وفاقی وزیر بحری امور محمد جنید انوار چوہدری دا سی پیک دے تلے بحری ترقی اچ گرین انرجی اتے سمندری حفاظت تے زور

اسلام آباد۔17ستمبر (اے پی پی) وفاقی وزیر بحری امور محمد جنید انوار چوہدری آکھیے جو پاکستان، چین دے نال سمندری تعاون کوں مزید مضبوط بݨاوݨ چاہندے تاں جو گوادر کوں خطے دا مرکزی تجارتی و رابطہ مرکز بݨایا ونج سڳے۔ وزارت دی طرفوں جاری پریس ریلیز موجب پنج سالہ بحری ایکشن پلان 2025ء توں 2029ء دے حوالے نال بدھ کوں اجلاس دی صدارت کریندے جنید انوار چوہدری آکھیا جو اے فریم ورک سمندری معیشت دی ترقی، وسائل دے پائیدار استعمال، سائنسی تحقیق اتے ماحولیاتی حفاظت تے مبنی اے جیڑھا چین۔پاکستان اقتصادی راہداری (سی پیک) دے تلے اڳوں ودھایا ویسی۔ وفاقی وزیر آکھیا جو اے منصوبہ پاکستان کوں افغانستان، وسطی ایشیا، مشرق وسطیٰ اتے افریقہ نال جوڑݨ اچ اہم کردار ادا کریسی۔ انہاں گوادر پورٹ دی توسیع، فری زون سٹیج ٹو دی تکھے تکمیل اتے ایسٹ بے ایکسپریس وے فیز ٹو دے وقتی آغاز جیھے وݙے منصوبیں کوں ترجیح تے کم کرݨ دی ہدایت کیتی۔ انہاں نویں گوادر انٹرنیشنل ایئرپورٹ کوں بندرگاہ دے نال رلاوݨ تے وی زور ݙتا ڳیا تاں جو کئی پاسے ٹرانزٹ کوں ودھارا ملے۔ فریم ورک اچ ای-ڈیٹا انٹرچینج اتے سمارٹ پورٹ ٹیکنالوجی نافذ کرݨ دیاں تجویزاں شامل ہن تاں جو گوادر کوں چینی اتے عالمی شپنگ نیٹ ورکس نال جوڑیا ونڄ سڳے۔ ایں دے نال ہی بندرگاہی صنعتاں، گوداماں اتے کولڈ سٹوریج سہولتاں دی ترقی کوں وی منصوبے دا حصہ بݨایا ڳئے تاں جو علاقائی تجارت اتے ٹرانس شپمنٹ اچ سہولت تھی سڳے۔ اجلاس کوں ݙسایا ڳیا جو انفراسٹرکچر توں علاوہ منصوبے اچ سائنس، صنعت اتے سیاحت دے ودھارے تے وی توجہ ݙتی ویندی پئی اے جیں اچ سانجھے میرین سائنس ریسرچ مراکز، سی پیک صنعتی پارکس فشریز، شپ بلڈنگ اتے آبی حیات دی افزائش شامل ہن۔ بلوچستان دے ساحل تے میرین ٹورازم، کروزز اتے واٹر سپورٹس دے منصوبے وی ایں فریم ورک دا حصہ ہوسن۔ تعلیم اتے پائیداری کوں وی پہلی ترجیح ݙتی ڳئی اے، جیں دے تلے پاکستانی و چینی یونیورسٹیاں اتے اداریں وچال اکیڈمک پارٹنرشپ اتے تربیتی تبادلیں دے ذریعے لاجسٹکس، پورٹ آپریشنز اتے فشریز دے ماہر افرادی قوت تیار کیتی ویسی۔ منصوبہ بیلٹ اینڈ روڈ انیشی ایٹو دے ”گرین انرجی اتے اوشن“ مقصد نال رلدے تاں جو ترقی اتے ماحول دی حفاظت اچ توازن قائم رکھیا ونڄ سڳے۔ جنید انوار چوہدری آکھیا جو 2025ء توں 2029ء دا ایکشن پلان پاکستان دے ایں عزم دا اظہار اے جو او ہک مضبوط بحری معیشت قائم کرے، چین دے نال تعلقات مزید گھاٹے بݨاوے اتے سی پیک دے فریم ورک دے تلے سانجھی خوشحالی کوں اڳوں ودھاوے۔