صدر آصف علی زرداری دا عالمی یوم آبادی تے سنیہا: آبادی اچ تیزی نال ودھارا قومی ترقیاتی عمل اچ وݙی رکاوٹ

اسلام آباد۔ 11جولائی (اے پی پی)صدر مملکت آصف علی زرداری آکھیے جو پاکستان دے عوام دی فلاح و بہبود اَتے خوشحالی یقینی ٻݨائی ویسی، آبادی اچ ودھارے تے قابو پاوݨ کیتے ملک گیر سوچ، تحقیق اَتے مؤثر پالیسیاں اپناوݨ دی ودھ لوڑھ اے۔ ایوان صدر دے پریس ونگ توں جاری عالمی یوم آبادی 2025 دے حوالے نال جاری اپݨے سنیہے اچ صدر مملکت آکھیا جو اڄ اساں عالمی یوم آبادی منیندے پئے ہیں، اے بہترین ویلھا اے جو اساں آبادی دے بدلدے ہوئے رجحاناں تے غور کروں اَتے ایں عزم کوں اپڑون جو اساں اپݨے سارے شہریاں دی فلاح و بہبود اَتے خوشحالی یقینی بݨیسوں۔ انہاں آکھیا جو ایں سال عالمی ݙینھ دا موضوع “ہک منصفانہ اَتے پُر امید دنیا اچ اپݨی پسند دا خاندان تشکیل ݙیوݨ کیتے نوجواناں کوں بااختیار بݨاوݨ” چݨیا ڳئے جیڑھا ساݙے آبادیاتی منظرنامے دی حقیقی عکاسی کریندے۔ انہاں آکھیا جو ساݙی آبادی 24 کروڑ 20 لکھ توں ودھ چُکی اے اَتے اینجھے ویلھے مستقبل گیر سوچ تے مبنی تحقیق اَتے مؤثر پالیسیاں کوں اپناوݨ پہلے توں ودھ لوڑھ اے، نوجواناں تے مشتمل وݙی آبادی ساݙا سب توں قیمتی ترکہ اے اَتے ضروری اے جو انہاں کوں معیاری تعلیم، صحت، روزگار دے موقع اَتے خود اختیاری ݙتی ونڄے۔ صدر مملکت آکھیا جو آبادی اچ تیزی نال وادھا ساݙے قومی ترقیاتی عمل اچ وݙی رکاوٹ بݨدا پئے جیںدے نال وسائل، صحت و تعلیم دے نظام اَتے عوامی خدمات دے شعبے تے ودھ دباؤ اے، ودھدی بے روزگاری، ماحولیاتی تنزلی، جنگلات دی کٹائی اَتے صحت و تعلیم دا ٻھار ایں عدم توازن دیاں علامتاں ہین جیڑھیاں آبادی اَتے وسائل اچ موجود ہین۔ انہاں آکھیا جو آبادی اچ مسلسل وادھے دے مسئلے نال نمٹݨ کیتے جامع اَتے ہمہ گیر حکمت عملی اپناوݨ ناگزیر اے، خاندانی منصوبہ بندی دیاں معیاری سہولتاں دی رسائی کوں خصوصی طور تے دیہی علاقیاں تئیں وسعت ݙیوݨی ہوسی، تریمتاں دی تعلیم، روزگار اَتے انہاں کوں مساوی موقع ݙیوݨ ضروری اے، کیوں جو تریمتاں دی خودمختاری خاندانی فیصلیاں تے براہ راست اثر پیندی اے، ایں حوالے نال حکومت کوں “توازن” دے اصول تے مبنی ہک جامع آبادیاتی ایجنڈے کوں ودھاوݨا ہوسی، یعنی آبادی اچ وادھا اَتے وسائل دی دستیابی وچال ہم آہنگی قائم کرݨی ہوسی، اے نقطہ نظر سارے متعلقہ فریقین بشمول مذہبی رہنماواں، پالیسی سازاں اَتے ترقیاتی شراکت داراں دی حمایت نال ہی ممکن اے، ہک صحت مند، مساوات تے مبنی اَتے وسائل دے مؤثر استعمال تے مشتمل مستقبل دو ودھݨ ساݙے اجتماعی عزم دا ثبوت اے، آبادی دے ودھارے دے مسئلے تے قابو پاوݨ کیتے ساریاں کمیونٹیز دی شمولیت وݙی اہم اے، جݙاں برادری دے رہنما، بزرگ اَتے سول سوسائٹی دے ادارے خاندانی منصوبہ بندی دے فائدیاں کوں اڳونہا کریندن تاں عوامی رویاں اچ مثبت تبدیلی آندی اے، ایں حوالے نال میڈیا وی نہ صرف عوام اچ شعور ودھا سڳدے ٻھل صحت مندانہ طرز زندگی اپناوݨ اچ وی مؤثر کردار ادا کر سڳدے۔ صدر مملکت آکھیا جو ایں سانڳے ساکوں بین الاقوامی کامیاب تجربیاں توں وی سکھݨا چاہیدے، جیڑھا خاندانی منصوبہ بندی کوں بنیادی صحت دے نظام اچ ضم کرݨ، تولیدی صحت بارے کمیونٹی دی سطح تے آگاہی ودھاوݨ، نچلی سطح تے تربیت یافتہ تریمتاں صحت کارکنان دیاں خدمتاں حاصل کرݨ اَتے عوامی آگاہی دے رویاں اچ تبدیلی کیتے میڈیا دا مؤثر استعمال کرݨ، اے سارے اقدامات آبادی اچ توازن کیتے ضروری ہین۔ اپݨے سنیہے اچ صدر مملکت آصف علی زرداری سارے اداریاں، سرکاری محکمیاں، سول سوسائٹی، تعلیمی حلقیاں، نجی شعبے اَتے میڈیا توں اپیل کیتی جو آگاہی کھنݙاوݨ، تولیدی صحت دیاں سہولتاں ودھاوݨ اَتے نوجواناں کوں بااختیار بݨاوݨ دے قومی مشن اچ اپݨا ہتھ ونݙاون۔