صدر آصف زرداری دا چین دے قومی ݙینھ تے صدر شی جن پنگ دے ناویں تہنیتی سنھیا

اسلام آباد۔01 اکتوبر (اے پی پی) صدرِمملکت آصف علی زرداری چین نال تزویراتی شراکت داری کوں مزید گھاٹا کرݨ دے عزم دا اعادہ کریندے آکھیے جو چین-پاکستان اقتصادی راہداری (سی پیک) ݙوہیں ملکاں دی روایتی دوستی تے سدا بہار سٹریٹجک تعاون تے مبنی شراکت داری دی واضح علامت اے۔ صدارتی سیکرٹریٹ دے میڈیا ونگ توں جاری بیان موجب چین دے قومی ݙینھ دے موقع تے چین دے صدر شی جن پنگ دے ناں اپݨے تہنیتی خط اچ صدرِ مملکت آصف علی زرداری آکھیا جو سی پیک دا اعلیٰ معیار دی ترقی تے مبنی ٻیا مرحلہ پاکستان تے چین کیتے مصنوعی ذہانت، قابلِ تجدید توانائی تے گرین مائننگ سودھے سانجھے مفاد دے ٻئے شعبیں اچ نویں موقع پیش کریندے۔ صدرِ مملکت آکھیا جو گزریل 77 سالاں دے دوران چین دی ترقی نہ صرف چینی عوام بلکہ دنیا دے لوکاں کیتے وی نمایاں اقتصادی تے سماجی ثمرات دی حامل رہی اے۔ انہاں کروڑاں لوکاں کوں غربت توں کڈھݨ اچ چین دی کامیابی، جامع ترقی تے نویں معیاری پیداواری قوتاں تے توجہ نیز عالمی امور اچ چین دے ودھدے کردار کوں اجاگر کیتا۔ صدرِ مملکت آکھیا جو پاکستان تے چین ایں سال سفارتی تعلقات دے قیام دی 75ویں سالگنڈھ منیندے پئن۔ انہاں آکھیا جو ݙوہیں ملکاں دی ”آہنی دوستی“ ویلھے دی ہر آزمائش تے پوری لتھی اے تے ثابت کیتے جو اے تعلقات تزویراتی سانجھے اعتماد تے بنیادی مفادات متعلق امور تے ہک ٻئے دی مسلسل حمایت نال مزید تکڑے تھئن۔ صدرِ مملکت آصف علی زرداری آکھیا جو پاکستان چین نال اپݨے تعلقات کوں ساریں توں ودھ اہمیت ݙیندے تے صدر شی جن پنگ نال رل تے ݙوہیں ملکاں دی منفرد تے خصوصی دوستی کوں اڳوں ودھاوݨ، عملی تعاون کوں مزید گھاٹا کرݨ تے نویں دور اچ مشترکہ مستقبل دی حامل نیڑے چین-پاکستان کمیونٹی دی تشکیل کوں تکھا کرݨ کیتے پرعزم اے۔ انہاں ایں اعتماد دا اظہار کیتا جو پاکستان تے چین وچال دوستی تے تعاون دے رشتے مزید تکڑے تھیندے رہسن جیندے نال ݙوہیں ملکاں دے عوام دی خوشحالی، علاقائی امن و استحکام تے زیادہ پرامن، منصفانہ تے تعاون تے مبنی علاقائی و بین الاقوامی نظام دے ودھارے اچ مدد ملسی۔