خیبر پختونخوا حکومت ݙساوے این ایف سی والے دہشتگردی دے خلاف ݙتے فنڈز اتے وسائل کتھاں خرچئین؟ فیصضہ کرݨا ہوسی جو پی ٹی آئی پاکستان نال اے یا افغانستان نال، وفاقی وزیر عطاء اللہ تارڑ

اسلام آباد۔28ستمبر(اے پی پی)وفاقی وزیر اطلاعات و نشریات عطاء اللہ تارڑ آکھیے جو کے پی کے حکومت لوکاں کوں سوکھ ݙیوݨ اتے صوبے اچ دہشتگردی مکاوݨ اچ ناکام رہی اے، ݙساوے این ایف سی والے دہشتگردی دے خلاف ݙتے فنڈز اتے وسائل کتھاں خرچئین؟ فیصضہ کرݨا ہوسی جو پی ٹی آئی پاکستان نال اے یا افغانستان نال؟ اسلام آباد اچ وزیر مملکت برائے داخلہ طلال چوہدری نال پریس کانفرنس کریندے انہاں آکھیا جو پی ٹی آئی دی نیت تے طبیعت ݙوہیں خراب ہین، اے نا دہشتگردی دے خلاف کارروائیاں دی اونر شپ ڳھندن، نا ہی عملی اقدامات کرݨ چاہندن، اے 12 سال توں صوبے اچ حکومت کریندے پئن ایندے باوجود لوکاں کوں ریلیف ݙیوݨ، صوبے دی حالت سدھارݨ اتے نیشنل ایکشن پلان تے عملدرآمد کرݨ اچ ناکام رہین اتے دہشتگردی مکاوݨ دی بجائے ہتھو دہشتگرداں دی سہولت کاری اچ رُدھے ہوئن۔ انہاں آکھیا جو وزیراعلیٰ سہیل آفریدی دے سامٖ ہک تقریب اچ ݙو افغان مندوبین پاکستانی ترانے دے احترام اچ کھڑے نئیں تھئے، ٻھل انہاں دے خلاف کوئی کارروائی نئیں کیتی ڳئی اتے صرف تماشہ ݙیہدے رہین۔ انہاں آکھیا جو دہشتگردی دے خلاف جنگ اچ ساریاں جماعتاں قربانیاں ݙتن اتے لاشاں چاتن، دہشتگرداں دی مذمت نہ کرݨ بزدلی اے، صوبے اچ مائننگ، گولڈ مائننگ، ٹمبر، ٹوبیکو اچ سارا ٹیرر کرائم نیکسس اے، خیبر پختونخوا اچ نان کسٹم پیڈ گاݙیاں، بغیر نمبر پلیٹ و رجسٹریشن گاݙیاں موٹر سائیکلاں چلدن، صوبہ اپݨا ریونیو ودھاوݨ کیتے وی انہاں کوں رجسٹرڈ نئیں کرا سڳیا۔ انہاں آکھیا جو صوبائی حکومت پولیس کیتے بلٹ پروف گاݙیاں ڳھنݨ توں وی ھٹک ݙتے، پنجاب آلی کار کوئی سی ٹی ڈی فورس نئیں ٻݨائی تہوں اڄ دہشتگردی مکݨ دی بجائے ودھدی پئی اے، صوبے اچ شہید تھیوݨ آلیاں اچ اکثریت عام شہریاں دی اے، پورے صوبے دی سکیورٹی سیاسی مقاصد دی بَلی چڑھا ݙتی ڳئی اے۔ ہنگو، ڈی آئی خان اتے کوہاٹ اچ دہشتگردی واقعات تھئن، پوری قوم اتے افواج پاکستان مل تے انہاں دہشتگرداں دا مقابلہ کریسن۔ انہاں آکھیے جو پی ٹی آئی صرف قیدی دی ڳالھ کریسی، اسلام آباد اچ دھرنے ݙیسی ٻھل اپݨے صوبے دی حالت نا بدلیسی، صوبائی حکومت سیکورٹی فورسز دی تربیت اتے استعداد ودھاوݨ کیتے ملݨ آلا پیسہ اپݨے سیاسی مقاصد، دھرنیاں اتے جلسیاں تے خرچئے۔ انہاں ہک تصویر ݙکھیندے آکھیے جو ایں دہشتگرد افغان شہری اے ڄئیں دہشتگردی ای کارروائی اچ حصہ ڳھدے، صوبے اچ حملے تھیندے پئن، سیکیورٹی فورسز اتے عام شہری شہید تھیندے پئن ٻھل پی ٹی آئی دی صوبائی حکومت کوں اپݨی سیاست پیاری اے، پاکستان دی سالمیت و دہشت گردی مکاوݨ کیتے جتنا تھیا اقدامات کریسوں۔ وزیر اطلاعات آکھیا جو صوبائی حکومت وسائل نا ہووݨ دا رووݨا روندن ٻھل این ایف سی ایوارڈ سانڳے ہر سال خیبر پختونخوا حکومت کوں کائونٹر ٹیررازم کیتے وادھو فنڈز ملدن، ݙسن ایندے 100 ارب روپے کتھاں لاعن؟ حسابݙتا ونڄے جو اے پیسے دھرنیاں اتے سیاسی سرگرمیاں تے کیوں لڳن؟ ہݨ پاݨی سر توں ٹپ ڳئے، جتھاں ٻال شہید تھیون اتھاں سیاسی کھیݙ کھیݙیا ونڄے، سیاست دے وی کڄھ اصول ہوندن، میݙی اے تربیت نئین جو بطور پاکستانی میں کہیں وی دہشت گرد دے سہولت کار نال نرمی نال الاواں۔ وفاقی وزیر اطلاعات آکھیا جو سہیل آفریدی انتظامی و سیاسی طور تے ناکام تھی چکین، کارکناں دا وی سامݨا نئیں کرسڳدے، صوبے اچ تباہی و بربادی ݙسدی اے، دہشتگردی ودھدی پئی اے۔ وفاقی وزیر آکھیا جو بانی پی ٹی آئی دی پالیسی دہشتگرداں کوں ولا آباد کرݨ دی ہئی، بانی پی ٹی آئی کالعدم تحریک طالبان پاکستان اتے تحریک طالبان افغانستان کیتے ہمیشہ نرم گوشہ رکھیے جیندا ٻھوڳ اڄ ولا دہشتگردی دی شکل اچ ٻھوڳݨا پوندا پئے، پی ٹی آئی دی صوبائی کوں دہشتگردی دے خلاف واضح پالیسی اپناوݨی ہوسی، پی ٹی آئی پولیس کوں ترمیم کر تے اپݨا سیاسی ونگ ٻݨاوݨ، پبلک سروس کمیشن ختم کر تے براہ راست بھرتیاں کرݨ چاہندی جو ایندے نال دہشتگرداں دی سہولتکاری کریڄے، ٻھل اے شہداء دے ورثاء اتے انہاں دیاں قربانیاں نال ناانصافی ہوسی، کہیں قانون دے تحت ایندی اجازت نہ ݙتی ویسی۔