پاکستان کوہ پیماواں اَتے مہم جوئی دے متلاشیاں کیتے اہم مقام اے، وزیراعظم شہباز شریف دی نانگا پربت سر کرݨ آلی قطری کوہ پیما نال ملاقات اچ گالھ مہاڑ

اسلام آباد۔ 10 جولائی (اے پی پی) وزیراعظم محمد شہباز شریف بین الاقوامی کوہ پیماواں کوں پاکستان اچ کوہ پیمائی دی دعوت اَتے ایں بارے حکومت دے بھرپور تعاون دا یقین ݙویندیں ہوئیں آکھیا جو پاکستان کوہ پیماواں اَتے مہم جوئی دے متلاشیاں کیتے اہم مقام اے۔ اے ڳالھیں انہاں حال اچ نانگا پربت سر کرݨ آلی پہلی قطری خاتون کوہ پیما شیخہ اسماء الثانی نال گالھ مہاڑ کریندیں ہوئیں کیتا جنہاں خمیس کوں انہاں نال ملاقات کیتی۔ وزیراعظم شیخہ اسماء الثانی کوں نانگا پربت سر کرݨ آلی خلیج اَتے قطر دی پہلی تریمت کوہ پیما دا اعزاز حاصل کرݨ تے مبارخ ݙتی۔ وزیراعظم انہاں دی غیر معمولی ہمت اَتے عزم دی تعریف کریندیں ہوئیں مہم جوئی اَتے کوہ پیمائی دے ذریعے دنیا بھر دی تریمتاں خاص طور تے نینگراں کوں با اختیار بݨاوݨ بارے آگاہی کوں فروغ ݙیوݨ اچ انہاں دے کردار دی تعریف کیتی۔وزیراعظم پاکستان دے قدرتی حسن کوں اجاگر کرݨ کیتے انہاں دی کوششاں دے اعتراف اچ شیخہ اسماء الثانی کوں پاکستان دی ماؤنٹینز اینڈ ٹورازم کیتے برانڈ ایمبیسیڈر مقرر کرݨ دا اعلان کیتا۔ وزیراعظم آکھیا جو دنیا دی 14 بُلند ترین چوٹیاں اچوں 5 دا پاکستان اچ ہووݨ نہ صرف پاکستان کیتے فخر دی گالھ اے بلکہ اِے کوہ پیماواں اَتے ایڈونچر دے متلاشیاں کیتے اوں کوں ہک اہم مقام وی بݨیندے۔ انہاں پاکستان دے شاندار پہاڑاں دا انتخاب کرݨ اَتے انہاں دی قدرتی خوبصورتی دی طرف دنیا دی توجہ مبذول کراوݨ وچ قابل قدر کردار ادا کرݨ تے شیخہ اسماء دا شکریہ ادا کیتا۔ انہاں دنیا بھر دے کوہ پیماواں کوں انہاں دیاں مہماں وچ مدد فراہم کرݨ والے پاکستانی کوہ پیماواں، پورٹرز اَتے گائیڈز دا وی ذکر کیتا جو دنیا بھر دے کوہ پیماواں کوں انہاں دیاں مہماں وچ مدد فراہم کریندن۔ وزیراعظم آکھیا جو انہاں دی مہارت اَتے لگن بین الاقوامی کوہ پیماواں دی غیر معمولی کامیابیاں کیتے لازم و ملزوم ہن۔ وزیراعظم بین الاقوامی کوہ پیماواں کیتے حکومت پاکستان ولوں جاری حمایت دا اعادہ کریندیں ہوئیں انہاں کوں ساریاں ضروری سہولتاں، حفاظت اَتے مزمان نوازی دا یقین ݙوایا۔ وزیراعظم شیخہ اسماء کوں مستقبل اچ ٻئی کوہ پیمائی کیتے پاکستان آوݨ اَتے متنوع اَتے دلکش مناظر کوں ٻیا دریافت کرݨ دی دعوت ݙتی۔ شیخہ اسماء الثانی پرتپاک مزمان نوازی تے وزیراعظم اَتے پاکستانی عوام دا شکریہ ادا کیتا۔ نانگا پربت دی آپݨی اڄوکی کوہ پیمائی دا ذکر کریندیں ہوئیں، انہاں مقامی پورٹرز اَتے گائیڈز دے تعاون دی تعریف کیتی۔