فتنہ الخوارج دے 7 دہشت گرد جہنم واصل، آئی ایس پی آر

راولپنڈی۔21ستمبر(اے پی پی) سیکیورٹی فورسز خیبر پختونخوا دے ضلع دیرہ اسماعیل خان دے علاقے کلاچی اچ خفیہ اطلاعات تے آپریشن اچ بھارتی حمایت یافتہ فتنہ الخوارج دے 7 دہشت گرداں کوں جہنم واصل کرݙتا۔ جنہاں اچ 3 افغان شہری اتے 2 خودکش بمبار وی شامل ہن۔ آئی ایس پی آر موجب سیکیورٹی فورسز 20 ستمبر کوں خیبر پختونخوا دے ضلع دیرہ اسماعیل خان دے علاقے کلاچی اچ خفیہ اطلاعات دی بنیاد تے ہک اہم آپریشن کیتا۔ علاقے اچ بھارتی حمایت یافتہ فتنہ الخوارج دے دہشت گرداں دی موجودگی دی اطلاع ملی ہئی۔ کاروائی دے دوران پاک فوج دے جواناں انتہائی پیشہ ورانہ انداز اچ دہشت گرداں دے ٹھکاݨے کوں نشانہ بݨایا، جیں دے نتیجے اچ 7 خارج، جنہاں اچ ترائے افغان شہری اتے ݙو خودکش بمبار وی شامل ہن، جہنم واصل تھی ڳئے۔ ترجمان پاک فوج آکھیا جو پاکستان، عبوری افغان حکومت توں توقع رکھیندے جو او آپݨی سرزمین پاکستان دے خلاف دہشت گردانہ سرگرمیاں کیتے استعمال نہ تھیوݨ ݙیسی اتے آپݨیاں ذمے واریاں کوں پورا کریسی۔ آپریشن دے بعد علاقے اچ کلیئرنس اتے سرچ آپریشن جاری اے تاں جو کہیں وی ممکنہ دہشت گرد کوں لبھ تے ایں کوں انجام تئیں پڄایا ونج سڳے۔ پاک فوج ملک توں بھارتی حمایت یافتہ دہشت گردی دے منڈھوں خاتمے کیتے پرعزم اے۔