میجر راجہ عزیز بھٹی نشان حیدر دی بہادری ہمیشہ یاد رکھی ویسی, وزیر اعظم محمد شہباز شریف

اسلام آباد۔12ستمبر (اے پی پی) وزیر اعظم محمد شہباز شریف آکھیا جو میجر راجہ عزیز بھٹی نشان حیدر دی بہادری ہمیشہ یاد رکھی ویسی۔ میجر راجہ عزیز بھٹی شہید نشان حیدر دے 60ویں یوم شہادت اُتے انہاں کوں خراج عقیدت پیش کریندیں ہوئیں وزیر اعظم آکھیا جو 1965 دی پاک بھارت جنگ اچ مسلسل پنج ݙینھ تئیں دشمن دے حملیاں کوں ناکام بݨا تے میجر راجہ عزیز بھٹی شہید نشان حیدر دشمن دے لاہور اُتے قبضہ کر تے جشن مناوݨ دے ناپاک ارادیاں کوں مٹی اچ ملا ݙتا۔ میجر راجہ عزیز بھٹی شہید نشان حیدر اتے انہاں دے خاندان اُتے مئیں سمیت پوری قوم کوں فخر اے۔ وزیراعظم آفس دے میڈیا ونگ ولوں جاری بیان دے مطابق وزیر اعظم آکھیا جو افواج پاکستان وطن دے دفاع کیتے ݙینھ رات کم کریندی پئن، جݙاں وی دشمن پاکستان دے پاسے ڳندی اکھ نال ݙٹھا پاک فوج دے افسراں تے جواناں میجر راجہ عزیز بھٹی شہید نشان حیدر وانڳوں سیسہ پلائی دیوار بݨ تے وطن عزیز دا تحفظ کیتا۔ انہاں آکھیا جو پاکستان دے تحفظ دے مضبوط عزم اچ مئیں سمیت پوری قوم آپݨی بہادر افواج دے نال مونڈھا رَلا تے کھڑی اے۔