یوم امن تے سمندر تے سمندری حیات دا تحفظ ضروری اے، جنید انور چوہدری

اسلام آباد۔21 ستمبر(اے پی پی) وفاقی وزیر میری ٹائم افیئرز محمد جنید انور چوہدری آکھیا جو حقیقی امن صرف جنگ دا نہ تھیوݨا کائنی، بلکہ فطرت دے نال ہم آہنگ زندگی گزارݨ اے، جیندے وچ سمندراں تے انہاں وچ پاتی ونڄݨ آلی حیات دا تحفظ وی شامل اے۔ یوم امن دے موقع تے اپݨے پیغام وچ وفاقی وزیر آکھیا جو پاکستان دے ساحلی علاقیں دی صحت براہ راست عوام دی زندگی تے معیشت نال جڑی ہوئی اے۔ انہاں آکھیا جے اساݙے سمندر صحت مند نہ ہوسن تاں نہ صرف سمندری مخلوق بلکہ ساحلی کمیونٹیز وی متاثر تھیسن۔ انہاں آکھیا جو نایاب کچھوے، ضرورت کنوں زیادہ شکار دا شکار تھیوݨ آلیاں شارک مچھیاں، چرنا آئی لینڈ دے آسے پاسے دے نازک کورل ریف تے ساحلی علاقیں دے مینگروز خطرے وچ ہن۔ کچھوے غیر قانونی شکار، آلودگی تے رہائش گاہواں دی تباہی کنوں متاثر تھیندے پئن، جݙاں جو شارک مچھیاں سودھے وہیل شارک دے تحفظ کنوں سمندری نظام دا توازن برقرار رکھیا ونڄ سڳدے۔ انہاں ݙسایا جو مرجان (کورل) نہ صرف سمندری زندگی کیتے گھر دا کم ݙیندن بلکہ طوفاناں دے دوران ساحلی علاقیں کوں وی بچیندن، جݙاں جو مینگرووز قدرتی حفاظتی دیوار، کاربن ذخیرہ کرݨ دا ذریعہ تے مچھیاں کیتے افزائش گاہ دا کردار ادا کریندن۔ جنید چوہدری آکھیا جو حکومت ساحلی علاقیں دے تحفظ کیتے اقدامات کریندی پئی اے، جنہاں وچ محفوظ سمندری علاقیں وچ ودھارا ، مینگرووز دی بحالی، ماہی گیری دے قوانین دا سخت نفاذ تے غیر قانونی سرگرمیاں دے خلاف کارروائی شامل اے۔ انہاں عوام، پالیسی سازاں تے میڈیا کنوں اپیل کیتی جو پلاسٹک دے استعمال وچ کمی تے سمندری حیات دے تحفظ وچ اپݨا کردار ادا کرن۔ انہاں آکھیا جو سمندر کاربن جذب کریندن، درجہ حرارت کوں متوازن رکھیندن تے قدرتی آفات دے خطرے گھٹیندن، سمندری زندگی دا تحفظ دراصل اساݙیاں آندیاں نسلاں دے مستقبل دا تحفظ اے۔ انہاں عالمی سطح تے ماحول دے تحفظ کیتے تعاون تے زور ݙتا تے آکھیا جو ہک پرامن دنیا او اے جتھاں شارک آزاد ہوون، کچھوے محفوظ انڈے ݙیون، کورل چمکن، مینگرووز مضبوط کھڑے ہوون تے اساݙے سمندر آندیاں نسلاں کیتے زندگی دا ذریعہ بݨیے رہن۔