پاکستان اتے ایران دا فری ٹریڈ معاہدہ تیار، ݙو طرفہ تجارت وچ ودھارا تھیسی ، وفاقی وزیر تجارت جام کمال خان دا پاکستان ایران بزنس فورم نال خطاب

اسلام آباد۔3اگست (اے پی پی) وفاقی وزیر تجارت جام کمال خان آکھیے جو بلوچستان دے لوک ایران نال تجارت تے انحصار کریندن ، سرحدی تجارت ݙوہائیں ملکاں کیتے اہم اے، مند-پشین بارڈر مارکیٹ ہک واری ول فعال تھی ڳئے، چاغی-کوہک اتے گبد-ریمدان مارکیٹاں جلدی فعال کیتیاں ویسن، نویں مارکیٹاں نال سرحدی علاقیاں کوں فیدہ تھیسی۔اے ڳالھ انہاں اتھاں منعقدہ پاکستان ایران بزنس فورم توں خطاب دے دوران آکھی۔ وفاقی وزیر تجارت ایرانی وفد دا خیرمقدم کریندے آکھیا جو پاک ایران تعلقات بھرپی تے مبنی ہن، بلوچستان دے لوک ایران نال تجارت تے انحصار کریندن، سرحدی تجارت ݙوہائیں ملکاں کیتے اہم ہے۔ انہاں آکھیا جو مند-پشین بارڈر مارکیٹ ہک واری ول فعال تھی ڳئی اے، مارکیٹ 30 جولائی کوں ہک واری ول کھولی ڳئی اے۔ جام کمال خان مزید آکھیا جو چاغی-کوہک اتے گبد-ریمدان مارکیٹاں جلدی فعال کیتیاں ویسن۔ انہاں آکھیا جو نویں مارکیٹاں نال سرحدی علاقیاں کوں فیدہ تھیسی ۔وزیر تجارت آکھیا جو نجی شعبہ 10 ارب ڈالر دے تجارتی ہدف کوں پورا کرݨ وچ اہم کردار ادا کر سڳدے۔ انہاں آکھیا جو پاکستان ایران فری ٹریڈ معاہدہ تیار تھی چُکئے، معاہدے نال ݙو طرفہ تجارت وچ ودھارا تھیسی۔ انہاں آکھیا جو بارٹر ٹریڈ تے وختی عملدرآمد، نان ٹیرف رکاوٹاں کوں ختم کرݨ ضروری اے۔ سانجھی تجارت دے ودھارے دے حوالے نال انہاں آکھیا جو ݙوہائیں ملکاں دا کسٹمز تعاون اتے انفراسٹرکچر چنڳا کیتا ویسی۔وزیر تجارت آکھیا جو زراعت، معدنیات اتے توانائی وچ ݙو طرفہ تعاون دی وسیع گنجائش موجود اے، حکومت سرمایہ کاری وچ آسانیاں پیدا کریندی پئی اے، ایرانی کمپنیاں کوں پاکستان وچ خوش آمدید آکھدوں ۔ جام کمال خان ایرانی بزنس و صنعت کار برادری کوں مشترکہ منصوبیاں وچ سانجھے داری دی دعوت وی ݙتی۔جام کمال خان آکھیا جو اے فورم دوستی دی علامت اے، ایرانی صنعت کار پاکستان وچ سرمایہ کاری دے موجودہ موقعیں توں فیدہ چاون، اے پاک ایران تجارت دے نویں دور دا آغاز ہوسی۔ وفاقی وزیر تجارت ایرانی صدر دی بزنس فورم وچ شرکت تے اظہار تشکر کریندے شرکت کوں چنڳا قرار ݙتا اتے آکھیا جو ایران وچ مشترکہ اقتصادی کمیشن دا اجلاس جلدی سݙیا ویسی، مشترکہ کمیشن دے ذریعے تجارت کوں ودھارا۔بزنس فورم توں ایرانی وزیر تجارت محمد آتابک وی خطاب کیتا۔ پاک ایران بزنس فورم وچ ݙوہائیں ملکاں دی اعلیٰ قیادت شرکت کیتی، نائب وزیراعظم و وزیر خارجہ سینیٹر محمد اسحاق ڈار وی تقریب وچ شریک ہن۔