صدر مملکت آصف علی زرداری دی قازقستان دے نائب وزیراعظم و وزیر خارجہ نال ملاقات

اسلام آباد۔9ستمبر(اے پی پی)ایوان صدر دے پریس ونگ دے جاری بیان دے مطابق منگل کوں صدر مملکت آصف علی زرداری نال قازقستان دے نائب وزیراعظم و وزیر خارجہ مرات نورتیلو ایوان صدر اچ ملین۔ صدر مملکت آکھیے جو پاکستان اتے قازقستان دے تعلقات اعتماد، سانجھے احترام اتے سانجھی سوچ تے کھڑن، ݙوہیں ملکاں وچال اعلٰی سطح دے رابطے اتے ادارہ جاتی تعاون چنڳی ڳالھ اے، پاکستان اتے قازقستان وچال تجارت اچ ودھارا تھئے اتے ایکوں ٻیا ودھاوݨ دی لوڑھ اے۔ انہاں تجارت، سرمایہ کاری، توانائی، زراعت اتے رابطیاں دے شعبیاں اچ ڳانݙھا ودھاوݨ تے زور ݙتا۔ صدر مملکت قازقستان دے علاقیاں اچ سڑک، ریل اتے فضائی رابطیاں اچ شراکت دا خیر مقدم کریندے آکھیے جو براہ راست فضائی رابطیاں نال کاروباری اتے لوکاں دے تعلقات کوں ودھارا ملسی۔ قازقستان دے نائب وزیراعظم و وزیر خارجہ مرات نورتیلو آکھیے جو انہاں دا دورہ قازقستان دے صدر دے آندے دورہ پاکستان دی تیاری دا حصہ اے۔ انہاں پاکستان نال شراکت داری کوں ٻیا ڳھاٹا کرݨ دا عزم وی دوہرایا۔ صدر مملکت آصف علی زرداری آکھیے جو پاکستان قازقستان دے صدر دے دورے دا تانڳھی اے ڄیڑھا نہ صرف نویں موقعے ݙیسی ٻھل ݙوہیں ملکاں دے تعلقات کوں ٻیا تکڑا کریسی۔