ملک اچ قابل تجدید توانائی دی تنصیب تکھی کریندے پیوں ،وفاقی وزیر توانائی سردار اویس احمد لغاری

اسلام آباد۔ 26 جون (اے پی پی) وفاقی وزیر توانائی سردار اویس احمد لغاری آکھیے جو ملک اچ قابل تجدید توانائی دی تنصیب تکھی کریندے پیوں ، غیر موثر پاور پلانٹس کوں بند کرتے وݙی مالی گنجائش پیدا کیتی اے، توانائی دیاں مختلف کمپنیاں گرڈ دی جدت اَتے شفافیت اچ مدد کریندیاں پئن، سمارٹ میٹرز اَتے ٹرانسفارمر مانیٹرنگ سسٹمز دے ذریعے توانائی دے ضیان کوں گھٹ کریندے پئن۔ اے ڳالھ انہاں بیجنگ اچ تھیوݨ آلی شنگھائی تعاون تنظیم دی پنجویں انرجی میٹنگ توں ورچوئل خطاب اچ آکھی۔وفاقی وزیر توانائی آکھیے جو توانائی دے مستقبل کیتے اختراع کوں ہکجا کرݨ ناگزیر اے، اساں ڈیٹا تے مبنی اصلاحاتی توانائی دی تبدیلی کوں اڳوں ودھیندے پیوں ۔ انہاں آکھیے جو حکومت مقامی اختراع کوں ودھارا اَتے ٹیکنالوجی دی منتقلی کیتے کم کریندی پئی اے، 2030ء تئیں 60 فیصد توانائی قابل تجدید ذریعے توں حاصل کرݨ اساݙا ہدف اے، پاکستان، وسطی ایشیا، جنوبی ایشیا اَتے خلیج وچال ہک قدرتی پُل دی حیثیت رکھیندے۔ وزیر توانائی مزید آکھیے جو اساݙے اہداف واضح ہن اَتے انہاں دے پچھوں عمل دی قوت وی اے، پاکستان توانائی دے رابطے کوں ودھارا ݙیوݨ کیتے پُرعزم اے اَتے ایس سی او دے سارے رکن ملکاں دے نال کم کرݨ کیتے تیار اے۔انہاں آکھیے جو پاکستان اچ بجلی دے تقریباً 3 کروڑ صارفین کیتے سمارٹ میٹرنگ سسٹم اچ 2 ارب ڈالر دی سرمایہ کاری درکار اے۔ اویس احمد لغاری ایس سی او ملکاں کیتے توانائی، اختراع اَتے تحقیق دا مستقل سیکرٹریٹ قائم کرݨ اَتے خطے اچ بجلی دے منصوبیں دی نگرانی کیتے ایس سی او ڈیجیٹل ڈیش بورڈ اَتے نینگراں کیتے ایس سی او انرجی فیلوشپ پروگرام شروع کرݨ دی تجویز وی پیش کیتی۔