محرم الحرام وچال امن و امان برقرار رکھݨ اچ علماء کرام دا کلیدی کردار اے، وزیر داخلہ محسن نقوی

اسلام آباد۔ 3 جولائی (اے پی پی) وفاقی وزیر داخلہ محسن نقوی آکھیا جو محرم الحرام اچ علمائے کرام دا امن و امان برقرار رکھݨ کیتے کلیدی کردار اے، میں ایں گالھ دا گواہ ہاں جو علمائے کرام کئی مسئلیاں کوں سوکھ نال حل کیتا۔ انہاں آکھیا جو پاک بھارت جنگ اچ اللہ تعالیٰ ولوں پاکستان دی غیبی مدد دے کئی مظاہر ݙیکھݨ کوں ملے، سارے مکاتب فکر دے سربراہواں اتے علماء کرام کوں دعوت ݙتی ویسی جو اساں 14 اگست کوں فیصل مسجد وچ نماز ظہر باجماعت کٹھے ادا کروں۔ اے ڳالھیں وفاقی وزیر داخلہ محسن نقوی اتے وزیر مملکت داخلہ طلال چوہدری چیئرمین رویت ہلال کمیٹی مولانا عبدالخبیر آزاد دی سربراہی اچ سارے مکاتب فکر دے جید علمائے کرام نال ملاقات اچ کیتی۔ ملاقات اچ محرم الحرام خاص طور تے عاشورہ دے موقع تے امن و امان اتے مذہبی ہم آہنگی یقینی بݨاوݨ کیتے تفصیلی گالھ مہاڑ کیتی ڳئی۔محسن نقوی آکھیا جو محرم وچال امن و امان دے قیام اچ علماء کرام دا کردار سکیورٹی اداریاں دے برابر اہم اے۔ انہاں آکھیا جو علمائے کرام محرم الحرام اچ انتظامیہ نال مسلسل رابطے وچ رہندن۔ وزیر داخلہ محسن نقوی آکھیا جو معمولی تنازع وی علمائے کرام ای حل کریندن۔ انہاں آکھیا جو میں وی ایں گالھ نال متفق ہاں جو “اپݨا مسلک چھوڑو نہ اَتے ݙوجھے دے مسلک کوں چھیڑو نہ”، سانگے ایں سنہرے اصول کوں پورے پاکستان وچ پھیلاوݨا چاھیدے کیونجو اساں سارے مسلمان ہِیں۔ محسن نقوی آکھیا جو میݙا یقین اے جو امام حسین علیہ السلام سب دے ہن، جتنا میݙا امام حسین علیہ السلام نال تعلق اے اتنا باقی سب دا وی اے۔محسن نقوی نے آکھیا جو میں اَتے وزیر مملکت برائے داخلہ سارے علمائے کرام کوں خود دعوت نامے پُہنچیسوں۔ وزیر داخلہ نے آکھیا جو ایں اجتماع دے ذریعے پوری دنیا کوں اے پیغام ویسی جو اساں سارے متحد اَتے کٹھے ہِیں اَتے ایں کیتے 14 اگست توں بہتر ݙینھ نئیں تھی سڳدا۔ اوہناں آکھیا جو ایں سال جنگ وچ کامیابی دے بعد اللہ تعالیٰ نے جو اساں کوں عزت ݙیتی، اوں دی وجہ نال ہک مثالی یوم آزادی منایا ویسی، ایں اجتماع وچ حکومت دی ولوں وی بھرپور نمائندگی ہوسی۔مولانا عبدالخبیر آزاد آکھیا جو اجلاس اچ قاضی عبدالغفار قادری، علامہ شبیر حسین، حافظ نظام الدین، مولانا اشرف علی، مولانا ضیاء الرحمن، مفتی محمد اقبال رضوی، مولانا محمد طیب قریشی، مفتی سید عاشق حسین شاہ، مفتی فتح محمد راشدی، پیر سعادت علی شاہ، علامہ سید زاہد حسین کاظمی، مولانا مقصود احمد توحیدی، مولانا عبدالظاہر فاروقی، قاضی جنید الرشید، مفتی گلزار احمد نعیمی، مولانا تنویر احمد علوی، مولانا ہارون الرشید، مولانا عبدالعزیز، مولانا سردار محمد لغاری، علامہ سعید احمد اعوان، مولانا ملک امجد اعوان، مولانا عابد اسرار، قاری بلال گولڑوی، پیر عمر فاروق شاہ، علامہ مصطفی حیدر نقوی، صاحبزادہ حسن شعیب، صاحبزادہ ارشاد احمد، مفتی اقبال نعیمی، پیر ممتاز احمد ضیاء، مولانا ابو بکر صدیق، مفتی عبدالباسط، مولانا عبدالسلام جلالی، مولانا اکرام الٰہی ظہیر اَتے پروفیسر ظفراللہ جان شرکت کیتی۔ سیکرٹری داخلہ، ݙی جی ایف آئی اے، چیف کمشنر اسلام آباد اتے آئی جی اسلام آباد پولیس وی ایں موقع تے موجود ہن۔