آرمی چیف فیلڈ مارشل سید عاصم منیر دی واضح ھدایت تے بلوچستان اِچ منشیات دے خلاف فیصلہ کن مہم دا آغاز

اسلام آباد۔ 22 ستمبر (اے پی پی) آرمی چیف فیلڈ مارشل سید عاصم منیر دی واضح ھدایت تے بلوچستان اچ منشیات دے خلاف فیصلہ کن مہم دا آغاز کر ݙتا ڳے۔ جاری تھئیں تفصیلات دے مطابق بلوچستان اچ اینٹی نارکوٹکس فورس تے مقامی اداریاں پوست دی کاشت تے منشیات دے اڈیاں دے خاتمے کیتے وݙی مہم دا آغاز کر ݙتا۔ اے مہم فیلڈ مارشل سید عاصم منیر تے حکومت بلوچستان دی براہِ راست ھدایت تے جاری اے۔ ایں مہم دا مقصد بلوچستان کوں منشیات کنوں پاک کرݨ اتے ایں ناسور دا مستقل طور تے خاتمہ کرݨا ے۔ منظم کارروائیاں دے دوران کئی علاقیاں اچ پوست دی فصلاں کوں تلف کر ݙتا ڳے۔ منشیات دی پیداوار تے ترسیل اچ ملوث نیٹ ورکس دے خلاف وی کارروائیاں کیتی ڳئن۔ منشیات دے نیٹ ورکس تے دہشتگرداں دے گٹھ جوڑ کوں مکمل ناکام کرݨ کیتے متبادل روزگار دے مواقع وی فراہم کیتے ویسن۔ روزگار دے متبادل ذرائع فراہم کر تے مقامی لوکاں کوں دوبارہ منشیات دی کاشت کنوں روکا ویسی۔ منشیات، جرائم تے دہشت گردی دے گٹھ جوڑ کوں توڑݨ کیتے مؤثر تے پائیدار حکمت عملی اپݨاوݨ وقت دی لوڑھ اے۔ اے گٹھ جوڑ ایں سارے نیٹ ورک کوں طاقت فراہم کریندا پئے۔ منشیات دے خلاف جنگ ہک قومی ذمہ داری اے۔ ایں جنگ اِچ حکومت، سکیورٹی ادارے تے معاشرے دے ہر فرد کوں اپݨا کردار ادا کرݨ ضروری اے۔