نیویارک۔23 ستمبر (اے پی پی) وزیراعظم محمد شہباز شریف کویت نال تجارت، سرمایہ کاری، زراعت، لائیو سٹاک، افرادی قوت دی برآمد تے صحت دے شعبیاں اچ تعلقات کوں ٻیا مضبوط بݨاوݨ دی خواہش دا اعادہ کریندیں ہوئیں آکھئے جو پاکستان تے کویت وچال دیرینہ، تریخی تے برادرانہ تعلقات ہن۔ وزیر اعظم آفس دے میڈیا ونگ توں منگل کوں جاری بیان دے مطابق نیویارک اچ اقوام متحدہ دی جنرل اسمبلی دے …
وزیراعظم شہباز شریف دی کویت دے ولی عہد نال ملاقات، ݙوپاسہ تعلقات کوں ٻیا مضبوط بݨاوݨ دی خواہش دا اعادہ
نیویارک۔23 ستمبر (اے پی پی) وزیراعظم محمد شہباز شریف کویت نال تجارت، سرمایہ کاری، زراعت، لائیو سٹاک، افرادی قوت دی برآمد تے صحت دے شعبیاں اچ تعلقات کوں ٻیا مضبوط بݨاوݨ دی خواہش دا اعادہ کریندیں ہوئیں آکھئے جو پاکستان تے کویت وچال دیرینہ، تریخی تے برادرانہ تعلقات ہن۔ وزیر اعظم آفس دے میڈیا ونگ توں منگل کوں جاری بیان دے مطابق نیویارک اچ اقوام متحدہ دی جنرل اسمبلی دے موقع تے کویت دے ولی عہد شیخ صباح الخالد الحمد المبارک الصباح نال ݙوپاسہ ملاقات اچ ڳالھ مہاڑ کریندیں ہوئیں وزیراعظم شہباز شریف کویت دے امیر شیخ مشعل الاحمد الجابر الصباح لئی احترام تے نیک خواہشات دا اظہار کیتے۔ وزیراعظم آکھئے جو پاکستان تے کویت ہمیش ہک ݙوجھے دے نال کھڑے رہین، وزیراعظم پاکستان اچ اڄوکے سیلاب دے بعد کویت ولوں اظہار ہمدردی تے ولی عہد دا شکریہ ادا کیتے۔ ݙوہیں ملکاں وچال ݙوپاسہ تعاون دے حوالے نال مثبت پیش رفت تے اطمینان کریندیں ہوئیں وزیراعظم پاکستان دے کویت نال تجارت، سرمایہ کاری، زراعت، لائیو سٹاک، افرادی قوت دی برآمد تے صحت سمیت مختلف شعبیاں اچ تعلقات کوں ٻیا مضبوط بݨاوݨ دی خواہش دا اظہار کیتے۔ وزیراعظم آکھئے جو پاکستان ایں سال دے چھیکڑ اچ کویت دے ولی عہد دے پاکستان دے سرکاری دورے تے انہاں دی میزبانی دا منتظر اے، جئیں کیتے تاریخاں سفارتی ذرائع نال طے کیتی ویندی پئن۔ ݙوہیں رہنماواں مشرق وسطیٰ دی صورتحال سودھے علاقائی تے بین الاقوامی امور تے وی ڳالھ کیتی۔ کویت دے ولی عہد عالمی برادری دے سامݨے فلسطین اچ تھیندے مظالم کوں موثر انداز اچ بے نقاب کرݨ دے نال نال خطے اچ مستقل امن کیتے اہم کردار ادا کرݨ کیتے پاکستان دی سفارتی کوششاں کوں سراہا۔ ݙوہیں رہنماواں ݙوپاسہ تے کثیر جہتی فورمز تے نزدیکی تعاون دے آپݨے عزم دا اعادہ کیتے۔
