پاکستان دے استحکام دے خلاف سازشاں کرݨ آلی اندرلی اتے ٻاہرلی طاقتاں کوں ذلت آمیز شکست ݙتی ویسی، خواجہ محمد آصف

اسلام آباد۔14ستمبر (اے پی پی) وفاقی وزیردفاع خواجہ محمد آصف خبردار کیتے جو ملک دے امن اتے خود مختاری کوں غیر مستحکم کرݨ دی کہیں وی اندرلی یا غیر ملکی کوشش نال سختی نال نبݨیا ویسی، پی ٹی آئی دا غیر ملکی طاقتاں نال الحاق ایں دی شکست دا باعث بݨسی۔ آپݨے ہک خصوصی انٹرویو اچ خواجہ محمد آصف بانی پی ٹی آئی دے سوشل میڈیا اکاؤٹس کوں کنٹرول کرݨ آلے لوکاں دی شناخت اتے غیر ملکی سازشاں نال جڑئے تعلق کوں بے نقاب کیتا۔ انہاں زور ݙے تے آکھیا جو اے کوششاں آخر کار ناکام تھیسن کیوں جو پاکستان دی مسلح افواج سارے محاذاں تے فیصلہ کن فتوحات حاصل کریندیاں پئن۔ خواجہ محمد آصف پاکستان دی خود مختاری دے تحفظ کیتے فوج دے پکے ارادے دی تعریف کریندے آکھیا جو ٻاہرلی تے اندرلی ݙوہیں طرح دی اوکھ دے باوجود مسلح افواج قومی استحکام اچ خلل پاوݨ دی ہر کوشش کوں ناکام بݨاوݨ اچ پکی اے۔ ہک سوال دے جواب اچ انہاں بنوں کوں دہشت گردی دا گڑھ آکھیا اتے پی ٹی آئی ولوں ایں دی مذمت یا مسلح افواج دے شہیداں کوں عزت ݙیوݨ اچ ناکامی تے وی تنقید کیتی۔ انہاں مزید آکھیا جو افغانستان اچ دہشت گرداں دے تربیتی کیمپ جاری ہن، پاکستان افغان حکام توں آپݨی پوزیشن واضح کرݨ دا مطالبہ کریندے۔ انہاں آکھیا جے افغانستان اصرار کریندے جو ایں دہشت گرداں کوں آپݨے ملک اچ پناہ نی ݙتی ویندی تاں ایں کوں ٹھوس ثبوت ݙیوݨے چاہیدن۔ خواجہ محمد آصف مزید آکھیا جو پاکستان کوں غیر مستحکم کرݨ دیاں کوششاں دے پچھوں بھارت اتے افغانستان سودھے ٻاہرلے عناصر شامل ہن اتے پی ٹی آئی مبینہ طور تے انہاں کوششاں اچ مدد کریندی پئی اے۔ انہاں پکے اعتماد دا اظہار کریندے آکھیا جو انہاں دے ناپاک ارادے ناکام تھیسن۔ انہاں آکھیا جو اللہ دی رضا نال پاکستان دا استحکام ناقابل تسخیر اے۔ انہاں دعویٰ کیتا جو پی ٹی آئی، بھارت اتے افغانستان تے مشتمل ہک “مثلث” بݨ تے اڳوں آئی اے اتے ایں کوں پاکستان دے استحکام کوں ضیان پجاوݨ کیتے استعمال کیتا ویندا پئے۔