حضور نبی کریم ﷺ دی تعلیمات تے عمل کریندے ملکی مسئلے اتے اوکھ تے قابو پاتا ونڄ سڳدے، سید یوسف رضا گیلانی

ملتان- 06 ستمبر (اے پی پی) چیئرمین سینٹ سید یوسف رضا گیلانی آکھیے جو حضرت محمد ﷺ دی تعلیمات تے عمل کریندے ملکی مسئلے اتے اوکھ تے قابو پاتا ونڄ سڳدے ۔ حضور پاک دی ولادت با سعادت دا ݙینھ ساݙے ایمان دا حصہ اتے امت مسلمہ کیتے خوشیاں اتے برکت دا لمحہ اے۔ اے ڳالھ انہاں انہاں دولت گیٹ ملتان وچ انجمن اسلامیہ دے زیر اہتمام 12 ربیع الاول دے سو سالہ جشن دے موقع تے میڈیا نال ڳالھ مہاڑ دے کریندے آکھی۔ گورنر خیبر پختونخوا فیصل کریم کنڈی وی انہاں دے نال ہن۔ سید یوسف رضا گیلانی دا آکھݨ ہئی جو او حضور پاک ﷺ دی ولادت باسعادت تے پوری امت مسلمہ بالخصوص پاکستان دے سارے مسلماناں کوں مبارخ ݙیندن ۔ انہاں دا آکھݨ ہئی جو حضور پاک تعلیم اتے تبلیغ نال ہک انقلاب گھن آتے دین اسلام کوں کھنڈایا۔ اسلام ہک پر امن دین اے۔ اساں تعلیم کوں ہتھیار بݨا تے غلبہ حاصل کرسڳدوں ۔ اتے وطن عزیز کوں امن اتے خوشحالی دا گہوارہ بݨا سڳدوں ۔ سید یوسف رضا گیلانی آکھیا جو ایں سلسلے وچ انجمن اسلامیہ ملتان دا کردار بے مثال اے۔ تعلیم دے ودھارے کیتے ایں تنظیم دی جدوجہد کوں بھلایا نئیں ونج سڳدا۔ جنوبی پنجاب بالخصوص ملتان وچ ٻہوں سارے سکولاں اتے کالجز دی بنیاد رکھی ڳئی۔ جتھاں بغیر فرق اتے میرٹ تے تعلیم دا سلسلہ جاری اے۔ انہاں انجمن اسلامیہ دے صدر سید عمران الحسن گیلانی کوں خراج تحسین پیش کریندے آکھیا جو انہاں دی قیادت وچ علم دا اے سفر جاری رہسی۔ چیئرمین سینٹ مزید آکھیا جو اے ہک خوبصورت اتفاق اے جو اڄ پوری قوم یوم دفاع وی منیندی پئی اے ۔ اے ݙینھ دی مناسبت نال اساں اپݨیاں افواج کوں وی سلام پیش کریندوں جنہاں دی قربانیاں دی بدولت اساں آزاد ملک وچ ساہ گھندے پیوں ۔ انہاں آکھیا جو ساݙیاں افواج دا شمار دنیا دیاں بہترین افواج وچ تھیندے، ساݙے جواناں ہر محاذ تے اپݨیاں جاناں دا نذرانہ پیش کر تے اے ثابت کیتا جو اساں ہک مضبوط اتے نیوکلیئر اسٹیٹ ہیسے۔ ملک دی موجودہ چھل دی صورتحال تے ڳالھ کریندے سید یوسف رضا گیلانی آکھیا جو ایں ویلھے ملک خطرناک چھل دی صورتحال نال ݙو چار اے۔ ایں اوکھ تے قابو پاوݨ صرف حکومت دی ذمے واری کائنی بلکہ سارے مخیر حضرات، فلاحی تنظیماں اتے ٻئے اداریں کوں وی قومی یکجہتی دا مظاہرہ کرݨا ہوسی۔ تانجو چھل متاثرین دی مدد کیتی ونج سڳے. گورنر خیبر پختونخوا فیصل کریم کنڈی ساری امت مسلمہ کوں حضرت محمد ﷺ دی ولادت با سعادت دے موقع تے مبارخ ݙیندے آکھیا جو اڄ ساݙے کیتے خوشی دا ݙینھ اے۔ جیڑھا اساکوں قومی یکجہتی اتے محبت دا درس ݙیندے۔ فیصل کریم کنڈی دا یوم دفاع دے حوالے نال آکھݨ ہئی جو اڄ پاک فوج دے شہیداں کوں یاد کرݨ دا ݙینھ وی اے۔ ایں ݙینھ اپݨے ملک دا دفاع کرݨ اتے قربانیاں ݙیوݨ آلے کوں وی بھلایا نئیں ونڄ سڳدا۔ انہاں آکھیا جو ملک وچ چھل دی آفت اے۔ ایں موقع تے اساکوں سیاست کوں ہک پاسے رکھ تے چھل متاثرین دی مدد کیتے رل تے کم کرݨا ہوسی۔ بعد وچ انجمن اسلامیہ دے زیر اہتمام 12 ربیع الاول دی مناسبت نال تقریب منعقد تھئی۔ جیں وچ مختلف مقامی تنظیماں، شہر دے نامور لوکاں اتے ٻہوں سارے لوکاں شرکت کیتی۔ ایں موقع تے چیئرمین سینٹ سید یوسف رضا گیلانی صدر انجمن اسلامیہ عمران حسن گیلانی دی دستار بندی کیتی، چیئرمین سینٹ، گورنر خیبرپختونخوا فیصل کریم کنڈی، سجادہ نشین دربار موسیٰ پاک شہید سید ابوالحسن گیلانی، رکن قومی اسمبلی علی موسیٰ گیلانی، سید علی قاسم گیلانی، سینیئر سیاسی رہنما مخدوم جاوید ہاشمی، سینیٹر رانا محمودالحسن، ڈاکٹر جاوید صدیقی، حاجی جاوید اختر انصاری، سید عامر حسن گیلانی، سید سہیل حسن گیلانی، احمد مجتبیٰ گیلانی، نعیم خان، سید ارتضیٰ حسن گیلانی، مظہر جاوید سمیت مختلف سیاسی اتے سماجی شخصیات دی دستار بندی کیتی ڳئی۔ جیں دے بعد چیئرمین سینٹ سید یوسف رضا گیلانی اتے گورنر خیبر پختونخوا فیصل کریم کنڈی دی قیادت وچ 12 ربیع الاول دا جلوس دولت گیٹ توں ریلی دی شکل وچ روانہ تھیا اتے حسین آگاہی چوک وچ ختم تھیا۔