صدر مملکت دا جنوبی پنجاب دی سیلاب توں متاثر تھیوݨ آلے لوکاں نال یکجہتی

اسلام آباد۔12ستمبر (اے پی پی) صدر مملکت آصف علی زرداری اڄوکے سیلاب توں شدید متاثر تھیوݨ آلے جنوبی پنجاب دی عوام نال ہمدردی اتے دلوں یکجہتی دا اظہار کیتے۔ جمعہ کوں ایوان صدر دے پریس ونگ دے مطابق صدر مملکت انہاں ہزاراں لوکاں کوں درپیش بے حد اوکھائی دا ذکر کیتا جو آپݨے گھراں توں بے گھر تھئن اتے جنہاں دا روزگار سیلاب توں بری طرح متاثر تھیے۔ انہاں قوم کوں یقین ݙیوایا جو حکومت ایں نازک ویلھے اچ سیلاب توں متاثرہ لوکاں دے نال کھڑی اے۔ صدر مملکت آکھیا جو بچاؤ، ریلیف اتے بحالی دی کاروائیاں صوبائی حکام، مسلح افواج اتے انسانی ہمدردی کیتے کم کرݨ آلیاں تنظیماں دے نال نیڑے دی ہم آہنگی دے نال جاری ہن تاں جو ضرورت مند لوکاں کوں ضروری امداد فراہم کیتی ونڄ سڳے۔ حکومت زراعت اتے مال مویشیاں دے وݙے نقصان دے پیش نظر بلاول بھٹو زرداری دی درخواست اُتے عمل کریندیں ہوئیں ملک اچ زرعی ایمرجنسی دا اعلان کر ݙتے۔ ایں اہم قدم دا مقصد کساناں دا تحفظ، خوراک دی حفاظت اتے زرعی شعبے دی جلدی بحالی کوں یقینی بݨاوݨا اے۔ صدر مملکت آصف علی زرداری شہریاں اُتے زور ݙتا جو او متحد اتے ہوشیار رہݨ دے نال نال جاری امدادی کوششاں دی حمایت کرن۔ انہاں ایں اعتماد دا اظہار کیتا جو حکومت متاثرہ علاقیاں دی فوری لوڑھ اتے لمبے عرصے دی بحالی کیتے سارے ضروری وسائل دی فراہمی کوں جاری رکھیسی۔