اسلام آباد ۔ 11 ستمبر (اے پی پی) وزیراعظم محمد شہباز شریف پاکستان اتے بنگلہ دیش وچال عوامی رابطے، علمی تبادلیاں، تجارتی اتے اقتصادی تعلقات سمیت ݙو پاسہ تعلقات دی مثبت سمت تے اطمینان دا اظہار کریندیں ہوئیں آکھیے جو ݙوہاں ملکاں دے تعلقات سانجھی تاریخ، ثقافتی رابتے اتے گہری وابستگیاں تے مبنی ہن۔ خمیس کوں پی ایم آفس دے میڈیا ونگ توں جاری تھیوݨ آلے ھک بیان موجب انہاں …
پاکستان اتے بنگلہ دیش دے تعلقات سانجھی تاریخ، ثقافتی رابطے اتے گہری وابستگیاں تے مبنی ہن، وزیراعظم محمد شہباز شریف
اسلام آباد ۔ 11 ستمبر (اے پی پی) وزیراعظم محمد شہباز شریف پاکستان اتے بنگلہ دیش وچال عوامی رابطے، علمی تبادلیاں، تجارتی اتے اقتصادی تعلقات سمیت ݙو پاسہ تعلقات دی مثبت سمت تے اطمینان دا اظہار کریندیں ہوئیں آکھیے جو ݙوہاں ملکاں دے تعلقات سانجھی تاریخ، ثقافتی رابتے اتے گہری وابستگیاں تے مبنی ہن۔ خمیس کوں پی ایم آفس دے میڈیا ونگ توں جاری تھیوݨ آلے ھک بیان موجب انہاں اے گالھ اتھاں بنگلہ دیش دے مشیر برائے مذہبی امور ڈاکٹر اے ایف ایم خالد حسین نال گالھ مہاڑ کریندیں ہوئیں آکھی جئیں انہاں نال ملاقات کیتی، پاکستان اچ بنگلہ دیش دے ہائی کمشنر محمد اقبال حسین خان وی انہاں دے نال ہن۔ وزیراعظم ڈاکٹر خالد حسین اتے انہاں دے وفد دا خیرمقدم کریندیں ہوئیں آکھیے جو پاکستان اتے بنگلہ دیش وچال ݙو پاسہ تعلقات مشترکہ تاریخ، ثقافتی رابتے اتے گہری وابستگیاں تے مبنی ہن۔ عوامی رابطے، علمی تبادلیاں، تجارتی اتے اقتصادی تعلقات سمیت ݙو پاسہ تعلقات دی مثبت سمت تے اطمینان دا اظہار کریندیں ہوئیں وزیراعظم ݙوہاں ملکاں وچال تعلقات کوں ٻیا ودھاوݨ دی لوڑھ تے زور ݙتا۔ نیویارک اتے قاہرہ اچ تھیوݨ آلی ملاقاتاں دا ذکر کریندیں ہوئیں وزیراعظم چیف ایڈوائزر پروفیسر محمد یونس دی دور اندیش قیادت اتے غربت دے خاتمے اچ انہاں دے کردار دے نال نال پاکستان اتے بنگلہ دیش دے تعلقات کوں مضبوط بݨاوݨ دی خواہش دی تعریف کیتی۔ ڈاکٹر خالد حسین آکھیے جو پاکستان اتے بنگلہ دیش وچال برادرانہ تعلقات تاریخی رابطیاں اتے مشترکہ مذہب نال جُڑے ہوئن۔ ڈاکٹر خالد حسین چیف ایڈوائزر پروفیسر محمد یونس دا ھک خط وی وزیراعظم محمد شہباز شریف دے حوالے کیتا جئیں اچ پاکستان اچ سیلاب نال تھیوݨ آلے جانی تے مالی نقصان تے تعزیت دا اظہار اتے امداد دی پیشکش کیتی ڳئی ہئی۔ ملاقات اچ پاکستان اتے بنگلہ دیش وچال براہ راست پروازاں دی جلدی بحالی دے امکانات تے وی گالھ مہاڑ کیتی ڳئی۔ وزیراعظم امید ظاہر کیتی جو ݙوہیں ملک ݙو طرفہ تعلقات اچ موجودہ رفتار کوں برقرار رکھݨ کیتے اعلیٰ سطح دے دوریاں دا تبادلہ جاری رکھیسن۔ ایں سلسلے اچ وزیراعظم بنگلہ دیش دے چیف ایڈوائزر کوں پاکستان دا سرکاری دورہ کرݨ دی دعوت دا اعادہ کیتا۔ بنگلہ دیشی مشیر وی وزیراعظم کوں چیف ایڈوائزر اتے حکومت ولوں بنگلہ دیش دے دورے دی دعوت ݙتی۔
