سپیکر قومی اسمبلی نال مالدیپ دی عوامی مجلس دے سپیکر دی ملاقات

اسلام آباد۔17ستمبر (اے پی پی) سپیکر قومی اسمبلی سردار ایاز صادق دی دعوت تے پاکستان دے دورے تے آئے مالدیپ دی عوامی مجلس دے سپیکر عبدالرحیم عبداللہ اتے انہاں دے نال پارلیمانی وفد دا پارلیمنٹ ہاؤس آوݨ تے گرمجوشی نال استقبال کیتا ڳیا۔ مالدیپ دی عوامی مجلس دے سپیکر عبدالرحیم عبداللہ پارلیمانی وفد دے نال سپیکر قومی اسمبلی سردار ایاز صادق نال ملاقات کیتی جیں اچ ݙو طرفہ پارلیمانی تعلقات سودھے اہم علاقائی اتے عالمی معاملیں تے ڳالھ مہاڑ کیتی ڳئی۔ ݙوہیں رہنماواں ݙو طرفہ پارلیمانی تعاون اتے عوامی رابطے ودھاوݨ تے اتفاق کیتا۔ ایں موقع تے سپیکر قومی اسمبلی سردار ایاز صادق ڳالھ کریندے آکھیا جو پاکستان اتے مالدیپ سانجھے مذہب، تاریخ اتے ثقافت دے رشتے اچ ڳنڈھئے پئن، خطے اچ امن و ترقی دے ودھارے کیتے پارلیمانی سفارت کاری اہم اے، مسئلہ فلسطین اتے کشمیر کوں حل کیتے بغیر خطے اچ پائیدار امن ممکن کائنی ، عالمی برادری مسئلہ فلسطین اتے کشمیر دے انصاف آلے حل کیتے کردار ادا کرے، مسلم امہ کوں فلسطین اتے کشمیر دے عوام دے حق اچ سانجھا لائحہ عمل اپناوݨا ہوسی۔ سپیکر قومی اسمبلی آکھیا جو پاکستانی فورسز اتے عوام دہشت گردی جیھے ناسور دا بہادری نال مقابلہ کریندے پئن، اسرائیل بھارتی سانجھ خطے اتے دنیا دے امن کیتے وݙا خطرہ اے۔ قطر تے اسرائیلی بمباری تے مسلم ملکاں دی سانجھی مذمت ویلھے سر قدم اے، اسرائیل انسانیت دیاں ساریاں حداں پار کر ݙتن۔ انہاں آکھیا جو اسرائیل فلسطینی عوام دی نسل کشی کریندا پئے، اسرائیل دی طرفوں خطے دے ملکاں دیاں حداں دی خلاف ورزی شرم آلا فعل اے، اسرائیلی ایجنڈا عالمی امن کیتے سنگین خطرہ اے۔ سپیکر سردار ایاز صادق مقبوضہ کشمیر اچ بھارتی ظلم دی شدید مذمت کیتی اتے آکھیا جو کشمیری عوام دی آزادی دی جدوجہد کوں ہر سطح تے پاکستان دی حمایت حاصل اے۔ سپیکر سردار ایاز صادق بھارت دے خلاف پاکستان د اڄوکی فتح تے قوم اتے افواجِ پاکستان کوں خراجِ تحسین پیش کیتا اتے آکھیا جو پاکستان دی کامیابی پوری قوم دے اتحاد اتے افواج دی بہادری و قربانیاں دا نتیجہ اے، بھارتی جارحیت دے مقابلے اچ پاکستان ہمیشہ سرخرو تھئے، سارک کوں مزید فعال کرݨ دی لوڑھ اے، پاکستان اچ تجارت دے وݙے موقع موجود ہن، ݙو طرفہ رابطیں دے ودھارے نال ݙوہیں ملکاں دے عوام ہک ݙوجھے دے مزید نیڑے آسن۔ انہاں آکھیا جو پاک۔مالدیپ فرینڈشپ گروپ ݙوہیں ملکاں اچ پارلیمانی رابطیں دے ودھارے اچ اہم کردار ادا کریندے پئن۔ مالدیپ دے سپیکر آکھیا جو پاکستان آوݨ تے شاندار استقبال تے شکریہ ادا کریندوں۔ پاکستان اتے مالدیپ دے تعلقات بھراواں آلے اتے آپت دے احترام تے ہن۔ انہاں آکھیا جو پاکستان دا مسئلہ فلسطین و کشمیر تے صاف موقف قابل تعریف اے، پارلیمانی سطح تے نیڑے رابطے عوامی سطح تے تعلقات کوں مزید تکڑا کریسن۔