بار ایسوسی ایشنز اَتے لاء اینڈ جسٹس کمیشن وچال ہم آہنگی کیتے ہر صوبے اچ ہک نمائندہ ہائی کورٹ اچ تعینات کیتا ویسی،چیف جسٹس یحییٰ آفریدی

اسلام آباد۔ 26 جون (اے پی پی) چیف جسٹس آف پاکستان جسٹس یحییٰ آفریدی بار ایسوسی ایشنز اَتے لاء اینڈ جسٹس کمیشن وچال ہم آہنگی دے فقدان دی نشاندہی کریندے آکھیے جو ایں سلسلے اچ کمیشن فیصلہ کیتے جو ہر صوبے اچ ہک سینئر سطح دا نمائندہ ہائی کورٹ اچ تعینات کیتا ویسی، جیڑھا ضلعی بار ایسوسی ایشنز اچ آگاہی پیدا کرݨ، مقامی ترجیحی امور دی نشاندہی کرݨ اَتے تلویں سطح تے جاری عدالتی منصوبیں دی نگرانی کریسی۔سپریم کورٹ دے شعبہ تعلقات عامہ توں جاری اعلامیہ موجب ، چیف جسٹس آف پاکستان جسٹس یحییٰ آفریدی دی زیر صدارت سپریم کورٹ برانچ رجسٹری لاہور اچ بارز اَتے لاء اینڈ جسٹس کمیشن وچال تعاون تکڑا بݨاوݨ کیتے اجلاس منعقد تھیا۔ اجلاس دا مقصد بار ایسوسی ایشنز اَتے لاء اینڈ جسٹس کمیشن وچال ادارہ جاتی رابطے دا جائزہ گھنݨ اَتے عدالتی نظام دی بہتری کیتے تعاون کوں ودھاوݨ ہئی۔اجلاس اچ چیف جسٹس لاہور ہائی کورٹ جسٹس عالیہ نیلم، رجسٹرار لاہور ہائی کورٹ، سیکرٹری لاء اینڈ جسٹس کمیشن آف پاکستان، سپریم کورٹ بار ایسوسی ایشن، پاکستان بار کونسل دے نمائندیں، وزارت قانون و انصاف، حکومت پاکستان دے افسراں اَتے حکومت پنجاب دے سیکریٹریز قانون اَتے منصوبہ بندی شرکت کیتی۔چیف جسٹس آف پاکستان شرکاء کوں خوش آمدید آکھدے ہوئیں انہاں دی عدالتی نظام کیتے خدمات دی تعریف کیتی ۔ انہاں بار ایسوسی ایشنز اَتے لاء اینڈ جسٹس کمیشن وچال ہم آہنگی دے فقدان دی نشاندہی کیتی۔ ایں سلسلے اچ کمیشن فیصلہ کیتا جو ہر صوبے اچ ہک سینئر سطح دا نمائندہ ہائی کورٹ اچ تعینات کیتا ویسی، جیڑھا ضلعی بار ایسوسی ایشنز اچ آگاہی پیدا کرݨ، مقامی ترجیحی امور دی نشاندہی کرݨ اَتے تلویں سطح تے جاری عدالتی منصوبیں دی نگرانی کریسی۔چیف جسٹس آف پاکستان ایں ڳالھ تے زور ݙتا جو بار نمائندگان اپݨی متعلقہ بارز کوں انہاں اقدامات نال باخبر کرن اَتے اصلاحات اچ سرگرمی نال شرکت کرن۔ انہاں ہدایت کیتی جو وفاقی حکومت دی طرفوں بار ایسوسی ایشنز کوں ݙتیاں ڳیاں سہولتاں اَتے معاونت کوں موثر بݨایا ونڄے تاں جو وسائل دا ضیان نہ تھیوے اَتے کارکردگی اچ بہتری آوے۔چیف جسٹس آف پاکستان صوبائی محکمیں تے وی زور ݙتا جو او کمیشن دے ریزیڈنٹ ایڈیشنل سیکرٹری نال نیڑے رابطے اچ رہن تاں جو ڈسٹرکٹ اینڈ سیشنز جج دی سربراہی اچ قائم ضلعی کوآرڈینیشن کمیٹی دی طرفوں پیش کیتے ڳئے منصوبے موثر اَتے وختی طریقے نال نافذ کیتے ونڄ سڳن ۔ انہاں گھٹ ترقی یافتہ ضلعیں اچ انفراسٹرکچر، سولرائیزیشن اَتے ڈیجیٹل انضمام دی کمی تے تشویش دا اظہار کیتا اَتے انہاں علاقیں اچ مخصوص اقدامات دی لوڑھ تے زور ݙتا۔ایں توں انڄ چیف جسٹس آف پاکستان بار نمائندگان کوں ہدایت کیتی جو او اپݨے ممبران کوں فیڈرل جوڈیشل اکیڈمی دی طرفوں پیش کیتے ون٘ڄݨ آلے کنٹینیونگ لیگل ایجوکیشن (سی ایل ای) پروگرامز توں بھرپور فیدہ چاوݨ دی ترغیب ݙیون۔ انہاں تاکید کیتی جو تربیتی کیلنڈر کوں ساری بار ایسوسی ایشنز اچ وسیع پیمانے تے کھنڈایا ونڄے تاں جو پیشہ ورانہ ترقی کوں ودھارا ݙتا ونڄ سڳے۔بار ایسوسی ایشنز دے نمائندیں ایں اقدام دی تعریف کیتی اَتے چیف جسٹس آف پاکستان دا شکریہ ادا کیتا جو انہاں سائلین اَتے وکلاء کوں پیش آوݨ آلے چیلنجز کوں تسلیم کیتا۔ اجلاس اچ شریک سارے وفاقی و صوبائی اداریں موثر اَتے وختی انصاف ݙیوݨ دے سانجھے مقصد  گھنݨ سانڳے مکمل تعاون دا یقین ݙیوائے۔