ٻاہرلے ملک رہݨ آلے پاکستانی ملک دے سفارت کار ہن، اسحاق ڈار

لندن۔۔21ستمبر (اے پی پی) نائب وزیراعظم / وزیر خارجہ سینیٹر محمد اسحاق ڈار آکھیے جو ٻاہرلے ملک رہݨ آلے پاکستانی ملک دے سفارت کار ہن جیڑھے ݙو ملکاں وچال پُل دا کردار ادا کریندن۔ لندن اچ سمندر پار پاکستانیاں دی تقریب نال خطاب کریندے ہوئیں انہاں مہانگ اتے سود دی شرح اچ کمی دا حوالہ ݙتا اتے آکھیا جو حکومت اقتصادی خودمختاری کیتے کوشش کریندی پئی اے۔ بھارتی جارحیت دا ذکر کریندے انہاں آکھیا جو پاکستان اوں دشمن کوں ہرائے جیڑھا آپݨی فوجی طاقت اتے خطے اچ سکیورٹی ݙیوݨ دے دعوے کریندا ہئی، اے سوچ 10 مئی کوں دفن تھی ڳئی۔ انہاں مزید آکھیا جو ماضی اچ پاکستان دے سفارتی طور تے کلھا تھیوݨ دیاں ڳالھیں سݨیاں، لیکن موجودہ قیادت اچ پاکستان عالمی سفارتی نقشے تے نمایاں جاہ بݨائی اے۔ پاکستان عالمی تقریبات کامیابی نال منعقد کیتیاں اتے اقوام متحدہ دی سلامتی کونسل دی غیر مستقل نشست کیتے 182 ووٹ حاصل کیتے۔ انہاں برطانیہ اچ رہݨ آلی پاکستانی کمیونٹی کوں خراج تحسین پیش کیتا جنہاں ݙوہیں ملکاں دے تعلقات کوں مضبوط کیتا اتے ملکی معیشت اچ کردار ادا کیتا۔ انہاں آکھیا جو پاکستان ماحولیاتی تبدیلی توں متاثرہ ملک اے اتے ایجھے منصوبے بݨائے ویندے پئن تاں جو آوݨ آلے سالاں اچ ایں چیلنج نال نبڑیا ونڄ سڳے۔ اسحاق ڈار آکھیا جو پاکستان مساوات اتے انصاف کیتے آواز چیندا پئے کیوں جو ماحولیاتی تبدیلی صرف پاکستان دا نی بلکہ انہاں سارے ملکاں دا مسئلہ اے جیڑھے عالمی آلودگی توں متاثر ہن۔ انہاں آکھیا جو 2022 اچ جݙاں موجودہ حکومت اقتدار اچ آئی تاں ملک ڈیفالٹ دے کنارے تے ہئی اتے عالمی ریٹنگ ایجنسیاں اتے ادارے ایں حوالے نال تاریخاں ݙیندے پئے ہن۔ ایں موقع تے قوم وزیراعظم کوں سلام پیش کریندی اے جنہاں دی متحرک قیادت معیشت کوں بحران توں کڈھیا۔