاؤ۔ 26 جون (اے پی پی) وزیر دفاع خواجہ محمد آصف شنگھائی تعاون تنظیم دے اصولاں اَتے مقصد کیتے پاکستان دے ثابت قدم عزم دا اعادہ کریندے اجتماعی سلامتی دی اہمیت، انسداد دہشت گردی دیاں کوششاں اَتے علاقائی رابطیں کوں ودھاوݨ تے زور ݙتے۔ انہاں غزہ اچ ودھدے تشدد اَتے انسانی بحران تے پاکستان دی گہری تشویش دا اظہار کریندے فلسطینی شہریاں تے اسرائیل دے وحشیانہ تشدد اَتے لاتعداد حملیں کوں روکݨ اَتے انسانی امداد دی بلا تعطل فراہمی یقینی بݨاوݨ کیتے مستقل جنگ بندی دے وختی نفاذ دا مطالبہ کیتے۔وزارت دفاع توں جاری بیان موجب انہاں چین دے شہر چنگ ڈاؤ اچ منعقدہ شنگھائی تعاون تنظیم دے وزراء دفاع دے اجلاس اچ پاکستانی وفد دی قیادت کیتی۔ اپݨے خطاب اچ وزیردفاع شنگھائی تعاون تنظیم دے اصولاں اَتے مقصد کیتے پاکستان دے ثابت قدم عزم دا اعادہ کیتا، اجتماعی سلامتی دی اہمیت، انسداد دہشت گردی دیاں کوششاں اَتے علاقائی رابطیں کوں ودھاوݨ تے زور ݙتا۔ انہاں ایں ڳالھ تے زور ݙتا جو شنگھائی تعاون تنظیم اپݨے رکن ملکاں وچال ڳالھ مہاڑ، سانجھے اعتماد اَتے تعاون تے مبنی شراکت داری کوں ودھارا ݙے تے استحکام کیتے ہک اہم ستون دے طور تے کم کریندی اے۔ انہاں اقوام متحدہ دے چارٹر، شنگھائی تعاون تنظیم دے چارٹر اَتے عالمی طور تے قبول شدہ بین الاقوامی قوانین تے پاکستان دی پابندی دا اعادہ کیتا جنہاں دا مقصد امن، سلامتی، چنڳے ہمسایہ تعلقات اَتے اقوام وچال تعاون کوں ودھارا ݙیوݨا اے۔وزیر دفاع جاری عالمی جھیڑیں تے تشویش دا اظہار کریندے ایران دے خلاف اسرائیل دی طرفوں کیتے ڳئے بلا اشتعال اَتے غیر قانونی فوجی اقدامات دی مذمت کیتی۔ انہاں غزہ اچ ودھدے تشدد اَتے انسانی بحران تے پاکستان دی تشویش دا اظہار کریندے فلسطینی شہریاں تے اسرائیل دے وحشیانہ تشدد اَتے لاتعداد حملیں کوں روکݨ اَتے انسانی امداد دی بلا تعطل بہاء کوں یقینی بݨاوݨ کیتے مستقل جنگ بندی دے فوری نفاذ دا مطالبہ کیتا۔ وزیر دفاع ایں ڳالھ تے زور ݙتا جو دیرتئیں علاقائی خوشحالی دے سانجھے ویژن کوں حاصل کرݨ کیتے شنگھائی تعاون تنظیم دے فریم ورک دے تحت علاقائی رابطیں کوں اڳوں ودھاوݨ کیتے ہک پرامن اَتے مستحکم افغانستان ضروری اے۔دہشت گردی دے معاملے تے وزیر دفاع زور ݙتا جو اے ہک سانجھا خطرہ اے اَتے ایں نال اجتماعی طور تے نبݨݨا چاہیدے۔ پاکستان ساریاں ریاستاں توں مطالبہ کریندے جو او اپݨیاں اندرلیاں ناکامیاں توں توجہ ہٹاوݨ کیتے دہشت گرداں نال لڑݨ کیتے بین الاقوامی برادری دیاں سانجھیاں کوششاں کوں سیاسی رنگ ݙیوݨ توں باز رہن ۔ انہاں آکھیا جو پاکستان دہشت گردی دیاں ساریاں شکلاں اَتے مظاہر دی پرزور مذمت کریندے۔ پاکستان جموں و کشمیر دے بین الاقوامی طور تے منئے ڳئے اَتے غیر قانونی طور تے مقبوضہ علاقے اچ دہشت گردانہ حملے دی وی مذمت کریندے ۔ اساں ساریاں ریاستاں توں مطالبہ کریندوں جو او انہاں انہاں ریاستاں دے اقدامات دا محاسبہ کرن جنہاں پاکستان دے صوبہ بلوچستان اچ جعفر ایکسپریس دے طور تے دہشت گردانہ حملے دی منصوبہ بندی، مالی معاونت اَتے سرپرستی کیتی۔ وزیر دفاع کشمیر اَتے فلسطین جیھے پراݨے جھیڑے دے حل کیتے بین الاقوامی برادری دی ذمہ واری تے وی روشنی پاتی اَتے خبردار کیتا جو حل نہ تھیوݨ آلے جھیڑے عالمی امن اَتے سلامتی کوں خطرے اچ پیندن ۔ ایں سلسلے اچ، انہاں ڳالھ مہاڑ، ثالثی اَتے سفارت کاری دے ذریعے جھیڑے دے پرامن حل تے زور ݙتا۔وزیر دفاع ایں موقع تے تاجکستان، ایران، قازقستان اَتے چین دے اپݨے ہم منصباں نال ملاقاتاں کیتیاں، سانجھی سیکورٹی ترجیحات اَتے تعاون تے ڳالھ مہاڑ کیتی۔ فورم اچ پاکستان دی فعال شمولیت شنگھائی تعاون تنظیم دی چھتری دے تحت علاقائی استحکام اَتے سانجھے تعاون تے مبنی کثیرالجہتی دے تعمیری کردار دے طور تے نشاندہی کریندی اے۔